Ahuru mahana i muri aˈe i to Iesu hoˈiraa i nia i te raˈi, ua fanaˈo ta ˈna mau pǐpǐ i te varua moˈa. Ua tupu te reira i te Penetekose 33. E rave rahi taata no te mau fenua ěê tei haere i Ierusalema no te faatupu i te Penetekose. I te piha i nia o te hoê fare, ua putuputu mai 120 pǐpǐ a Iesu. Ua tupu taue mai te hoê ohipa maere mau. Ua fa mai te tahi mea e au i te auahi i nia i te upoo o te pǐpǐ taitahi e ua haamata ˈtura ratou pauroa i te paraparau na roto i te mau reo ěê. Ua faaroohia te hoê haruru puai mai te hoê vero ra te huru i roto i te fare taatoa.

Ua faaroo atoa te feia no te mau fenua ěê tei haere i Ierusalema i tera haruru e ua horo ratou i roto i te fare no te ite eaha tei tupu. Ua maere roa ratou a faaroo ai i te mau pǐpǐ tei paraparau na roto i tera mau reo. Ua na ô ratou: ‘No Galilea tera mau taata. No te aha ïa ratou e nehenehe ai e paraparau na roto i to matou mau reo?’

I muri iho, ua tia o Petero e te tahi atu mau aposetolo i mua i te nahoa. Ua parau Petero ia ratou e nafea Iesu i haapohehia ˈi e ua  faaora Iehova ia ˈna mai te pohe mai. Ua na ô Petero: ‘I teie nei, tei te raˈi o Iesu i te pae atau o te Atua e ua ninii mai oia i te varua moˈa ta ˈna i fafau. No reira outou i ite ai i teie mau semeio.’

Ua putapû roa te aau o te feia tei faaroo i ta Petero mau parau e ua ani atura ratou: “Eaha ïa ta matou e rave?” Ua pahono atura oia: ‘A tatarahapa mai e ia bapetizohia outou i te iˈoa o Iesu. E fanaˈo atoa outou i te varua moˈa.’ I tera mahana, ua bapetizohia e 3 000 taata. Mai reira mai, ua haamata te mau pǐpǐ i te rahi taue mai i Ierusalema. Maoti te varua moˈa, ua haamau te mau aposetolo e rave rahi atu â amuiraa ia nehenehe ratou e haapii atu i te mau pǐpǐ no nia i te mau mea atoa ta Iesu i faaue ia ratou.