1-3. Eaha te tupu ia faaite tatou i te here mai ia Iehova?

 “E RAHI aˈe te oaoa ia horoa ˈtu ia horoahia mai.” (Ohipa 20:35) Te haapapu ra te mau parau a Iesu i teie parau mau faufaa: Mea maitai aˈe te here haavare ore. E oaoa tatou ia horoahia mai, e oaoa roa ˈtu râ tatou ia horoa ˈtu, aore ra ia faaite atu, i te here ia vetahi ê.

² Ua ite mau to tatou Metua i te raˈi i te reira. Mai ta tatou i ite mai i roto i te mau pene na mua ˈtu, e here Iehova. Tae roa mai i teie mahana, aita ˈtu mai ia ˈna o tei faaite i te here mau. E ere ïa i te mea maere ia parauhia o Iehova “te Atua oaoa.”​—Timoteo 1, 1:11.

³ Te hinaaro ra to tatou Atua î i te here ia pee tatou i to ˈna hiˈoraa, ia faaite iho â râ tatou i te here. Te parau mai ra te Ephesia 5:1, 2: “A pee i te haerea o te Atua mai te tamarii herehia. E ei haerea here noa to outou.” A na reira ˈi, e oaoa rahi aˈe ta tatou e fanaˈo. Hau atu â, e faaoaoa tatou ia Iehova. Te faaitoito mai ra hoi ta ˈna Parau “ia here . . . te tahi i te tahi.” (Roma 13:8) Te vai ra ˈtu â râ te tumu e titauhia ˈi ia tatou ia haapao i tera aˈoraa.

4, 5. No te aha mea faufaa ia here i to tatou mau taeae e tuahine i roto i te faaroo?

⁴ No te aha mea faufaa ia here i to tatou mau taeae e tuahine i roto i te faaroo? No te mea tera te tapao o te Kerisetiano mau. Mai te peu eita tatou e faaite i te here, eita tatou e piri i to tatou mau taeae e tuahine, e hau roa ˈtu â, ia Iehova. E hiˈo anaˈe mea nafea te Parau a te Atua ia haapapu i te reira.

 ⁵ I te po hopea o to ˈna oraraa i te fenua nei, ua parau Iesu i ta ˈna mau pǐpǐ: “E faaueraa apî ta ˈu e horoa ˈtu nei, ia here outou te tahi i te tahi. Mai ia ˈu i here ia outou, ia here atoa outou te tahi i te tahi. I te mea e mea here outou te tahi i te tahi, e ite ïa te taata atoa e e pǐpǐ outou na ˈu.” (Ioane 13:34, 35) Ma te parau “mai ia ˈu i here ia outou,” te faaue ra Iesu ia tatou ia here ia vetahi ê mai ta ˈna i rave. I roto i te pene 29, ua hiˈopoa tatou, ua haapae Iesu ia ˈna iho no to ˈna here ia vetahi ê. E titau-atoa-hia ia faaite tatou i tera huru here, e a na reira ˈi e ite roa te taata o te ore e haamori ra ia Iehova te here ra tatou te tahi i te tahi. Oia mau, ma te faaite i te here mai ia Iesu, e haapapu tatou e pǐpǐ mau tatou na te Mesia.

6, 7. (1) E nafea tatou e ite ai mea faufaa no Iehova ia faaite tatou i te here? (2) I roto i te Korinetia 1, 13:4-8, eaha te here ta Paulo i faataa?

⁶ Eaha te huru aita anaˈe e here? Ua parau te aposetolo Paulo: “Aita . . . to ˈu e here, ua riro ïa vau mai te maniania o te punu e atete ra.” (Korinetia 1, 13:1) Auê ïa faahohoˈaraa tano mau! E au te hoê taata aita to ˈna e here i te taˈi ahoahoa eita oe e anaanatae atu! Mea fifi roa no taua huru taata ra ia faahoa ia vetahi ê. Ua parau atoa Paulo: “Ia puai noa ˈtu â to ˈu faaroo a hopoi ê atu ai i te mau mouˈa, aita râ to ˈu e here, mea faufaa ore anaˈe ïa ta ˈu e rave.” (Korinetia 1, 13:2) Te taata o te ore e faaite i te here, eita Iehova e faaohipa ia ˈna noa ˈtu mea rahi te ohipa maitai ta ˈna e nehenehe e rave! Mea papu, te haapii mai ra te Bibilia mea faufaa no Iehova ia faaite tatou i te here.

