Mea rahi te ohipa ta Iesu i rave i taua mahana ra. I to ˈna taeraa mai na Dekapoli mai, ua ora ia ˈna te tapahi o te hoê vahine e ua faatia mai oia i te tamahine a Iaeiro. Aita â râ i oti atura. A faarue ai Iesu i te fare o Iaeiro, pee maira e piti matapo ia ˈna, a pii noa ˈi: “Aroha mai ia mâua, Tamaiti a Davida.”—Mataio 9:27.

I to raua piiraa ia Iesu “Tamaiti a Davida,” te faaite ra raua i to raua tiaturi e o Iesu te fatu i te terono o Davida e o ˈna te Mesia. E au ra e aita Iesu i tâuˈa ˈtu, no te hiˈo paha e e onoono anei raua. Ta raua iho â i rave. A tomo ai Iesu i roto i te tahi fare, tomo atoa maira raua. Ui atura Iesu: “Tiaturi anei orua e e araara to orua mata ia ˈu?” Pahono maira raua ma te tiaturi papu: “E, e te Fatu.” Tapea ihora Iesu i to raua mata e parau atura: “Mai ta orua i tiaturi, ia tupu ïa.”—Mataio 9:28, 29.

I reira iho, araara aˈera to raua mata! Faaue atura Iesu eiaha e faaite i ta ˈna i rave, mai ta ˈna i na reira na. No to raua râ oaoa rahi, paraparau haere aˈera raua no Iesu i muri iho.

Te haere atu ra teie nau tane, i arataihia mai ai te hoê tane tei vavahia no te mea ua uruhia oia e te demoni. Tiavaru ihora Iesu i te demoni, e paraparau ihora taua tane ra. Maere roa ihora te nahoa, a na ô ai: “Aita teie huru ohipa i tupu aˈenei i Iseraela.” E Pharisea atoa to reira. Eita ta ratou e nehenehe e parau e aita te semeio i tupu. Faahapa faahou maira ïa ratou ia Iesu no nia i te tumu o ta ˈna mau ohipa: “I te mana hoi o te raatira o te mau demoni e tiavaru ai oia i te mau demoni.”—Mataio 9:33, 34.

I muri iho, hoˈi atura Iesu i to ˈna oire o Nazareta, apeehia e ta ˈna mau pǐpǐ. Piri i te hoê matahiti na mua ˈtu, i haapii na oia i to reira mau taata i roto i te sunago. I maere na te taata i ta ˈna mau haapiiraa, i muri iho râ, ua inoino ïa e ua imi i te haapohe ia ˈna. I to ˈna hoˈiraa ˈtu, tamata faahou atura Iesu i te tauturu i te feia o to ˈna oire.

I te Sabati, hoˈi atura oia i te sunago no te haapii i te taata. Mea rahi tei maere, a ui atoa ˈi: “Nohea mai te paari o teie taata e to ˈna puai no te faatupu i teie mau ohipa mana? E ere anei teie i te tamaiti a te tamuta? E ere anei o Maria te iˈoa o to ˈna metua vahine, e o Iakobo, Iosepha, Simona e Iuda to ˈna mau taeae? E ere anei e tei ǒ tatou nei atoa to ˈna mau tuahine? Nohea mai ïa te paari o teie taata e to ˈna puai no te faatupu i teie mau ohipa mana?”—Mataio 13:54-56.

No ratou, e tane noa Iesu no Nazareta, a manaˈo ai, ‘Ua ite matou ia ˈna i te paariraa mai, e nafea ïa o ˈna te Mesia?’ Faahapa maira ïa ratou ia ˈna noa ˈtu te mau haapapuraa atoa e vai ra, e te paari rahi o Iesu e ta ˈna mau ohipa mana. To ˈna atoa utuafare, tei matau maitai hoi ia ˈna, aita i tiaturi ia ˈna, a parau roa ˈtu ai Iesu: “E faaturahia te hoê peropheta i te mau vahi atoa, area i to ˈna iho fenua e i roto i to ˈna iho utuafare, eita ïa.”—Mataio 13:57.

Maere roa ihora Iesu i to ratou ereraa i te faaroo. Aita ˈtura oia i faatupu i te semeio i reira, maori râ te tuuraa i to ˈna rima i nia vetahi feia maˈi e te faaoraraa i to ratou maˈi.—Mareko 6:5, 6.