I te tau paˈurâ, ua parau Iehova ia Elia: ‘A haere i Zarephate. I ǒ, na te hoê vahine ivi e horoa i te maa na oe.’ I te mau uputa o te oire, ua ite Elia i te hoê vahine ivi veve o te haaputuputu ra i te raau. Ua ani oia ia ˈna i te hoê hapaina pape. A haere ai tera vahine e tii i te pape, ua parau atu Elia ia ˈna: ‘A afai atoa mai na i te tahi faraoa.’ Ua pahono râ te vahine ivi: ‘Aita roa ˈtu ta ˈu e faraoa. Te vai noa râ maa hinu e faraoa ota no te hamani i te hoê maa iti na ta ˈu tamaiti e na ˈu.’ Ua parau atura Elia ia ˈna: ‘Ua fafau Iehova e ia hamani mai oe maa faraoa na ˈu, eita ta oe faraoa ota e ta oe hinu e pau tae roa ˈtu i te taime e ûa faahou mai.’

Ua haere atura te vahine ivi i to ˈna fare e ua hamani oia i te faraoa na te peropheta a Iehova. Mai ta Iehova i fafau, aita te maa a te vahine ivi e a ta ˈna tamaiti i pau i te roaraa o te tau paˈurâ. Ua î noa ta ˈna mau farii i te faraoa ota e te hinu.

I muri iho, ua tupu te hoê ohipa peapea mau. Ua maˈihia te tamaroa a te vahine ivi e ua pohe oia. Ua taparu oia i te  tauturu a Elia. Tei te rima o te vahine ivi te tamaroa. Ua rave atura Elia i te tamaroa e ua amo oia ia ˈna i te hoê piha i te tahua o te fare. Ua tuu Elia i te tamaroa i nia i te hoê roˈi e ua pure oia: ‘E Iehova e, a faatia mai na i tera tamaroa i te ora.’ Ua ite anei oe no te aha e mea maere mau tera aniraa ia Iehova? No te mea, a tahi ra e faatiahia mai te hoê taata i te ora. E ere atoa te vahine ivi e ta ˈna tamaiti i te Iseraela.

Ua faatiahia mai râ te tamaroa i te ora e ua haamata oia i te huti i te aho! Ua parau Elia i te vahine ivi: ‘A hiˈo na! Ua ora mai ta oe tamaiti.’ Ua oaoa roa te vahine e ua parau oia ia Elia: ‘Papu maitai e taata oe no te Atua. Ua ite au i te reira no te mea e parau noa oe i ta Iehova e faaite ia oe.’