⁷ E nafea râ tatou e faaite ai i te here i nia ia vetahi ê? No te pahono, e hiˈopoa anaˈe i te mau parau a Paulo i roto i te Korinetia 1, 13:4-8. I roto i teie mau irava, aita e parauhia ra no nia i to Iehova here ia tatou aore ra to tatou here ia ˈna. Ua faataa râ Paulo i te here e titauhia ia tatou  ia faaite i nia i te tahi e te tahi. Ua faahiti oia eaha ta te here e turai ia tatou ia rave e ia ore e rave.

8. Eaha te faufaaraa o te faaoromai i roto i te amuiraa?

⁸ “E faaoromai . . . te here.” No te faaite i te here, e titauhia ia faaoromai i te tahi e te tahi. (Kolosa 3:13) E hinaaro iho â tatou i taua huru faaoromai ra. Noa ˈtu e tavini tatou na Iehova, e feia tia ore tatou paatoa e e nehenehe iho â tatou aore ra to tatou mau taeae e tuahine e au ore i te peu aore ra i te huru o te tahi e te tahi. Ia faaoromai râ tatou i te tahi e te tahi, eita tatou e vaiiho i te mau paruparu e te mau hapa rii a te tahi ia faaamahamaha i te amuiraa.

9. E nafea tatou ia hamani maitai ia vetahi ê?

⁹ “E hamani maitai te here.” E hamani maitai tatou ia  vetahi ê na roto i ta tatou mau ohipa e parau. No to tatou here, e imi tatou i te ravea no te hamani maitai ia vetahi ê, i te feia iho â râ i roto i te fifi. Ei hiˈoraa, te moˈemoˈe ra paha te hoê taeae aore ra tuahine ruhiruhia, e hinaaro paha ïa o ˈna ia haere atu tatou e faaitoito ia ˈna. Aita anaˈe te fetii o te tahi tuahine e tavini ra ia Iehova, e hinaaro paha ïa oia i te tauturu aore ra i te faaitoitoraa. No te maˈi aore ra te fifi, e hinaaro paha te tahi i te parau maitai a te hoê hoa mau. (Maseli 12:25; 17:17) Ia imi tatou i te ravea no te hamani maitai ia vetahi ê, te faaite ra tatou e here mau to tatou.​—Korinetia 2, 8:8.

10. Noa ˈtu e ere i te mea ohie i te tahi taime, e nafea te here e turai mai ai ia paturu e ia faaite i te parau mau?

¹⁰ “E oaoa [te here] . . . i te parau mau.” E turai te here ia tatou ia paturu e ia “faaite i te parau mau te tahi i te tahi.” (Zekaria 8:16) A feruri na ua hara te hoê taata ta tatou e here ra. E nafea tatou? No to tatou here ia Iehova e i te taata i hara, e paturu tatou i te mau ture aveia a te Atua. Eita ïa tatou e huna i te ino i ravehia, eita atoa e haafaufaa ore i te reira e eita atoa tatou e haavare. Parau mau, e ere i te mea ohie ia farii ua hara o ˈna. No to tatou râ here ia ˈna, e hinaaro tatou ia fanaˈo oia i te aˈo a Iehova. (Maseli 3:11, 12) Hau atu â, ei Kerisetiano, e hinaaro atoa tatou ia “afaro noa” to tatou haerea i te mau mea atoa.​—Hebera 13:18.

11. I te mea e “tapoˈi te here i te mau mea atoa,” e nafea tatou ia hape to tatou mau taeae e tuahine?

¹¹ “E tapoˈi te here i te mau mea atoa.” Te na ô ra te Petero 1, 4:8: “E tapoˈi te here i te hara e rave rahi.” Oia, ia here mau tatou i to tatou mau taeae e tuahine, eita tatou e faaite haere i to ratou mau paruparu e ta ratou mau hapa rii atoa. I te rahiraa o te taime, e nehenehe noa te here e tapoˈi i te mau hape rii a to tatou mau taeae e tuahine.​—Maseli 10:12; 17:9.

