1. I tahito ra, mea nafea te mau tavini haapao maitai i te fanaˈoraa i te puai o te Atua?

 PINEPINE te Bibilia i te parau e mea puai te mau tavini haapao maitai. Tera râ, ua paruparu atoa te taata puai aˈe i rotopu ia ratou. Ei hiˈoraa, i te tahi taime, ua parau te arii Davida e ua haapuaihia o ˈna “mai te mouˈa” ra. Ua “mǎtaˈu” atoa râ o ˈna i te tahi taime. (Sal. 30:7) Noa ˈtu e taata puai mau Samasona a ohipa ˈi te varua o te Atua i nia ia ˈna, ua farii o ˈna e aita anaˈe te puai no ǒ mai i te Atua “e paruparuhia [o ˈna] a riro atu ai mai te tahi atu mau taata.” (Tav. 14:5, 6; 16:17) Inaha, maoti noa Iehova i noaa ˈi i teie mau tavini haapao maitai te puai.

2. No te aha te aposetolo Paulo i parau ai “ia paruparu hoi au, i reira ïa vau e puai ai”? (Korinetia 2, 12:9, 10)

² Ua farii te aposetolo Paulo e no ǒ mai to ˈna puai ia Iehova ra. (A taio i te Korinetia 2, 12:9, 10.) Mai e rave rahi o tatou, ua faaruru atoa Paulo i te maˈi. (Gal. 4:13, 14) I te tahi taime, mea fifi atoa no ˈna ia rave i te mea maitai. (Roma 7:18, 19) Ua ahoaho e ua feaa atoa o ˈna. (Kor. 2, 1:8, 9) Tera râ, a paruparu ai oia, i reira o ˈna i puaihia ˈi. Mea nafea? Ua horoa Iehova i te puai ta Paulo i ere.

3. Eaha ta tatou e hiˈopoa mai i roto i teie tumu parau haapiiraa?

³ Ua fafau Iehova i te haapuai atoa ia tatou. (Pet. 1, 5:​10) E titauhia râ ia rave atoa i ta tatou tuhaa no te fanaˈo i te puai no ǒ mai ia ˈna ra. Ei hiˈoraa, maoti te matini e tere ai te pereoo. Na te taata faahoro râ e taahi i nia i te haapuairaa. Hoê â huru no Iehova. Ua ineine o ˈna i te horoa mai i te puai, e titauhia râ ia tatou ia rave i ta tatou tuhaa no te fanaˈo i te reira. Eaha ta Iehova i rave no te haapuai ia tatou e e nafea tatou e fanaˈo ai i te reira? E pahono tatou i teie nau uiraa a hiˈopoa ˈi e mea nafea Iehova i te faaitoitoraa  e toru tavini haapao maitai, te peropheta Iona, Maria, te metua vahine o Iesu e te aposetolo Paulo. E ite atoa tatou e nafea Iehova e na reira ˈi no ta ˈna mau tavini i teie mahana.

4. Eaha te tahi mau ravea e fanaˈo ai tatou i te puai no ǒ mai ia Iehova ra?

⁴ Te tahi ravea e fanaˈo ai tatou i te puai no ǒ mai ia Iehova, o te pure ïa. E nehenehe Iehova e horoa mai i “te puai o te hau ê i to te taata nei.” (Kor. 2, 4:7) E itoito-atoa-hia tatou ma te taio i ta ˈna Parau e ma te feruriruri i nia i te reira. (Sal. 86:11) Inaha, mea “puai rahi” te poroi ta Iehova i tuu i roto i ta ˈna Parau. (Heb. 4:12) No reira, ia pure outou ia Iehova e ia taio outou i te Bibilia, e fanaˈo outou i te puai no te faaoromai tamau, no te oaoa noa e no te haapao maite i te hoê hopoia. E hiˈo anaˈe mea nafea Iehova i te faaitoitoraa i te peropheta Iona.

