1. Eaha to Iehova huru ia hiˈo mai o ˈna i ta ˈna mau tavini?

 IA HIˈO mai Iehova i ta ˈna mau tavini i te fenua nei, eaha ta ˈna e ite? E ite mai o ˈna ia oaoa tatou e ia oto atoa. (Sal. 37:18) E oaoa roa o ˈna ia ite mai e te faaitoito ra tatou i te tavini ia ˈna noa ˈtu to tatou hepohepo. E hinaaro iho â o ˈna e tauturu e e faaitoito ia tatou.

2. Eaha ta Iehova e rave ra no te feia aau oto, e e nafea tatou e fanaˈo ai i ta ˈna tauturu?

² Te parau ra te Salamo 147:3 e te taamu ra Iehova i te mau pepe o te feia aau oto. Te faataa ra teie irava e nafea Iehova e tauturu ai ia ratou. Eaha te titauhia ia rave tatou no te fanaˈo i ta ˈna tauturu? E rave mai tatou i teie hiˈoraa. E nehenehe iho â te hoê taote e rapaau i te hoê taata tei pepe. Teie râ, e ora to ˈna pepe mai te peu e pee o ˈna i te aratairaa a teie taote. I roto i teie tumu parau, e ite mai tatou eaha ta Iehova e parau ra i roto i te Bibilia i te feia e hepohepo ra, oia atoa e nafea tatou e faaohipa ˈi i ta ˈna aratairaa î i te here.

TE HAAPAPU RA IEHOVA MEA FAUFAA ROA TATOU NO ˈNA

3. No te aha vetahi e haafaufaa ore ai ia ratou?

³ Mea iti roa te here i roto i teie nei ao, no reira e rave rahi o te haafaufaa ore ra ia ratou. Te na ô ra te hoê tuahine o Helen a te iˈoa: “Ua paari au i roto i te hoê utuafare aita e here. Mea ino roa to ˈu papa i nia ia matou, e  pauroa te mahana e haafaufaa ore o ˈna ia matou.” O oe atoa paha tei rave-ino-hia e tei tuhi-noa-hia mai ia Helen, a manaˈo atu ai oe aita e taata e here ra ia oe. Mai te peu e e, mea fifi iho â ïa ia tiaturi e taata te tâuˈa mai ra ia oe.

4. Eaha ta Iehova e haapapu ra i roto i te Salamo 34:18?

⁴ Noa ˈtu ua rave-ino-hia oe, e nehenehe oe e tiaturi mea here roa na Iehova ia oe e mea faufaa roa oe no ˈna. “Tei pihai iho Iehova i te feia o te mauiui ra.” (A taio i te Salamo 34:18.) Mai te peu e te hepohepo ra oe, a haamanaˈo ua ite Iehova i te maitai i roto i to aau, e na ˈna i faafatata mai ia oe ia ˈna ra. (Ioa. 6:44) Ua ineine noa ïa oia i te tauturu ia oe, mea here roa hoi na ˈna ia oe.

5. Eaha ta tatou e haapii mai i to Iesu huru i nia i te feia tei vahavahahia?

⁵ E nehenehe tatou e ite eaha to Iehova huru aau ma te hiˈopoa i to Iesu hiˈoraa. I te roaraa o ta ˈna taviniraa i te fenua nei, ua faaite o ˈna i te aumihi i te feia tei vahavahahia. (Mat. 9:9-12) I to te hoê vahine tapahi tapearaa i to Iesu ahu a tiaturi ai e ora to ˈna maˈi, ua tamahanahana e ua haapopou oia ia ˈna no to ˈna faaroo. (Mar. 5:25-34) Te faaite ra Iesu ma te tia roa i te huru o to ˈna Metua. (Ioa. 14:9) No reira, e nehenehe oe e tiaturi mea faufaa roa oe no Iehova e te ite mai ra o ˈna i to oe mau huru maitatai, mai to oe faaroo e to oe here ia ˈna.

