1, 2. O vai ma te tahi o te mau hoa o Iehova?

 O VAI ta oe e hinaaro ei hoa? E ere anei te hoê taata ta oe i au e mea afaro maitai orua? E taata maitai e te faahiahia ra oe i te mau huru maitatai ta ˈna e faaite ra.

² E maiti o Iehova i te tahi mau taata no te riro ei hoa no ˈna. O Aberahama te tahi o to ˈna mau hoa. (Isaia 41:8; Iakobo 2:23) Mea here atoa na ˈna ia Davida. Ua parau o Iehova, e taata Davida o tei au i to ˈna aau. (Ohipa 13:22) Na reira atoa te peropheta Daniela, ua “here-rahi-hia” oia e Iehova.—Daniela 9:23.

3. No te aha Aberahama, Davida e Daniela i riro mai ai ei hoa no Iehova?

³ No te aha Aberahama, Davida e Daniela i riro mai ai ei hoa no Iehova? Ua na ô Iehova ia Aberahama: “O oe i faaroo mai i tau reo nei.” (Genese 22:18) E riro o Iehova ei hoa no te feia o te auraro ia ˈna ma te haehaa. E nehenehe atoa te hoê pǔpǔ taata, aore ra nunaa, e faatupu i te auhoaraa e o ˈna. Na roto i teie mau parau, ua faataa o Iehova i te nunaa Iseraela: “E faaroo mai outou i to ˈu nei reo; e riro ïa vau ei Atua no outou i reira, e riro hoi outou ei taata no ˈu.” (Ieremia 7:23) E titau-atoa-hia ia oe ia auraro ia Iehova ia hinaaro mau oe e riro ei hoa no ˈna.

4, 5. Eaha ta Iehova e rave no te paruru i to ˈna mau hoa?

⁴ Te parau ra te Bibilia e te hiˈo mai ra te mata o Iehova  no te “horoa . . . i te etaeta i te feia i tia te aau ia ˈna.” (Paraleipomeno 2, 16:9) I roto i te Salamo 32:8, te fafau ra oia i te taata o tei faatupu i te auhoaraa e o ˈna: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.”

⁵ Te hinaaro ra o Iehova e paruru ia tatou. (A taio i te Salamo 55:22.) Ua riro tatou ei hoa no ˈna e te tavini atoa ra ia ˈna ma te aau atoa. Eita tatou e taiva ia Iehova noa ˈtu tei roto tatou i te tupuraa fifi mau. Hoê â tiaturiraa to tatou e to te papai Salamo. Teie hoi ta ˈna i parau no Iehova: “Tei tau rima atau oia, e ore au e aueue.” (Salamo 16:8; 63:8) Te imi ra râ te tahi enemi puai i te ravea ia faaea tatou i te riro ei hoa no te Atua. Eaha ïa ta Satani e rave ia naea ta ˈna fa?

6. Eaha ta Satani pariraa i te taata atoa?

⁶ I roto i te pene 11, ua haapii tatou ua patoi Satani ia Iehova. Ua pari atoa e Atua haavare o ˈna e te tia ore no te mea aita o Iehova i horoa ia Adamu e Eva i te tiaraa ia maiti eaha te mea maitai e eaha te mea ino no raua iho. Te haapii mai ra te buka Ioba, e pariraa atoa ta Satani i te mau hoa o te Atua. Te na ô ra te Diabolo, e tavini te mau hoa o te Atua ia ˈna no te mea noa e maitai ta ˈna e horoa ˈtu, e ere râ no to ratou here ia ˈna. Ua parau atoa Satani, e nehenehe ta ˈna e faaatea ê i te mau taata atoa i te Atua. E hiˈo anaˈe eaha te haapii mai i te hiˈoraa o Ioba e eaha ta Iehova i rave no te paruru ia ˈna.

7, 8. (a) Eaha to Iehova manaˈo ia Ioba? (b) Eaha ta Satani i parau no Ioba?

⁷ O vai o Ioba? E taata maitai oia o tei ora a 3 600 matahiti i teie nei. Ua parau o Iehova aita ˈtu taata mai ia ˈna i nia i te fenua i tera tau. Mea faatura roa na Ioba i te  Atua e mea au ore atoa na ˈna i te mea ino. (Ioba 1:8) Ua riro mau Ioba ei hoa no Iehova.

⁸ Ua pari Satani e ere no to ˈna here i tavini ai Ioba i te Atua. Ua na ô Satani ia Iehova: “E ere anei tei auahia [aore ra paruruhia] oia e oe, e to ˈna atoa ra fare, e ta ˈna atoa ra mau taoˈa atoa e ati noa ˈˈe? ua haamaitaihia e oe ta ˈna ohipa i rave, e ua rahi ta ˈna taoˈa i te fenua nei. Nanao noa ˈtura râ i to rima a rave atu ai i ta ˈna e ia pau roa; e e faaino oia ia oe i mua i to aro i reira.”—Ioba 1:10, 11.

