No te aha mea faufaa te tiaturiraa?

AHIRI Daniel i tapea noa i to ˈna feruriraa maitai, ua ora anei to ˈna maˈi? Eita te rahiraa e manaˈo roa mai te reira, eita hoi te maˈi e ora i te tiaturiraa!

I roto i te tahi uiuiraa manaˈo a te vea CBS News, ua faaite te taote Nathan Cherney mea atâta roa ia manaˈo e nehenehe te maˈi e ora i te tiaturiraa! Te na ô ra oia: “Ua ite matou i te tahi mau tane i te parauraa aita ta ratou vahine i tutava rahi no te faatupu i te feruriraa maitai i roto i te maˈi ta ratou i faaruru.” Te na ô faahou ra taote Cherney: “Mai te peu e e ferurihia mai tera, e nehenehe tatou e turai i te feia maˈi ia manaˈo e aita i navai ta ratou mau tutavaraa no te aro i to ratou mariri ai taata, e mea hape roa ia parau mai te reira!”

Ia faahiti tatou i te mau parau faahapa mai tera te huru, e teimaha roa ˈtu â te taata maˈi, e e ere roa ˈtu tera ta ˈna e hinaaro i roto i tera taime fifi mau! Te auraa anei mea faufaa ore te tiaturiraa?

Aita roa ˈtu! Te tiaturi nei te mau taote o te tamǎrû nei i te mauiui o te feia maˈi, mea faufaa te hoê feruriraa maitai no te taata maˈi e e nehenehe te tiaturiraa e tauturu ia faatupu i te hoê feruriraa maitai.

Te faufaaraa o te tiaturiraa

Ua hiˈopoa te taote Gifford-Jones e rave rau maimiraa e ua tapao oia e mea faufaa iho â te tiaturiraa no te feia i roto i te maˈi, e tauturu hoi te reira ia ratou ia faatupu i te hoê feruriraa maitai. Ua haapapu te tahi hiˈopoaraa i ravehia i 1989, e ora maoro aˈe te feia maˈi e tiaturiraa to ratou e eita atoa ratou e haapeapea aore ra e mauiui rahi roa ia faaauhia i te feia maˈi aita e tiaturiraa to ratou.

Ua ravehia te tahi atu hiˈopoaraa no te ite e ohipa anei to tatou feruriraa i nia i to tatou mafatu. Ua maitihia hau atu i te 1300 tane e ua hiˈopoahia mai te aha te huru to ratou feruriraa i te mau mahana atoa. Ua apeehia ratou ahuru matahiti te maoro e ua tapaohia e 156 o teie mau tane tei roohia i te maˈi mafatu. E i rotopu i na 156, mea rahi aˈe te tane e ere to ratou feruriraa i te mea maitai. Te parau ra Laura Kubzansky, te tahi orometua i te hoê haapiiraa teitei no nia i te ea: “Na mua ˈtu, na te taata noa i parau e mea maitai te hoê feruriraa maitai no to tatou ea, na roto râ i teie hiˈopoaraa, o te mau taote iho te haapapu ra mea maitai te reira no to tatou mafatu.”

Na roto i te tahi mau hiˈopoaraa, ua itehia e i muri aˈe i te hoê tâpûraa, e itoito oioi mai te feia i haapao i to ratou ea e ua faaite atoa mai te reira e nehenehe te taata e feruriraa maitai to ˈna e ora maoro aˈe. Ua ravehia te tahi hiˈopoaraa no te ite eaha te huru o te feia ruhiruhia ia faatupu ratou i te feruriraa maitai. Ua parauhia i te feia ruhiruhia e feia ratou o tei î i te paari e tei ite i te oraraa. Na roto noa i teie mau parau maitai, ua roaa roa ia ratou i te puai no te haere! Mea maitai aˈe ïa ahiri ratou i faaetaeta i to ratou tino e toru avaˈe te maoro!

No te aha to tatou ea e maitai ai i te tiaturiraa e te hoê feruriraa maitai? Eita te mau aivanaa e taote e nehenehe e pahono papu i tera uiraa no te mea aita ratou i taa maitai atura i te tereraa o te feruriraa e te tino o te hoê taata. Ia au râ i te mau hiˈopoaraa, ua nehenehe te tahi taote roro e parau: “Mea maitai ia oaoa e ia faatupu tatou i te tiaturiraa, mai tera anaˈe to tatou huru, eita ïa tatou e haapeapea hanoa e e oraora maitai to tatou tino! Tera te tahi mea o te tauturu i te taata ia haapao i to ratou ea!”