6. E nafea ia haavî i te manaˈo e mea faufaa ore oe?

⁶ Eaha ta oe e nehenehe e rave mai te peu e hoˈi noa mai te manaˈo mea faufaa ore oe? A taio i te mau irava Bibilia e  haapapu ra mea faufaa roa oe no Iehova, e a feruriruri i te reira. b (Sal. 94:19) Ia ore ia raea ia oe te tahi fa aore ra mea iti paha ta oe e rave ra ia faaauhia i ta vetahi ê, eiaha e faahapa ia oe. Eita Iehova e ani mai i te tahi mea eita e maraa ia oe. (Sal. 103:13, 14) Mai te peu ua rave-ino-hia oe, eiaha e faahapa ia oe no ta oe i faaruru. E ere hoi no oe te hape. A haamanaˈo, o te feia o te rave i te ohipa ino ta Iehova e haava, eiaha râ te feia tei rave-ino-hia. (Pet. 1, 3:12) Te na ô ra Sandra, tei rave-ino-hia i to ˈna nainairaa na to ˈna mau metua: “E taparu noa vau ia Iehova ia tauturu mai ia ˈu ia hiˈo i te maitai ta ˈna e ite ra i roto ia ˈu.”

7. No ta tatou i faaruru na, eaha ta tatou e nehenehe e rave no vetahi ê?

⁷ E nehenehe ta Iehova e faaohipa ia oe no te tauturu ia vetahi ê. E hoa ohipa hoi oe no ˈna i roto i te pororaa. (Kor. 1, 3:9) No ta oe i faaruru na, mea ohie aˈe no oe ia taa i te mauiui o vetahi ê, a faaite atu ai i te aumihi. Ua fanaˈo Helen, tei faahitihia na, i te tauturu. Mea ohie aˈe ïa no ˈna i teie nei ia tauturu ia vetahi ê. Te parau ra o ˈna: “I haafaufaa ore noa na vau ia ˈu. I teie nei râ, ua taa ia ˈu e mea here roa na Iehova ia ˈu e te faaohipa ra o ˈna ia ˈu no te tauturu ia vetahi ê.” E pionie tamau Helen i teie mahana, e mea oaoa roa o ˈna.

TE HAAPAPU RA IEHOVA E UA FAAORE O ˈNA I TA TATOU MAU HARA

8. Eaha ta te Isaia 1:18 e haapapu mai ra?

⁸ Te tatarahapa noa ra te tahi mau tavini a Iehova no ta ratou i rave na mua ˈˈe aore ra i muri iho i to ratou bapetizoraahia. Mea faufaa roa ia haamanaˈo tatou e ua horoa mai Iehova i te hoo no to ˈna here rahi ia tatou. Te haapapu mai ra o ˈna e ua ‘faaafaro anaˈe tatou i te fifi i rotopu ia tatou’ c e o ˈna, e faaore roa o ˈna i ta tatou mau hara. (A taio i te Isaia 1:18.) Eita o ˈna e haamanaˈo faahou i te reira. Eita atoa e moˈehia ia ˈna te maitai ta tatou i rave. Tera te here mau.—Sal. 103:9, 12; Heb. 6:10.

9. No te aha ia tutava tatou i te tiatonu i ta tatou e rave nei e a muri aˈe?

⁹ Mai te peu e te tatarahapa noa ra oe no ta oe i rave na mua ˈˈe, a tutava ïa i te tiatonu i ta oe e rave nei e a muri aˈe. A hiˈo na i te aposetolo Paulo. Ua tatarahapa iho â o ˈna i te hamani-ino-raa i te mau Kerisetiano. Ua ite atoa o ˈna e ua faaore Iehova i ta ˈna hara. (Tim. 1, 1:12-15) Ua tamau anei râ o ˈna i te manaˈo noa i te reira aore ra i ta ˈna i rave na no te riro ei Pharisea faaturahia? Aita roa ˈtu. (Phil. 3:4-8, 13-15) Ta ˈna i haapao na mua roa, ta ˈna ïa taviniraa a hiˈo ai i mua. Mai ia Paulo, eita ta tatou e nehenehe e taui i ta tatou i rave na mua ˈˈe. E nehenehe râ tatou e faahanahana ia Iehova, a tiatonu atu ai i te oraraa faahiahia ta ˈna i fafau mai.

10. Eaha te rave mai te peu e ua haamauiui ta oe i rave na ia vetahi ê?

¹⁰ Te hepohepo ra paha oe no te mea ua haamauiui ta oe i rave na ia vetahi ê. E nafea ïa? A tutava i te faaafaro i te reira.  A faaite roa ˈtu e te tatarahapa mau ra oe. (Kor. 2, 7:11) A ani ia Iehova ia tauturu i te feia ta oe i haamauiui. E nehenehe hoi ta ˈna e tauturu ia oe e ia ratou ia tamau i te tavini ia ˈna e ia fanaˈo faahou i te hau.

