I to Saula poheraa, ua riro Davida ei arii. E 30 matahiti ïa to ˈna. Ua faatere Davida ei arii a tau matahiti i teie nei. I te hoê râ po, mai te niaraa o to ˈna aorai, ua ite Davida i te hoê vahine nehenehe mau. Ua ite ia Davida e o Bate-seba to ˈna iˈoa e ua faaipoipo oia i te hoê faehau, o Uria to ˈna iˈoa. Ua titau Davida ia Bate-seba i to ˈna aorai. Ua taoto raua e ua hapû mai Bate-seba. Ua tamata Davida i te huna i ta ˈna i rave. Ua parau oia i ta ˈna tenerara ia tuu ia Uria i mua roa a aro ai te nuu e ia faarue te mau faehau ia ˈna. Ua pohe Uria i roto i te tamaˈi e ua faaipoipo Davida ia Bate-seba.

Tera râ, ua ite Iehova i te mau ohipa ino atoa tei tupu. Eaha ta ˈna i rave? Ua tono Iehova i ta ˈna peropheta o Natana no te farerei ia Davida. Ua parau Natana: ‘E rave rahi mamoe ta te hoê taata taoˈa rahi e e hoê anaˈe pinia mamoe ta te hoê taata veve. Ua here roa tera taata veve i ta ˈna pinia mamoe. Ua rave râ te taata taoˈa rahi i te pinia mamoe a te taata veve.’ Ua riri atura Davida e ua parau atu: ‘Ia haapohehia tera taata taoˈa rahi!’ Ua na ô atura Natana ia Davida: ‘O oe tera taata taoˈa rahi!’ Ua mauiui roa Davida e ua parau oia ia Natana: ‘Ua hara vau i mua ia Iehova.’ No tera hara, e rave rahi fifi ta Davida e to ˈna utuafare i faaruru. Ua faautua Iehova ia Davida. Tera râ, ua farii Iehova ia ora Davida no te mea e taata haavare ore o ˈna e te haehaa.

Ua hinaaro Davida e patu i te hoê hiero no Iehova. Ua maiti râ Iehova ia Solomona, te tamaiti a Davida, no te patu i te hiero. Ua haamata Davida i te faanaho i te mau ohipa no Solomona e ua parau atu: ‘E mea tia ia patu  i te hoê hiero nehenehe mau no Iehova. Mea apî noâ o Solomona. E tauturu râ vau ia ˈna ia faanaho i te mau ohipa.’ Ua horoa Davida e rave rahi o ta ˈna moni no te ohipa paturaa. Ua noaa ia ˈna i te feia rave ohipa aravihi. Ua haaputu oia i te auro e te ario e ua noaa ia ˈna i te arezi no ǒ mai i te fenua Turia e Sidona. I te hopearaa o to ˈna oraraa, ua horoa Davida ia Solomona i te mau hohoˈa no te patu i te hiero. Ua parau oia: ‘Ua hinaaro Iehova ia papai au i te reira na oe. E tauturu Iehova ia oe. Eiaha e mǎtaˈu. A faaitoito e a rohi.’