12. Mea nafea to te aposetolo Paulo faaiteraa i to ˈna tiaturi e rave iho â Philemona i te mea maitai e eaha ïa ta tatou e haapii mai?

 ¹² “E tiaturi [te here] i te mau mea atoa.” I roto i te tahi atu huriraa Bibilia, ua papaihia “e tiaturi te here i te mau mea maitai roa ˈˈe.” Eita tatou e taiâ i te tiaturi i to tatou mau taeae e tuahine, eita atoa tatou e manaˈo ino ia ratou. E tauturu mai te here ia hiˈo i te maitai e vai ra i roto i to tatou mau taeae e tuahine e ia tiaturi ia ratou. a A tapao na ua papai Paulo i te hoê rata no te faaitoito ia Philemona ia farii maitai ia Onesimo, ta Philemona tavini o tei horo ê e tei riro mai ei Kerisetiano. Aita Paulo i tamata i te faahepo ia Philemona, ua tiaturi oia e turai iho â te here o Philemona ia ˈna ia rave i te mea maitai. Teie ta Paulo i parau ia Philemona: “Te tiaturi nei au e na reira iho â oe, no reira ïa vau e papai atu ai, ua ite hoi au e rave hau atu â oe i ta ˈu e ani atu ra.” (Irava 21) Ia turai te here ia tatou ia tiaturi i to tatou mau taeae, e faaitoito tatou ia ratou ia faaite i te mau huru maitatai.

13. E nafea tatou ia faaite e tiai te here i te mau mea atoa?

¹³ “E tiai [te here] i te mau mea atoa.” Taa ê atu i te tiaturi, e tiai atoa te here i te mau mea atoa. No to tatou here i te mau taeae, e tiai iho â tatou i te taime e rave ai ratou i te mea maitai. Ei hiˈoraa, “ia haere te tahi taata na te eˈa e hapa ˈi oia hou oia a haroˈaroˈa ˈi,” e tiai tatou i te taime e farii ai oia i te mau aˈoraa î i te here. (Galatia 6:1) E tiai atoa tatou i te taime e maitai faahou mai ai te faaroo o tei paruparu. E faaoromai atoa tatou i to ratou huru a tauturu noa ˈi ia ratou e tae roa ˈtu i te taime e puai faahou ai ratou i roto i te faaroo. (Roma 15:1; Tesalonia 1, 5:14) Noa ˈtu e faaea te tahi taata ta tatou e here ra i te tavini ia Iehova, e tiai tatou ia tae i te hoê mahana, e feruri iho â  o ˈna i to ˈna oraraa a hoˈi mai atu ai ia Iehova mai te tamaiti i moˈe o te parabole a Iesu.​—Luka 15:17, 18.

14. E nafea to tatou faaroo e tamatahia ˈi i roto i te amuiraa e e nafea te here e tauturu mai ai ia faaruru i te mau mea atoa?

¹⁴ “E faaruru [te here] i te mau mea atoa.” Noa ˈtu eaha te fifi ta tatou e faaruru, e tauturu mai te here ia ore e taiva ia Iehova. E tamatahia paha to tatou faaroo na roto i te feia o teie nei ao, e nehenehe atoa râ te reira e tupu i roto i te amuiraa. E feia tia ore tatou paatoa, e nehenehe iho â ïa to tatou mau taeae e haamauiui mai i te tahi taime. Peneiaˈe na roto i te hoê parau feruri-ore-hia. (Maseli 12:18) Aore ra, te manaˈo ra paha tatou aita te tahi ohipa i roto i te amuiraa i faaafaro-maitai-hia. E huru ê paha tatou no te haerea o te hoê taeae faaturahia e ua tae roa tatou i te feruri: “Tera aˈe ïa te huru o te mau Ite no Iehova?” E vaiiho anei tatou i tera mau tupuraa ia turai ia tatou ia faarue i te amuiraa e ia faaea i te tavini ia Iehova? Mai te peu e here to tatou, eita tatou e na reira! Oia, e turai mai te here ia ore e tiatonu i nia i te hapa a to tatou taeae, ia hiˈo râ i te maitai e vai ra i roto ia ˈna aore ra i roto i te amuiraa. E tauturu mai te here ia tamau i te tavini ia Iehova ma te taiva ore e ia turu i te mau taeae e tuahine o te amuiraa noa ˈtu to ratou huru tia ore.​—Salamo 119:165.

