Feruri na i teie tupuraa: I te po Mahana toru, ua faaoti Timona 17 matahiti i ta ˈna ohipa i te fare e te tamǎrû ra o ˈna ia ˈna i teie nei! E tuama o ˈna i te afata teata a parahi atu ai i mua.

Faura mai nei to ˈna papa i te pae opani e te mata tuˈatuˈa.

O oe aˈe o Timona, e nafea oe ia ore teie tatamaˈiraa e tupu?

E au te tauaparauraa i to oe na metua i te faahororaa i te pereoo. Mai te peu e ua tâpûhia te purumu i te hoê vahi, e paimi oe i te tahi atu purumu.

 EI HIˈORAA:

Ua parau te hoê tamahine o Leah te iˈoa: “Mea fifi no ˈu ia tauaparau e to ˈu papa. I te tahi taime, e paraparau noa vau ia ˈna e e pahono mai o ˈna, ‘O vau ta oe e paraparau ra?’”

E TORU RAVEA TA LEAH.

1. E tutuô i nia i to ˈna papa.

   E tutuô Leah: “Mea faufaa hoi ta ˈu e parau ra! Faaroo mai na!”

2. E faaea i te paraparau.

   Eita Leah e tamata faahou i te paraparau i to ˈna papa no nia i to ˈna fifi.

3. E tiai i te taime maitai aˈe no te paraparau.

   E paraparau Leah i to ˈna papa i te tahi atu taime aore ra e papai o ˈna i te hoê rata no te faaite ia ˈna i to ˈna fifi.

Eaha te ravea ta oe e faaitoito ia Leah ia maiti?

A FERURI NA: Vahi ê roa te feruriraa o te papa o Leah, aita ïa o ˈna e ite ra i to Leah inoino. Ia maiti Leah i te Ravea 1, eita to ˈna papa e taa no te aha o ˈna e tutuô ai. Eita paha teie ravea e turai i to ˈna papa ia faaroo atu â ia ˈna. E aita Leah e faatura ra i to ˈna papa. (Ephesia 6:2) Eita raua toopiti e faufaahia.

Mea ohie roa ia maiti i te Ravea 2, e ere râ i te haerea î i te paari. No te aha? No te faaafaro i to ˈna mau fifi, mea faufaa ia paraparau Leah i to ˈna papa. E no te tauturu ia Leah, e titauhia ia taa i to ˈna papa eaha te tupu ra. Eita e haere i mua ia mamû noa Leah.

Tera râ, maoti te Ravea 3, eita Leah e vaiiho i tera fifi ia tapea ia ˈna ia faaitoito i te paraparau i to ˈna papa. E na reira râ o ˈna i te tahi atu taime. E ia maiti o ˈna i te papai i te hoê rata i to ˈna papa, e maitai aˈe ïa Leah i tera iho â taime.

Maoti te hoê rata, e nehenehe atoa o ˈna e faaite maitai i ta ˈna e hinaaro ra e parau. A taio ai i te rata, e ite te papa o Leah i ta ˈna e tamata ra i te parau ia ˈna. E e taa ia ˈna i te mau fifi o ta ˈna tamahine. E faufaahia ïa Leah e to ˈna papa i te Ravea 3. Ma te paraparau atu aore ra ma te papai i te rata, e faaitoito te Ravea 3 ia pee i te faaueraa Bibilia ia titau i “te parau hau.”—Roma 14:19.

Eaha ˈtu â te ravea e vai ra ia Leah?

A feruri i te tahi ravea e a feruri i te faahopearaa e itehia.

A haamanaˈo e eita e tuati noa te mea ta oe i parau e te mea ta to oe na metua i manaˈo ua parau oe.

EI HIˈORAA:

E ani atu paha to oe na metua no te aha oe i riri ai. E parau oe: “Aita vau e hinaaro ra e paraparau no nia i te reira.”

E faaroo râ to oe na metua: “Aita vau e tiaturi ra ia orua. E faaite au i to ˈu fifi i to ˈu mau hoa, eiaha ia orua.”

A feruri na e te fifi ra oe e e hinaaro to oe na metua e tauturu atu. Tera râ, e parau oe: “Eiaha e haapeapea. Na ˈu iho â e faaafaro.”

• Eaha paha ta to oe na metua e faaroo?

• Eaha te mea au aˈe ia parau atu oe?