E maha pǐpǐ ta Iesu i titau ia riro ei ravaai taata, o Petero, Anederea, Iakobo e Ioane. I te hoê Sabati, haere atura ratou pauroa i te hoê sunago no Kaperenaumi. Haapii ihora Iesu i te taata i te sunago, e maere faahou ihora ratou i ta ˈna huru haapiiraa mai te hoê taata e mana to ˈna no ǒ mai i te Atua, eiaha râ mai te mau papai parau.

I taua Sabati ra, e tane uruhia e te demoni atoa tei te sunago. I reira mau, tuô maira taua tane ra: “Eaha ta oe ohipa i ǒ nei, Iesu no Nazareta? Haere mai oe e haamou ia matou? Ua ite maitai au o vai oe, te tavini Moˈa a te Atua!” Tamaˈi atura Iesu i te demoni i uruhia ˈi te tane: “Mamû, haere i rapae ia ˈna!”—Mareko 1:24, 25.

Taora ihora te varua ino i te tane i raro, a iriti atu ai e a tuô noa ˈi taua tane ra. Haere maira râ te demoni i rapae i te tane “ma te ore e rave ino ia ˈna.” (Luka 4:35) Maere ihora te feia ati aˈe ia ˈna i te sunago! “Eaha teie?” ta ratou ïa i ui. “E mana to ˈna e tiavaru atoa i te mau varua viivii e e faaroo ratou ia ˈna.” (Mareko 1:27) Papu, ua atutu te parau o teie ohipa maere mau ati aˈe Galilea.

A faarue ai Iesu e ta ˈna mau pǐpǐ i te sunago, haere atura ratou i ǒ Simona, pii-atoa-hia Petero. E fiva rahi to te metua vahine hoovai o Petero. Taparu maira ratou ia Iesu ia faaora i to ˈna maˈi. Tapiri atura Iesu, e faatia aˈera ia ˈna i nia ma te tapea i to ˈna rima. Ora ihora to ˈna maˈi e faaineine maira oia i te maa na Iesu e ta ˈna mau pǐpǐ.

E ahiahi ihora. Aratai maira te taata na pihai iho mai i to ratou feia maˈi i ǒ Petero. Aita i maoro, e au ra e to te oire taatoa tei ruru i mua i te opani. No te aha? Te imi ra ratou ia ora taua mau maˈi ra. Inaha, “arataihia maira te taata ua rau to ratou maˈi ia Iesu ra. Faaora ihora oia i to ratou maˈi ma te tuu i to ˈna rima i nia iho ia ratou tataitahi.” (Luka 4:40) Ua faaora Iesu i te mau huru maˈi atoa mai tei tohuhia. (Isaia 53:4) Ua tauturu atoa oia i te feia i uruhia ma te tiavaru i te mau demoni i rapae. A haere ai te mau varua ino i rapae, e tuô ratou: “O te Tamaiti a te Atua oe.” (Luka 4:41) Tamaˈi atura râ Iesu ia ratou e faaue atura ia mamû. Ua ite ratou e o Iesu te Mesia, e aita oia e hinaaro ra ia manaˈohia e te tavini atoa ra ratou i te Atua mau.