5. No te aha te peropheta Iona i hinaaro ai i te itoito?

⁵ Ua hinaaro mau â te peropheta Iona i te itoito. Ua horo ê oia i te hoê hopoia ta Iehova i horoa ia ˈna. I te pae hopea, fatata o ˈna e te feia atoa i nia i te pahi i te pohe a tupu ai te hoê vero. Ua taorahia o ˈna i roto i te miti e horomiihia ˈtura oia e te iˈa. Eaha to Iona huru i roto i te opu o te iˈa? Ua manaˈo anei oia e e pohe o ˈna? Ua manaˈo atoa anei o ˈna e ua faarue Iehova ia ˈna? Eita e ore e ua hepohepo roa Iona i taua taime ra.

6. Ia au i te Iona 2:1, 2, 7, eaha tei tauturu ia Iona i tera taime o ˈna anaˈe?

⁶ I tera taime o ˈna anaˈe, eaha ta Iona i rave no te fanaˈo i te itoito? A tahi, ua pure o ˈna ia Iehova. (A taio i te Iona 2:1, 2, 7.) Noa ˈtu ua faaroo ore o ˈna ia Iehova, ua papu ia Iona e e faaroo mai Iehova i ta ˈna pure. Ua feruriruri atoa o ˈna i nia i te mau Papai. Na te aha i haapapu i te reira? I roto i ta ˈna pure itehia i te pene 2 o ta ˈna buka, ua faahiti o ˈna i te mau parau o te buka Salamo. (Ei hiˈoraa, a faaau i te Iona 2:2, 5 i te Salamo 69:1; 86:7.) Te auraa ïa, ua ite maitai o ˈna i teie mau irava. No reira oia i papu ai e e tauturu Iehova ia ˈna. I muri aˈe, ua faahoˈihia o ˈna i nia i te fenua e ua farii oia i te hopoia horoahia ia ˈna.—Iona 2:10–3:4.

7-8. Mea nafea Zhiming i te fanaˈoraa i te itoito a faaruru ai o ˈna i te fifi?

⁷ E nehenehe te hiˈoraa o Iona e tauturu ia tatou i te taime e faaruru ai tatou i te fifi e rave rau. Teie te hiˈoraa o Zhiming, b hoê taeae no Taïwan tei faaruru i te maˈi ino mau. I te hoê â taime, ua faaruru o ˈna i te patoiraa a to ˈna utuafare no to ˈna faaroo. Ua itoitohia râ o ˈna maoti te pure e ta ˈna iho haapiiraa. Te parau ra o ˈna: “Ia rahi roa to ˈu mau fifi, e hepohepo roa vau e eita e haere ia ˈu ia rave i ta ˈu iho haapiiraa.” Aita râ o ˈna i tuu. Te na ô faahou ra Zhiming: “E pure na mua vau ia Iehova. I muri mai, e faaroo vau i te mau himene arueraa ia Iehova a himenemene atu ai. A na reira ˈi, e mǎrû roa mai to ˈu feruriraa. I reira ïa vau e rave ai i ta ˈu haapiiraa.”

⁸ Ua puaihia Zhiming maoti ta ˈna haapiiraa. Ei hiˈoraa, i te tâpûraahia o ˈna, ua parau te tuati maˈi e titauhia ia pâmuhia o ˈna i te toto. Auaa râ, i te po hou a tâpûhia ˈi o ˈna, ua taio Zhiming i te faatiaraa a te hoê tuahine tei maˈi-atoa-hia. Mai ia Zhiming, ua titauhia ia pâmuhia o ˈna i te toto, mea ino aˈe râ to ˈna tupuraa. Aita  teie tuahine i farii noa ˈ ˈe i te toto e ua ora mai o ˈna. Maoti to ˈna hiˈoraa, ua itoitohia Zhiming no te vai taiva ore.

