Piri i te hoê matahiti to Ioane Bapetizo tapearaahia. Te faarooroo noa ra râ oia i te mau ohipa mana ta Iesu i rave. A feruri na i te huru aau o Ioane a faaite mai ai ta ˈna mau pǐpǐ e ua faatia mai Iesu i te tamaiti a te hoê vahine ivi i Naina. Ua hinaaro râ Ioane e faaroo i ta Iesu iho faataaraa i te auraa o taua mau ohipa atoa ra. Titau maira ïa Ioane e piti o ta ˈna mau pǐpǐ ia haere e ui ia Iesu: “O oe anei ta matou i tiai noa na, aore ra e taata ê te tae mai?”—Luka 7:19.

E uiraa maere anei te reira? E taata taiva ore o Ioane, e i to ˈna bapetizoraa ia Iesu e piti matahiti na mua ˈtu, ite atura oia i te varua o te Atua i te pouraa i nia ia Iesu, e faaroo ihora oia i te reo o te Atua tei mauruuru ia Iesu. Aita e tumu e manaˈo ai tatou e ua iti mai te faaroo o Ioane. Ahani te reira iho â, eita ïa Iesu e haapopou ia Ioane, mai ta ˈna i haapopou ia ˈna i reira. Aita Ioane i feaa, eaha râ oia i na reira ˈi i te ui ia Iesu?

Ua hinaaro noa paha Ioane i ta Iesu iho haapapuraa e o ˈna te Mesia, ia itoito mai oia a vai noa ˈi i roto i te fare tapearaa. E auraa ê atu to te uiraa a Ioane. Ua ite maitai oia i te mau parau tohu Bibilia e faaite ra e e riro tei Faatavaihia e te Atua ei Arii e ei Faaora. E rave rahi râ avaˈe i muri aˈe i te bapetizoraahia Iesu, tei te fare tapearaa Ioane. Te ui ra ïa Ioane e e taata ê anei te tae mai no te mono ia Iesu e na ˈna e faatupu roa i te mau parau tohu atoa no nia i te Mesia.

Aita Iesu i parau i na pǐpǐ a Ioane, ‘E, o vau te taata o te tae mai,’ ua horoa râ oia i te haapapuraa e te turu mai ra te Atua ia ˈna ma te faaora i te mau huru maˈi atoa o te taata e rave rahi. Parau atura oia i na pǐpǐ a Ioane: “A haere e faatia ia Ioane i ta orua e faaroo e e ite nei: Te ite faahou nei te matapo, te haere nei te piriˈoˈi, ua ora te lepera e te faaroo nei te tariˈa turi, ua tia faahou mai tei pohe e te faaitehia nei te parau apî oaoa i te feia veve.”—Mataio 11:4, 5.

I roto i ta ˈna uiraa, ua manaˈo atoa paha Ioane e e rave Iesu hau aˈe i ta ˈna e rave ra, e e tuu mai oia ia ˈna i rapae i te fare tapearaa. Ua parau râ Iesu ia Ioane e eiaha e tiai ia rave oia hau aˈe i te mau semeio ta ˈna e rave ra.

I te revaraa na pǐpǐ a Ioane, haapapu atura Iesu i te nahoa e e rahi aˈe Ioane i te hoê peropheta. O “te vea” a Iehova oia, tei tohuhia i roto i te Malaki 3:1. O te peropheta Elia atoa oia, mai tei tohuhia i roto i te Malaki 4:5, 6. Faataa ˈtura Iesu: “Oia mau ta ˈu e parau atu: I rotopu i tei fanauhia mai e te vahine, aita hoê i rahi aˈe ia Ioane Bapetizo, area tei haihai aˈe i roto i te Faatereraa arii o te raˈi, mea rahi aˈe ïa ia ˈna.”—Mataio 11:11.

Ia Iesu i parau e tei haihai aˈe i roto i te Faatereraa arii o te raˈi, mea rahi aˈe ïa ia Ioane, te faaite ra oia e eita Ioane e ô i roto i te Faatereraa arii i te raˈi. Ua faaineine Ioane i te eˈa no Iesu, ua pohe râ oia na mua ˈˈe te Mesia a iriti ai i te ravea e tae atu ai i te raˈi. (Hebera 10:19, 20) E peropheta haapao maitai râ a te Atua o Ioane, e e riro oia ei tino huiraatira i te fenua nei no te Faatereraa arii a te Atua.