NOHEA mai te one? E rave rahi ravea hamaniraa one. E maere râ paha outou i te hiˈopoahia i roto i teie tumu parau. E faariro te uhu i te toˈa ta ˈna e amu ei one.

E ora te uhu i te mau vahi veavea na te ao. Ia amu oia i te toˈa, e tapea noa te uhu i te huˈa maa e vai ra i nia e te toea, e faariro ïa ei one a faarue atu ai te reira. Maoti to ˈna utu e to ˈna mau niho i muri e nehenehe ai oia e rave i tera ohipa. E nehenehe vetahi hohoˈa uhu e ora 20 matahiti te maoro ma te ore te mau niho e fati.

I te tahi mau vahi, e hamani atu â te uhu i te one i te tahi atu mau ravea hamaniraa one i roto i te natura ma te amu i te mau toˈa pohepohe. Ia au vetahi feia maimi, e au ra e nehenehe hoê uhu e hamani 100 kilo one i te matahiti.

E ohipa faufaa ê atoa ta te uhu e rave. Ma te amu rahi i te mau mea pohepohe i roto i te miti mai te mau rimu, te tamâ ra oia i te mau toˈa. Te ohipa taa ê râ a te uhu, o te atuaturaa ïa i te aˈau. I te mau vahi aita e uhu e te tahi atu e amu i te hoê â maa e o ˈna, e î oioi te aˈau i te rimu. Ia au i te faataaraa a te tahi buka, “te manaˈo ra vetahi, eita te mau aˈau e riro mai ta tatou e ite ra i teie nei ahiri aita te mau animara amu rimu.”—Reef Life.

E titauhia ia taoto maitai i te po no te rave i te ohipa i te ao, e ere anei? I roto atoa i tera tuhaa, mea faahiahia te uhu. Mea atâta roa te hiti aˈau i te po, e rave rahi hoi animara amu iˈa te haere na reira. E pinepine te uhu i te taoto i raro aˈe i te toˈa, e nehenehe noa râ te maˈo e haru atu.

E hamani ïa vetahi uhu i te tahi vehî no te paruru atoa ia ratou i te po. E faariro te uhu i te tahi vare ta ˈna e hamani ei vehî ite-ore-hia no ˈna. Te manaˈo ra te mau aivanaa no te miti, ua riro tera vehî ei ravea no te paruru ia ˈna. E faatupu hoi te reira i te tahi hauˈa ino o te faaatea ê i te mau animara e hinaaro e amu atu.

O te uhu te iˈa ite-roa ˈˈe-hia e te nehenehe i te pae aˈau. E pinepine, e rave rau û te itehia i nia i te otane e te ovahine e e taui noa te reira a rahi roa mai ai te iˈa. Hau roa ˈtu â, e rata roa te uhu i te mau vahi e ere i te mea taiˈa-roa-hia. Tei roto ïa oia i te mau iˈa mea ohie ia mataitai.

Ma te tapiri atu i te uhu, ma te mataitai e ma te faaroo ia ˈna ia faahuˈahuˈa i te toˈa, tera te tahi mea eita e moehia i te feia hiˈopoa i te aˈau. A faaiteite noa ˈi te uhu i to ˈna nehenehe, e haa atoa oia no to ˈna maitai, no te tahi atu e ora ra piri i te aˈau e no te au o te taata.