9. Eaha te rave ua paruparu anaˈe outou no te hoê fifi? (A hiˈo atoa i te hohoˈa.)

⁹ Ia faaruru outou i te fifi, e haapeapea anei outou i te ore e ite eaha te faahiti i roto i ta outou mau pure? Mea fifi anei no outou ia rave i ta outou iho haapiiraa? A haamanaˈo e te taa maitai ra ia Iehova to outou tupuraa. No reira, noa ˈtu mea poto ta outou pure, e horoa iho â Iehova i ta outou e hinaaro mau ra. (Eph. 3:20) Mai te peu, no te hepohepo rahi, mea fifi no outou ia taio i te Bibilia e ia rave i ta outou haapiiraa, a tamata i te faaroo i te haruharuraa o te taioraa Bibilia e o ta tatou mau papai. E nehenehe atoa outou e faaroo i te mau himene e e mataitai i te hoê video i nia i te jw.org. Ia pure outou ia Iehova e ia imi outou i te pahonoraa i roto i te mau faanahoraa pae varua atoa ta ˈna e horoa mai, mai te huru ra ïa e te taparu ra outou ia ˈna ia faaitoito ia outou.

10. E nafea te mau taeae e tuahine e faaitoito ai ia tatou?

¹⁰ E nehenehe Iehova e faaohipa i to tatou mau taeae e tuahine no te faaitoito ia tatou. E “tamahanahana rahi” mau ratou ia tatou i te taime e faaruru ai tatou i te fifi aore ra mea fifi anaˈe no tatou ia haapao i te hoê hopoia. (Kol. 4:10, 11) E hinaaro iho â tatou i te hoa mau i “te taime ahoaho.” (Mas. 17:17) Ia paruparuhia tatou, e nehenehe to tatou mau taeae e tuahine e tauturu ia tatou i te pae tino, feruriraa e i te pae varua. E hiˈo anaˈe mea nafea Maria, te metua vahine o Iesu, i te itoitoraahia ia vetahi ê.

11. No te aha Maria i hinaaro ai i te itoito?

¹¹ Ua hinaaro mau Maria i te itoito. A feruri na i to ˈna huru i te taime a horoa ˈi te melahi Gaberiela i te hoê hopoia rahi ia ˈna. Aita hoi o ˈna i faaipoipohia ˈtura e te parauhia mai ra e hapû o ˈna. Aita o ˈna i tamariihia aˈenei e o te Mesia ta ˈna e amo i roto i to ˈna opu. Ua momoˈahia hoi  Maria ia Iosepha. E nafea ïa o ˈna e faataa ˈi i te reira ia Iosepha, inaha aita o ˈna i taoto aˈenei e te hoê tane?—Luka 1:26-​33.

12. Ia au i te Luka 1:39-45, mea nafea Maria i te fanaˈoraa i te itoito?

¹² Mea nafea Maria i te fanaˈoraa i te itoito no te amo i teie hopoia rahi e te taa ê mau? Ua ani o ˈna i te tauturu a vetahi ê. Ei hiˈoraa, ua ani oia ia Gaberiela i te tahi atu mau haamaramaramaraa no nia i teie hopoia. (Luka 1:34) I muri aˈe, ua tere o ˈna “i te fenua mouˈa i te hoê oire no Iuda” no te haere e farerei i to ˈna fetii Elisabeta. Ua haamaitaihia to ˈna tere. Ua haapopou Elisabeta ia Maria e ua faaohipa Iehova ia ˈna no te faaitoito ia Maria, inaha ua faahiti o ˈna i te hoê parau tohu itoito mau no nia i ta ˈna aiû i roto i to ˈna opu. (A taio i te Luka 1:39-​45.) I muri iho, parau atura Maria no Iehova e “ua haa oia ma to ˈna rima puai.” (Luka 1:46-​51) Ua faaohipa Iehova ia Gaberiela e ia Elisabeta no te faaitoito ia Maria.