E ohipa apî paha ta te mau taote e aivanaa i haapii mai! Tera râ, ua aratai-ê-na-hia te arii Solomona a 3000 matahiti i teie nei ia papai i teie mau parau paari: “E maitai to te aau rearea mai te raau maˈi atoa ra; e mǎrô râ te ivi i te aau taiâ.” (Maseli 17:22) Aita te irava e parau ra e ora te maˈi i te aau rearea, aore ra oaoa. Tera râ, ua parauhia “mai te raau maˈi atoa ra” te reira.

Ua ite atura ïa te mau taote mea maitai te tiaturiraa e te hoê feruriraa maitai no to tatou ea! E ite atoa mai râ tatou e nehenehe to tatou oraraa taatoa e maitai mai i te tiaturiraa!

E maitaihia to oe oraraa taatoa!

Ua ite atoa mai te mau taote hiˈopoa ia faatupu tatou i te feruriraa maitai, e ere noa to tatou ea te maitai mai, ta tatou atoa râ ohipa i te fare haapiiraa, i te vahi raveraa ohipa e i roto atoa i te tuaro. Ua ravehia te tahi hiˈopoaraa i nia i te tahi mau maona vahine. Ua hiˈopoa te mau taata faaineine i te puai o teie mau maona na nia noa i te tupuraa o to ratou tino. I te tahi aˈe pae, ua hiˈopoa-atoa-hia mai te aha te huru feruriraa o teie mau maona, e mea maitai anei. Te mea i itehia, mea puai aˈe te mau maona o te faatupu nei i te hoê feruriraa maitai.

Mea rahi atoa ta tatou e haapii mai ia hiˈopoahia to tatou huru tei roto anaˈe tatou i te hoê tupuraa fifi. I te mau matahiti 1960, ua rave te mau aivanaa i te tahi mau tamatamataraa i nia i te animara e te taata. Te mea i itehia, e nehenehe atoa te taata e faatupu i te huru feruriraa, aita e faufaa ia imi i te ravea ia matara mai te hoê fifi. Ua faataˈihia te hoê maniania i te tahi pǔpǔ taata e ua parauhia ia ratou e nafea ia tupohe i tera maniania ma te taumi i nia iho i te tahi mau pitopito e ua roaa ia ratou i te na reira.

Area te piti o te pǔpǔ, hoê â tamatamataraa tei ravehia, aita râ i tia ia ratou ia taumi i nia i te mau pitopito. Eaha te tumu? E rave rahi o ratou tei faatupu i te manaˈo haaparuparu. Aita ratou i hinaaro e rave i te tahi noa ˈˈe ohipa, ua manaˈo hoi ratou mea faufaa ore ia na reira! Tera râ i roto i teie pǔpǔ, te vai ra vetahi tei faatupu i te feruriraa maitai e ua imi i te ravea ia matara te fifi.

Ua rave te taote Martin Seligman e rave rahi hiˈopoaraa no te taa i te tupuraa o te hoê taata e feruriraa maitai to ˈna e te hoê taata e ere to ˈna feruriraa i te mea maitai. Ua hiˈopoa maite oia eaha te turai i te taata ia faatupu i te manaˈo haaparuparu. Te mea ta ˈna i ite, te feia o te faatupu i te feruriraa haaparuparu, eita ratou e rave hope roa i te mau ohipa ta ratou i haamata, e i te tahi taime, e mau roa te reira. Teie atura ïa ta Seligman i parau: “Na roto i na 25 matahiti hiˈopoaraa, ua papu ia ˈu e ia faatupu pinepine tatou i te huru feruriraa o teie feia, ia roohia tatou i te ati, e manaˈo tatou no tatou te hape, eita te fifi e matara e e ino roa te mau mea atoa ta tatou e opua ra e rave. E rahi aˈe ïa te fifi i roto i to tatou oraraa i to te hoê taata tei ore i faatupu i te feruriraa haaparuparu!”

E ohipa maere paha teie no vetahi, no te feia râ e haapii nei i te Bibilia, e ere roa ˈtu ïa! A tapao na i teie parau paari: “Ia [‘paruparu oe,’ New World Translation] i te mahana e ati ai ra, te iti hua ra to oe itoito.” (Maseli 24:10) Te haapapu maitai ra te Bibilia ia toaruaru tatou, aita faahou to tatou e puai no te ohipa. E nafea râ ia faatupu i te hoê feruriraa maitai e ia oaoa i to tatou oraraa?

[Hoho‘a]

E maitai rahi te itehia ia faatupu tatou i te feruriraa maitai