15. Eaha te huru o te taata pohehae e e nafea te here e tauturu mai ai ia patoi i tera huru tia ore?

¹⁵ “Eita te here e pohehae.” E nehenehe te pohehae e turai mai ia feii e ia nounou i ta vetahi ê mau faufaa, haamaitairaa aore ra aravihi. No te pohehae, e haapao noa tatou ia tatou iho e e nehenehe te reira e haafifi i te amuiraa. E nafea ia patoi i tera huru tia ore? (Iakobo 4:5) E titauhia ia faatupu i te here. Na te here e turai mai ia oaoa  ua fanaˈo anaˈe vetahi ê i te tahi haamaitairaa. (Roma 12:15) E tauturu atoa mai te here ia ore e pohehae ia haapopouhia te tahi atu no te tahi aravihi taa ê aore ra ohipa maitai.

16. Mai te peu ua here mau tatou i te mau taeae, no te aha eita tatou e faatietie no ta tatou e rave ra i roto i te taviniraa?

¹⁶ “Eita te here . . . e faateitei, eita e faaoru.” No te here, eita tatou e faatietie ia tatou no to tatou mau aravihi e te mau ohipa ta tatou i rave. Ua here mau anaˈe tatou i te mau taeae, eita tatou e faahiti noa mea nafea tatou i te manuïaraa i roto i te taviniraa aore ra eaha ta tatou mau hopoia i roto i te amuiraa. E nehenehe te reira e haaparuparu ia vetahi ê a manaˈo atu ai ratou mea faufaa ore ratou. Eita te here e faateitei, maoti noa hoi te Atua i tia ˈi ia tatou ia rave i ta tatou taviniraa. (Korinetia 1, 3:5-9) Mai ta Paulo i parau, eita te here e “faaoru.” I roto i te hoê huriraa Bibilia, te parauhia ra, “eita te here e faatupu i te manaˈo o oe te mea faufaa roa ˈˈe.” No reira, eita te here e turai mai ia manaˈo o tatou te mea maitai aˈe.​—Roma 12:3.

17. Eaha ta te here e turai ia tatou ia rave? Eaha ta te here e tapea ia tatou ia rave?

¹⁷ “Eita te here e rave i te mea au ore.” E rave te hoê taata i te mea au ore a rave ai i te mea haama e te tano ore no to ˈna faatura ore ia vetahi ê. Aita te here i roto i taua haerea ra no te mea e faaite te reira aita o ˈna e tâuˈa ra ia vetahi ê. Area te here, e turai ïa ia hamani maitai e ia imi i te maitai o vetahi ê. E faaite tatou i te peu maitai, e rave tatou i te mea e oaoa ˈi te Atua a faatura atoa ˈi i to tatou mau taeae e tuahine. Eita te here e faatupu i te “haerea haama,” eita hoi tatou e rave i te tahi noa ˈˈe mea o te faaturori i to tatou mau taeae.​—Ephesia 5:3, 4.

18. No te aha eita te here e titau ia ravehia te mau mea atoa mai ta ˈna e hinaaro?

¹⁸ “Eita te here . . . e imi i to ˈna iho maitai.” Te na ô ra te  tahi atu huriraa Bibilia: “Eita te here e titau ia ravehia te mau mea mai ta ˈna e hinaaro.” Eita te here e turai i te taata ia manaˈo o ˈna noa tei tano e ia ravehia ïa te mau mea atoa mai ta ˈna e hinaaro. Eita oia e onoono ia farii vetahi ê i to ˈna manaˈo. Mai te peu e faaite te hoê i taua huru feruriraa etaeta ra, ua oteo mai ïa te teoteo, e te faaara mai ra hoi te Bibilia: “Hou te ati, o te teoteo ïa.” (Maseli 16:18) Ua here mau anaˈe tatou i te mau taeae, e faatura tatou i to ratou manaˈo. E mai te peu mea tia, e ineine tatou i te farii i te rave mai ta ratou e manaˈo ra. Te tuati ra te reira i ta Paulo aˈoraa ia “imi te taata tataitahi, eiaha i to ˈna iho maitai, i to vetahi ê râ.”​—Korinetia 1, 10:24.