11. Eaha te haapiiraa e huti mai i te peropheta Iona? (A hiˈo atoa i te hohoˈa.)

¹¹ A huti mai i te haapiiraa i ta oe mau hape, e a vaiiho ia Iehova ia faaohipa ia oe. A hiˈo na i te peropheta Iona. I to Iehova faaueraa ia ˈna ia haere i Nineve, ua horo o ˈna vahi ê. Ua aˈo Iehova ia ˈna, e ua huti mai Iona i te haapiiraa. (Iona 1:1-4, 15-17; 2:7-10) Ua faaue â Iehova ia ˈna ia haere i Nineve. E tera taime, ua faaroo Iona. Noa ˈtu e ua tatarahapa o ˈna i te faaroo-ore-raa ia Iehova, ua rave râ o ˈna i ta Iehova i faaue ia ˈna.—Iona 3:1-3.

E TAMAHANAHANA MAI IEHOVA NA ROTO I TO ˈNA VARUA MOˈA

12. E nafea Iehova e horoa mai ai i te hau ia roohia tatou i te ati? (Philipi 4:6, 7)

¹² Ia roohia tatou i te ati, e tamahanahana mai Iehova na roto i to ˈna varua moˈa. Ta Ron raua Carole ïa i ite, i te haapoheraa ta raua tamaiti ia ˈna. Te na ô ra raua: “I faaruru na mâua i te fifi rahi, teie râ te ati mauiui roa ˈˈe. Ehia po eita e topa te taoto e ua pure mâua ia Iehova. Ua ite roa mâua i te hau faataahia i roto i te Philipi 4:6, 7.” (A taio.) Mai te peu e te faaruru ra oe i te hoê fifi mauiui mau, a haamahora i to aau ia Iehova i roto i te pure i te mau taime atoa. (Sal. 86:3; 88:1) A taparu ia ˈna ia horoa mai i to ˈna varua moˈa. E tauturu mai iho â o ˈna.—Luka 11:9-13.

13. E nafea te varua moˈa e tauturu mai ai ia tamau tatou i te haamori ia Iehova? (Ephesia 3:16)

¹³ Ua faaruru anei oe i te tahi fifi o tei haaparuparu maitai ia oe? E nehenehe te varua moˈa e faaitoito ia oe ia tamau i te haamori ia Iehova. (A taio i te Ephesia 3:16.) Ta te tupuraa ïa o te hoê tuahine o Flora te iˈoa e haapapu ra. I tavini na raua ta ˈna tane ei mitionare i te faaturiraa ta ˈna tane, e taa ˈtura raua. Te na ô ra Flora: “Ua oti roa vau no to ˈu mauiui iti rahi. Ua pure au ia Iehova ia horoa mai i to ˈna varua moˈa ia mau papu vau. Ua horoa mai iho â Iehova i te tauturu no te rapaau i to ˈu mauiui. Noa ˈtu i te omuaraa ua manaˈo vau eita e haere ia ˈu, ua horoa mai o ˈna i te puai no te faaoromai tamau.” I teie nei, ua papu roa ˈtu â ia Flora e tauturu iho â Iehova ia ˈna i roto i to ˈna mau fifi atoa. Te na ô atoa ra o ˈna: “Tano maitai te Salamo 119:32 no ˈu: ‘E auraro vau i ta oe mau faaueraa, e faarahi hoi oe i to ˈu maramarama.’ ”

14. E nafea tatou e fanaˈo ai i te varua o te Atua?

¹⁴ Eaha te rave i muri iho i to oe aniraa ia Iehova i to ˈna varua moˈa? A apiti i te mau ohipa e fanaˈo atu â ˈi oe i te reira, mai te haereraa i te mau putuputuraa e te pororaa na muri i to oe mau taeae e tuahine. A faaî atoa i to oe feruriraa i te mau manaˈo o Iehova ma te taio i ta ˈna Parau pauroa te mahana. (Phil. 4:8, 9) I roto i ta oe taioraa, a tapao i te hiˈoraa o te mau tavini tei faaruru na i te fifi, e a feruriruri mea nafea to Iehova tautururaa ia ratou ia faaoromai tamau. Mea rahi te fifi ta Sandra, tei faahitihia na, i faaruru. Te na ô ra o ˈna: “Ua putapû roa vau i te aamu o Iosepha. Aita o ˈna i  vaiiho i to ˈna mau fifi e te mau ohipa tano ore ta ˈna i faaruru ia haafifi i to ˈna auhoaraa e o Iehova.”—Gen. 39:21-23.