13. Mea nafea Dasuri i te faufaaraahia i te aniraa o ˈna i te tauturu a to ˈna mau taeae e tuahine?

¹³ Mai ia Maria, e nehenehe atoa outou e fanaˈo i te itoito na roto i te mau taeae e tuahine. Ua hinaaro mau Dasuri, hoê tuahine no Bolivia i te itoito. Ua roohia to ˈna metua tane i te maˈi ino mau e aita e nehenehe e rapaau faahou. Mau ihora o ˈna i te fare maˈi e na Dasuri i haapao ia ˈna. (Tim. 1, 5:4) E ere roa ˈtu i te mea ohie. Te na ô ra o ˈna: “I te tahi taime, ua oti roa vau i te rohirohi.” Ua ani anei o ˈna i te tauturu? I te haamataraa, aita. Te faataa ra Dasuri: “Aita vau i hinaaro e faaohipa rahi i te mau taeae e tuahine. Ua manaˈo vau e na Iehova iho â e tauturu mai. I muri aˈe râ, ua taa ia ˈu e ia faataa ê au ia ˈu ia vetahi ê, te tiaturi ra ïa vau ia ˈu iho no te faaruru i tera fifi.” (Mas. 18:1) I reira to Dasuri papairaa i to ˈna mau hoa no te faataa i to ˈna tupuraa. Te na ô ra oia: “Aita ta ˈu e parau no te faaite i to ˈu mauruuru no te tauturu rahi ta ˈu i fanaˈo maoti to ˈu mau taeae e tuahine. Ua afai mai vetahi i te maa i te fare maˈi e ua tamahanahana atoa ia ˈu maoti te irava Bibilia. Mea mahanahana ia ite e ere o tatou anaˈe. E fetii taeae to tatou, te hoê utuafare pae varua o te ineine i te horoa mai i te rima tauturu, i te taˈi ia mauiui tatou e i te faaitoito ia tatou ia mau papu i roto i te parau mau.”

14. No te aha e tia ia tatou ia farii i te tauturu?

¹⁴ E faaohipa atoa Iehova i te mau matahiapo no te faaitoito e no te tamahanahana ia tatou. E ô taua mau taeae ra no tatou. (Isa. 32:1, 2) No reira, ia hepohepo outou, a haere e farerei i te mau matahiapo no te faaite i ta outou mau haapeapearaa. Ia horoa mai ratou i te tauturu, a farii i te reira. Te faaitoito ra Iehova ia outou na roto i te mau matahiapo.

15. Teihea tiaturiraa ta te Kerisetiano e faahiahia ra?

¹⁵ E itoitohia tatou maoti to tatou tiaturiraa niuhia i nia i te Bibilia. (Roma 4:3, 18-20) Ei Kerisetiano, te tiaturi nei tatou e ora e a muri noa ˈtu i nia i te fenua faarirohia ei paradaiso aore ra i roto i te Faatereraa arii i te raˈi. Maoti teie tiaturiraa, e noaa ˈi ia tatou ia faaoromai tamau i te fifi, ia poro i te parau apî oaoa e ia amo i te hopoia i roto i te amuiraa. (Tes. 1, 1:3) Na te reira atoa i faaitoito i te aposetolo Paulo.

16. No te aha Paulo i hinaaro ai i te itoito?

¹⁶ Ua hinaaro mau â Paulo i te itoito. I  roto i ta ˈna rata i to Korinetia, ua faaau oia ia ˈna i te hoê farii araea. Ua roohia o ˈna i te ati, ua feaa oia, ua faaruru o ˈna i te hamani-ino-raa e ua hurihia oia i raro. I te tahi taime, fatata atoa o ˈna i te pohe. (Kor. 2, 4:8-10) Ua papai Paulo i teie mau parau i te roaraa o te toru o to ˈna tere mitionare. I muri aˈe, ua faaruru faahou o ˈna i te ati e rave rau. Ua taparahihia o ˈna e te hoê nahoa, ua tapeahia oia, ua faaruru i te vero rahi e ua tuuhia o ˈna i te fare tapearaa.

