HAAPIIRAA 4
O vai Iesu Mesia?
1. Nohea mai Iesu?
No teihea mau huru maitatai i tapiri noa ˈtu ai te taata ia Iesu?—MATAIO 11:29; MAREKO 10:13-16.
E ere Iesu mai te tahi atu mau taata. I ora na oia i te raˈi ei melahi hou a fanauhia mai ai i te fenua. (Ioane 8:23) O ˈna ta te Atua i poiete na mua roa, e ua apiti oia i te poieteraa i te tahi atu mau mea atoa. Na Iehova iho i poiete ia ˈna i parauhia ˈi oia te Tamaiti “otahi” a te Atua. (Ioane 1:14) O ˈna atoa te Auvaha a te Atua, pii-atoa-hia oia “te Parau.”—A taio i te Maseli 8:22, 23, 30; Kolosa 1:15, 16.
2. No te aha Iesu i haere mai ai i te fenua?
Na te Atua i tono mai i ta ˈna Tamaiti mai te raˈi mai i te fenua. Ua tuu oia i to ˈna ora i roto i te opu o Maria, paretenia ati Iuda. E ere ïa to Iesu papa i te taata. (Luka 1:30-35) Ua haere mai oia i te fenua (1) no te haapii i te parau mau no nia i te Atua, (2) no te faaite e nafea ia rave i te hinaaro o te Atua noa ˈtu te fifi, e (3) no te horoa i to ˈna ora tia roa ei “hoo.”—A taio i te Mataio 20:28.
3. No te aha e hinaaro-mau-hia ˈi te hoo?
E aufauhia te hoê hoo no te faaora mai i te hoê taata i te utua pohe. (Exodo 21:29, 30) Aita te Atua i opua na ia ruau e ia pohe te taata. Ua parau hoi oia i te taata matamua ra o Adamu e e pohe oia ia rave oia i ta te Bibilia e parau ra te “hara.” Ahiri Adamu i ore i hara, e ore roa ˈtu oia e pohe. (Genese 2:16, 17; 5:5) Ia au i te Bibilia, no ˈna i “ô mai” ai te pohe i te ao nei. Ua raea to ˈna huaai i te hara e te pohe. E hinaaro mau â tatou i te hoo no te ora mai i te utua o te pohe.—A taio i te Roma 5:12; 6:23.
O vai tei riro ei hoo no te faaora ia tatou i te pohe? E utua te pohe no ta tatou hara. Aita e taata tia ore e nehenehe e horoa i te hoo no te hara a vetahi ê.—A taio i te Salamo 49:7-9.
4. No te aha Iesu i pohe ai?
E ere Iesu mai ia tatou, aita hoi ta ˈna e hara. Ua pohe oia no ta vetahi ê hara. E here rahi to te Atua i te huitaata i tono mai ai oia i ta ˈna Tamaiti ia pohe no tatou. Mea here atoa na Iesu ia tatou i auraro ai oia i to ˈna Metua, a horoa ˈi oia i to ˈna ora no ta tatou mau hara.—A taio i te Ioane 3:16; Roma 5:18, 19.
A hiˈo i te video No te aha Iesu i pohe ai?
5. Te aha nei Iesu?
I te fenua, i faaora na Iesu i te feia maˈi, i faatia mai na i tei pohe e i tamǎrû na i tei mauiui. Ua faaite ïa oia i ta ˈna e rave a muri aˈe no te feia auraro atoa. (Mataio 15:30, 31; Ioane 5:28) I muri aˈe i to Iesu poheraa, ua faahoˈi mai te Atua ia ˈna i te ora ei varua. (Petero 1, 3:18) Ua tiai atura Iesu i te rima atau o te Atua e tae atu i te taime i horoa ˈtu ai Iehova i te mana no te faatere ei Arii o te fenua taatoa. (Hebera 10:12, 13) Te arii nei ïa Iesu i te raˈi e te faaite haere nei ta ˈna mau pǐpǐ i tera parau apî oaoa e ati aˈe te ao nei.—A taio i te Daniela 7:13, 14; Mataio 24:14.
Ua fatata Iesu, ei Arii puai, i te faaore i te mauiui atoa e te haamou i te feia e faatupu ra i te reira. E oaoa te feia o te tiaturi ia ˈna ma te auraro atu, i te ora i roto i te paradaiso i te fenua.—A taio i te Salamo 37:9-11.
E au atoa outou . . .
TE PAHONO RA TE BIBILIA
No te aha Iesu i pohe ai?
Mea nafea to ˈna poheraa e hopoi mai i te mau haamaitairaa?