19. Ia riri tatou ia vetahi ê, eaha ta te here e turai mai ia rave?

¹⁹ “Eita te here . . . e riri oioi. Eita te here e tapea i te ino.” Eita te here e riri hanoa i ta vetahi ê e parau aore ra e rave. E nehenehe iho â te riri aore ra te inoino e tupu mai, eita râ tatou e tamau i te na reira! (Ephesia 4:26, 27) Eita tatou e tamau aau i te mau parau aore ra ohipa a vetahi ê mai te huru ra ua papai tatou i te reira i roto i te hoê buka. E turai mai râ te here ia pee i te hiˈoraa o to tatou Atua î i te here. Mai ta tatou i ite mai i roto i te pene 26, e faaore Iehova i te hara mai te peu e tumu papu no te na reira. Ia faaore oia i ta tatou hara, eita o ˈna e faahiti faahou mai i te reira. Aita anei tatou e mauruuru ra eita Iehova e tapea i te ino ta tatou i rave?

20. Eaha to tatou huru ia topa te hoê hoa faaroo i roto i te hara e ia mauiui rahi oia?

²⁰ “Eita te here e oaoa i te parau-tia ore.” Te na ô ra te tahi atu huriraa Bibilia: “Eita te here e oaoa ia hara te tahi taata.” Eita roa ˈtu te here e oaoa i te parau-tia ore, eita atoa ïa tatou e farii aore ra e turu i te tahi noa ˈˈe haerea tia ore. Eaha to tatou huru ia topa te hoê hoa faaroo i roto i te hara e ia mauiui rahi oia? Eita tatou e feruri ‘Te reira ta oe!’ (Maseli 17:5) Tera râ, e oaoa mau tatou ia rave te hoê  taeae i te mau taahiraa e titauhia no te faatupu faahou i te auhoaraa maitai e o Iehova.

21-23. (1) Eaha te auraa o ta Paulo mau parau “eita roa te here e mure”? (2) Eaha te uiraa e pahonohia i roto i te pene hopea?

²¹ “Eita roa te here e mure.” Eaha te auraa o ta Paulo mau parau? Ia taiohia te mau irava na mua ˈtu e i muri aˈe, te faahiti ra oia i te mau ô ta te mau Kerisetiano matamua i fanaˈo maoti te varua moˈa. Ua riro taua mau ô ra ei haapapuraa ua haamaitai te Atua i te amuiraa apî i haamau-noa-hia ˈtura. E ere râ pauroa te mau Kerisetiano tei fanaˈo i te ô e faaora i te maˈi, te ô e tohu aore ra te ô ia paraparau na roto i te reo ěê. E ere râ te reira i te fifi,  e mou hoi tera mau ô atoa. Area te here, e vai noa mai ïa, e tera te mea faufaa roa ˈˈe, eita roa hoi te here e mure. No reira Paulo i parau ai o te here “te eˈa hau ê.”​—Korinetia 1, 12:31.

²² Oia mau, “eita roa te here e mure.” Tae roa mai i teie tau, e itehia o vai te mau pǐpǐ mau a Iesu na roto i to ratou here i te tahi e te tahi. E itehia tera here i roto i te mau amuiraa a te mau Ite no Iehova na te ao atoa nei. E vai tera here e a muri noa ˈtu no te mea ua fafau Iehova i te ora mure ore i ta ˈna mau tavini haapao maitai atoa. (Salamo 37:9-11, 29) No reira “ei haerea here noa” to tatou e tia ˈi! A na reira ˈi, e ite tatou i te oaoa rahi aˈe ia horoa ˈtu. Hau atu â, e nehenehe tatou e ora e e faaite i te here e a muri noa ˈtu mai to tatou Atua î i te here ra o Iehova.

²³ I roto i teie pene hopea o te tuhaa faataahia no te here, ua hiˈopoa tatou e nafea tatou ia here te tahi i te tahi. Ua ite atoa mai tatou mea nafea Iehova i te faaohiparaa i to ˈna puai, to ˈna parau-tia, to ˈna paari e hau roa ˈtu â to ˈna here no to tatou maitai. Mea tano ïa ia ui tatou tataitahi: E nafea vau ia faaite ia Iehova ua here mau vau ia ˈna? E pahonohia tera uiraa i roto i te pene hopea.