17. Ia au i te Korinetia 2, 4:16-18, mea nafea to Paulo fanaˈoraa i te itoito?

¹⁷ Ua nehenehe Paulo e faaoromai tamau maoti to ˈna tiaturiraa. (A taio i te Korinetia 2, 4:16-18.) Ua papai o ˈna e “noa ˈtu te ruhiruhia noa ˈtu ra te taata i rapaeau,” eita o ˈna e vaiiho i te reira ia faatoaruaru ia ˈna. Ua tiatonu noa Paulo i nia i to ˈna tiaturiraa e ora e a muri noa ˈtu i te raˈi. E au te reira “i te hanahana mure ore o te haere noa ˈtu ra i te faahiahiaraa.” Te auraa, i te mea e ua faahiahia roa Paulo i teie tiaturiraa, ua ineine ïa o ˈna i te rave i te mau haapaeraa atoa no te fanaˈo i tera haamaitairaa. Ua feruriruri noa Paulo i nia i teie tiaturiraa, e i te pae hopea, ua parau oia: “Mea papu e te faaapî-noa-hia ra te taata i roto i tera e tera mahana.”

18. Mea nafea Toma e to ˈna utuafare i te itoitoraahia maoti te tiaturiraa?

¹⁸ Ua fanaˈo te taeae Toma no Bulgarie i te itoito maoti to ˈna tiaturiraa. A tau matahiti i teie nei, ua pohe to ˈna taeae Zdravko i roto i te hoê ati purumu. Mea maoro to Toma oto-noa-raa. No te faaitoito ia ratou, ua feruri o ˈna e to ˈna utuafare i nia i te tia-faahou-raa. Te faataa ra Toma: “Ua feruri matou i te vahi e farerei ai matou ia Zdravko, eaha te maa ta matou e faaineine na ˈna, o vai ta matou e titau manihini no te tamaa e i ta matou e faatia ˈtu no nia i te mau mahana hopea.” Ua parau atoa o ˈna e e tauturu rahi te reira  ia ˈna e to ˈna utuafare ia faaoromai tamau e tae roa ˈtu i te taime e faahoˈi mai ai Iehova i to ˈna taeae i te ora.

19. E nafea ia haapuai i to outou tiaturiraa? (A hiˈo atoa i te hohoˈa.)

¹⁹ E nafea ia haapuai i to outou tiaturiraa? Mai te peu e te tiaturi nei outou e ora e a muri noa ˈtu i nia i te fenua, a taio i te mau irava Bibilia o te faahiti ra i te huru oraraa i roto i te paradaiso e a feruriruri i nia i te reira. (Isa. 25:8; 32:16-18) A feruri na ia outou i roto i te ao apî. O vai ta outou e ite ra? Eaha te mea ta outou e faaroo ra? Eaha to outou huru i tera taime? No te haamataro atu â i to outou feruriraa, a hiˈo i te mau hohoˈa e faaite ra i te oraraa i roto i te paradaiso aore ra a mataitai i te mau himene video mai te himene rau Roto te ao apî, Tei mua noa ia oe aore ra A feruri i te tau a muri aˈe. Ia rave tatou i te taime no te feruriruri i nia i te ao apî, e mâmâ roa mai “te ati ta tatou e faaruru ra.” (Kor. 2, 4:17) Papu, e nehenehe Iehova e haapuai ia outou na roto i to outou tiaturiraa.

20. E nafea outou e itoitohia ˈi i te taime e paruparuhia ˈi outou?

²⁰ Noa ˈtu e paruparuhia tatou i te tahi taime, “e noaa ia [tatou] te puai i te Atua ra.” (Sal. 108:13) Ua rave aˈena Iehova i te faanahoraa ia fanaˈo tatou i te itoito. No reira, ia hinaaro outou i te tauturu no te amo i te hopoia, no te faaoromai tamau i te hoê fifi aore ra no te fanaˈo noa i te oaoa, a faafatata ˈtu ia Iehova na roto i te pure e a imi i ta ˈna aratairaa maoti ta outou iho haapiiraa. A farii i te faaitoitoraa no ǒ mai i te mau taeae e tuahine. A tiatonu noa i nia i to outou tiaturiraa. A na reira ˈi, e “faaetaetahia outou i te puai atoa ia au i te hanahana o to [te Atua] mana ia nehenehe outou ia faaruru maite na roto i te faaoromai e te oaoa.”—Kol. 1:11.