E TAMAHANAHANA MAI IEHOVA NA ROTO I TE MAU TAEAE E TUAHINE

15. O vai te nehenehe e tamahanahana ia tatou, e e nafea ratou e tauturu mai ai? (A hiˈo atoa i te hohoˈa.)

¹⁵ Ia mauiui tatou, e nehenehe to tatou mau taeae e tuahine e “tamahanahana rahi mai.” (Kol. 4:11) Mea na roto hoi ia ratou e faaite ai Iehova i to ˈna here ia tatou. E nehenehe ratou e tamahanahana mai ma te horoa mai i to ratou taime e ma te faaroo mai ia haamahora tatou i to tatou aau. E nehenehe ratou e faaitoito mai ma te taio i te hoê irava Bibilia aore ra ma te pure e o tatou. d (Roma 15:4) I te tahi taime, e nehenehe to tatou taeae aore ra tuahine e haamanaˈo mai i te manaˈo o Iehova e e tauturu mai ia faaoromai tamau. E nehenehe atoa ratou e afai mai i te maa ia oaoa tatou.

16. Eaha te titauhia ia rave tatou no te fanaˈo i te tauturu a vetahi ê?

¹⁶ Ia hinaaro tatou i te tauturu, e titauhia ia ani atu tatou i to tatou mau taeae e tuahine o te here ra ia tatou e o te hinaaro e tauturu mai. (Mas. 17:17) Teie nei râ, aita paha ratou i ite eaha to tatou  huru aau aore ra eaha ta tatou e hinaaro mau ra. (Mas. 14:10) Ia ahoaho oe, a tauaparau e te hoa maitai o te nehenehe e tauturu ia oe. E maiti paha oe i te hoê aore ra e piti matahiapo mea ohie aˈe no oe e paraparau atu. Ua imi te tahi mau tuahine i te tamahanahanaraa ma te tauaparau e te hoê tuahine paari.

17. Eaha te tahi mau fifi o te tapea ia tatou ia fanaˈo i te faaitoitoraa, e eaha te rave?

¹⁷ A haavî i te hinaaro e faaatea ê ia oe. Eita paha oe e hinaaro roa e paraparau i te taata no to oe hepohepo. I te tahi taime, eita paha e taa roa i to oe mau taeae e tuahine ta oe e faaruru ra aore ra e parau mai paha i te tahi parau mauiui. (Iak. 3:2) Eiaha e vaiiho i teie mau fifi ia tapea ia oe ia fanaˈo i te faaitoitoraa. Te na ô ra te hoê matahiapo o Ga⁠vin te iˈoa, o te faaruru ra i te hepohepo: “Pinepine eita vau e hinaaro e paraparau i to ˈu mau hoa.” Aita râ o taeae i vaiiho i teie manaˈo ia haafifi ia ˈna. Ua amuimui o ˈna i to ˈna mau taeae e tuahine, e ua maitai mai o ˈna. Te na ô ra o tuahine Amy: “Mea fifi roa no ˈu ia tiaturi i te taata no ta ˈu i faaruru na. I teie nei râ, te haapii nei au i te here e te tiaturi i to ˈu mau taeae e tuahine mai ia Iehova. Ua ite au e te oaoa ra Iehova, e te oaoa atoa nei au.”

E TAMAHANAHANA MAI TA IEHOVA I FAFAU NO A MURI AˈE

18. Eaha ta Iehova e rave i mua nei, e eaha ta tatou e rave i teie nei?

¹⁸ Fatata Iehova i te faaore roa i te ahoaho e te mauiui. E nehenehe tatou e tiaturi i te reira. (Apo. 21:3, 4) I taua taime ra, eita te mau mea o tei haamauiui na ia tatou e ‘faahoruhoru faahou i to tatou aau.’ (Isa. 65:17) Mai ta tatou i ite, ‘te taamu ra Iehova i to tatou mau pepe’ i teie nei atoa. No reira, e haafaufaa anaˈe i ta ˈna mau ravea atoa no te faaitoito e no te tamahanahana ia tatou. Ia papu maitai ia oe e “te haapeapea mai ra oia no [oe].”—Pet. 1, 5:7.