Tae aˈera Iesu e te tahi atu mau ratere i Ieriko, hoê mahana na raro na Ierusalema mai. E piti oire Ieriko, 1,6 kilometera te atea te oire tahito i te oire Roma apî. A haere ai Iesu e te nahoa i rapae i Ieriko e a piri atu ai i te tahi atu Ieriko, faaroo aˈera e piti matapo e taparu haere ra i te maniania. O Baretimaio hoê o raua.

I to Baretimaio e to ˈna hoa faarooraa e te haere mai ra Iesu, pii maira raua: “E te Fatu, aroha mai ia mâua, Tamaiti a Davida!” (Mataio 20:30) Faaue aˈera vetahi o te nahoa ia raua ia mamû, ua puai atu â râ raua i te tuôraa. Tia noa ihora Iesu tei faaroo i te maniania. Parau atura oia i te feia e na muri mai ra ia ˈna ia pii i na taata e tutuô ra. Haere maira ratou i na matapo ra e na ô maira i te hoê o raua: “A faaitoito! A tia mai, te pii mai ra oia ia oe.” (Mareko 10:49) Faarue ihora te taata matapo i to ˈna ahu tapoˈi, tia taue maira e haere maira ia Iesu ra.

Ui atura Iesu: “Eaha ta orua e hinaaro ia rave au no orua?” Taparu maira na matapo: “E te Fatu, ia araara to mâua mata.” (Mataio 20:32, 33) No to ˈna aroha, tapea ihora Iesu i to raua mata, e na ô atura i te hoê iho â râ o raua: “A haere. No to oe faaroo i ora ˈi oe.” (Mareko 10:52) Te ite ra na taata taparu, e papu roa e ua faahanahana raua i te Atua. Arue atoa aˈera te taata tei ite i te ohipa i tupu i te Atua. Pee maira teie na taata ua araara te mata ia Iesu.

Mea rahi te taata ati aˈe ia Iesu a na roto atu ai oia i Ieriko. Te hinaaro ra ratou pauroa e ite i te taata tei faaaraara i te mata o na matapo. No te mea ua piri roa mai te taata ia Iesu, aita vetahi i nehenehe e ite ia ˈna, mai ia Zakaio raatira titau tute i Ieriko e na pihai iho mai. No to ˈna poto, eita ta ˈna e nehenehe e ite eaha teie. Horo atura oia na mua e tauma aˈera i nia i te hoê tumu suke (aore ra sukamino) i te pae purumu e na reira mai Iesu. Mai reira mai, e ite maitai ïa Zakaio. A fatata ˈtu ai Iesu e a ite ai ia Zakaio i nia i te tumu suke, parau atura oia: “Zakaio, haaviti, pou mai, e parahi hoi au i ǒ oe i teie mahana.” (Luka 19:5) Pou maira Zakaio e haaviti ihora i te haere e faaineine i te maa no ta ˈna ratere taa ê mau.

I to te taata iteraa i te reira, ohumu aˈera ratou. Eita e tano ia haere Iesu i te fare o te hoê taata rave hara i to ratou manaˈo. I taviri na hoi Zakaio i te moni ia titau oia i te tute. Mea na reira i rahi ai ta ˈna taoˈa.

A tomo ai Iesu i roto i te fare o Zakaio, ohumu aˈera te taata: “Ua tomo oia i roto i te fare o te hoê taata hara.” Ua ite râ Iesu e e nehenehe Zakaio e tatarahapa. Aita oia i hape. Tia maira Zakaio e na ô maira: “E te Fatu, te horoa nei au i te afaraa o ta ˈu mau faufaa na te feia veve, e  te taata ta ˈu i taviri, e tataimaha ïa ta ˈu e faahoˈi na ˈna.”—Luka 19:7, 8.

Tera te tatarahapa mau! E nehenehe ta Zakaio e numera ia au i te parau peeraa tute ehia ta te ati Iuda i aufau, e ua horeo oia e e tataimaha ta ˈna e faahoˈi. (Exodo 22:1; Levitiko 6:2-5) Ua fafau atoa oia e horoa i te afaraa o ta ˈna mau faufaa na te feia veve.

Oaoa ihora Iesu no teie haapapuraa o to Zakaio tatarahapa e na ô atura: “I teie mahana ua faaora te Atua i teie taata e to ˈna utuafare, no te mea e tamaiti atoa oia na Aberahama. Ua haere mai hoi te Tamaiti a te taata nei e imi e e faaora i tei moˈe.”—Luka 19:9, 10.

Ua faataa aˈenei Iesu i te huru tupuraa o tei “moˈe” i roto i ta ˈna faahohoˈaraa o te tamaiti tei moˈe na. (Luka 15:11-24) Horoa ˈtura oia i te hiˈoraa o te hoê taata tei moˈe ei auraa parau, tei itehia mai râ. Ua ohumu te mau aratai haapaoraa e to ratou mau taata ia Iesu e ua faaino ia ˈna no te haapaoraa i te feia mai ia Zakaio. Ua tamau noa râ Iesu i te imi e te faahoˈi mai i teie mau tamaiti i moˈe a Aberahama.