Parau atura Pilato i te nahoa e hinaaro ra ia pohe Iesu: “Aita . . . i itehia e au te tahi tumu e pari ai outou i teie taata. Aita atoa i itehia e Heroda.” (Luka 23:14, 15) Ia tuuhia râ Iesu, tamata ˈtura Pilato i te tahi atu ravea a parau ai i te nunaa: “E peu matauhia atoa i ǒ outou ia tuu atu vau i te hoê taata tapeahia i te Pasa. Hinaaro outou ia tuu atu vau i to outou Arii?”—Ioane 18:39.

Ua ite Pilato e ua tapeahia Baraba, tei matauhia ei eiâ, orure hau e taparahi taata. Ui atura ïa Pilato: “O vai ta outou e hinaaro ia tuu atu vau, o Baraba aore ra o Iesu tei parauhia te Mesia?” Ani atura te nunaa, tei turaihia e te mau tahuˈa tiaau, ia tuuhia mai Baraba, eiaha râ Iesu. Ui faahou atura Pilato: “O vai o raua ta outou e hinaaro ia tuu atu vau?” Tuô maira te nahoa: “O Baraba.”—Mataio 27:17, 21.

Aita ˈtura Pilato i taa faahou e nafea, ui atura oia: “E nafea ïa vau ia Iesu tei parauhia te Mesia?” Tuô maira te nahoa: “I nia i te pou!” (Mataio 27:22) Auê te haama e! Te titau ra ratou ia pohe te hoê taata aita ta ˈna e hara. Taparu atura Pilato: “No te aha hoi? Eaha te ohipa ino ta teie taata i rave? Aita vau i ite i te tahi mea e tano ai ia pohe oia. E hui ïa vau ia ˈna, a tuu atu ai ia ˈna.”—Luka 23:22.

Noa ˈtu ua onoono Pilato, tuô maira ma te reo hoê te nahoa tei hae roa: “I nia i te pou!” (Mataio 27:23) Ua tae roa te nahoa tei patiatiahia e te mau aratai haapaoraa i te titauraa i te toto! Eiaha râ te toto o te hoê taata ohipa ino, to te hoê râ taata hara ore ta te nahoa i maeva ei arii i Ierusalema a pae mahana na mua ˈtu. Mai te peu e tei reira te mau pǐpǐ a Iesu, ua mamû noa ratou e aita i faaite aˈe ia ratou.

Ite ihora Pilato e aita ta ˈna e ravea e te haamata ra te taata i te faahuehue, rave ihora oia i te pape e horoi atura i to ˈna rima i mua i te nahoa a na ô ai: “Aita ta ˈu e hara i te toto o teie taata. Tei ia outou ra.” Aita atoa te reira i tapea aˈe i te nahoa. Parau maira ratou: “Ia hoˈi mai to ˈna toto i nia ia matou e i nia i ta matou mau tamarii.”—Mataio 27:24, 25.

Mea puai aˈe to te tavana hinaaro ia mâha te riri o te nahoa, i te raveraa i ta ˈna i ite e mea tia. Faatia ihora Pilato i ta ratou e ani ra a tuu mai ai ia Baraba. Faaue atura oia ia tatarahia to Iesu ahu e ia huihia oia.

I muri iho i to ˈna huiraahia, aratai atura te mau faehau ia Iesu i roto i te aorai o te tavana. Ruru maira ratou e hamani ino atu â maira ia ˈna. Firi atura ratou i te hoê hei taratara no te faahaama ia ˈna e taumi ihora i nia i to ˈna upoo.  Tuu atoa maira ratou i te hoê aeho i roto i te rima atau o Iesu e faaahu maira ia ˈna i te hoê ahu vareau mai to te arii. Parau faaooo maira ratou: “Ia ora na te Arii o te ati Iuda!” (Mataio 27:28, 29) Tutuha atoa aˈera ratou i nia ia Iesu e poara maira ia ˈna. Rave atura ratou i te aeho etaeta i roto i to Iesu rima e tairi maira i to ˈna upoo, a hohonu roa ˈtu ai to ˈna mau puta no te “hei” taratara.

Ua faahiahia roa Pilato ia Iesu tei faaite noa i te itoito e te tura noa ˈtu ta ˈna i faaruru. Parau atura Pilato no te faaite e aita ta ˈna i roto i teie ohipa: “Te aratai mai nei au ia ˈna i rapae ia outou ra ia ite outou e aita e tumu e faautua ˈi au ia ˈna.” Ua manaˈo anei Pilato e mǎrû mai te nahoa ia aratai mai oia ia Iesu tei pepe maitai i mua ia ratou? A tia ˈi Iesu i mua i te nahoa aroha ore, parau atura Pilato: “Teie taua taata ra!”—Ioane 19:4, 5.

Noa ˈtu e ua huihia e ua pepe roa ino Iesu, ua vai hau oia e te tura noa. Ta te mau parau ïa a Pilato e faaite ra, oia hoi to ˈna aroha e to ˈna faatura ia Iesu.