9. Eaha ta Iehova i vaiiho ia Satani ia rave?

⁹ Ua pari Satani ua tavini Ioba ia Iehova no te mau haamaitairaa ta ˈna e horoa ˈtu. E e nehenehe atoa ta ˈna e turai ia Ioba ia faaea i te tavini i te Atua. No Iehova râ, mea hape roa te reira. Ua vaiiho atura Iehova ia Satani ia tamata ia Ioba no te haapapu ua riro mau anei Ioba ei hoa no ˈna no to ˈna here ia ˈNa.

10. Eaha ta Satani i rave no te tamata ia Ioba e eaha te huru o Ioba?

¹⁰ No te tamata ia Ioba, ua faaere na mua Satani ia ˈna i ta ˈna mau faufaa atoa. Ua haapohe i ta ˈna mau animara atoa e te rahiraa o ta ˈna mau tavini. I te pae hopea, ua faatupu Satani i te hoê vero e pohe atura na ahuru tamarii a Ioba. Aita râ te hoa o Iehova i taiva ia ˈNa. “Aore Ioba i harahia i taua mau mea atoa nei, e aore hoi i faahapa i te Atua.”—Ioba 1:12-19, 22.

11. (a) Eaha ˈtu â ta Satani i rave i nia ia Ioba? (b) Eaha te huru o Ioba?

¹¹ Aita Satani i tuu, ua patoi â oia i te Atua ma te parau: “E nanao noa ˈtu na râ i to rima a rave atu ai i te ivi e te iˈo, e e faaino atu oia ia oe i mua i to aro i reira.” Tairi aˈera Satani ia Ioba i te hoê maˈi mauiui mau. (Ioba 2:5,  7) I roto atoa i tera tupuraa, aita Ioba i taiva ia Iehova. Ua na ô râ: “E ore â vau e faarue i te parau mau na ˈu ra e pohe noa ˈtu vau.”—Ioba 27:5.

12. Mea nafea Ioba i te haapapuraa ua haavare Satani?

¹² Aita Ioba i ite no nia i te mau pariraa a Satani e eaha te tumu o ˈna i mauiui ai. Ua manaˈo oia o Iehova to muri mai i to ˈna mau ati. (Ioba 6:4; 16:11-14) Noa ˈtu râ, ua tapea Ioba i to ˈna haapao maitai i te Atua. Aita Ioba i tavini ia Iehova no te mau haamaitairaa ta ˈna e horoa ˈtu. E hoa mau oia no te Atua no to ˈna here ia ˈNa. Mea hape te mau pariraa atoa a Satani!

13. Eaha te mau haamaitairaa ta Ioba i fanaˈo no te mea aita o ˈna i taiva i te Atua?

¹³ Noa ˈtu aita Ioba i ite i tei tupu i te raˈi, aita roa oia i taiva i te Atua, ua haapapu râ mea ino o Satani. Ua haamaitai o Iehova i to ˈna hoa here o tei ore i taiva ia ˈna.—Ioba 42:12-17.

14, 15. Eaha ta Satani pariraa i te mau taata atoa?

¹⁴ Mea rahi te haapiiraa e huti mai i tei tupu i nia ia Ioba. I teie mahana, te pari atoa ra o Satani te tavini ra tatou ia Iehova no te mau haamaitairaa ta ˈna e horoa mai. I roto i te Ioba 2:4, ua pari â Satani: “E horoa noa hoi te taata i tana mau meaˈtoa ra ei hoo no tona iho ora.” (Te Bibilia Moˈa V.C.J.S., 1976) E ere noa ïa o Ioba ta Satani e pari ra, o te mau taata atoa râ. Tae roa mai i teie mahana, te faaino noa ra Satani ia Iehova e te pari noa ra i ta ˈna mau tavini. Te na ô ra hoi te Maseli 27:11: “E tau tamaiti, ia paari hoi oe, ia oaoa tau aau, ia tia ia ˈu ia patoi atu i tei faaino mai ia ˈu nei.”

¹⁵ E nehenehe oe e maiti i te auraro ia Iehova e te riro ei hoa haapao maitai no ˈna. Ma te na reira, e haapapu  oe o Satani tei haavare. Noa ˈtu e titauhia ia rave i te mau tauiraa rahi no te riro ei hoa no te Atua, tera te faaotiraa maitai roa ˈˈe! E ere te reira i te ohipa hauti. Te pari ra Satani e taiva oe i te Atua i roto i te fifi. E tamata o ˈna i te haavare mai ia taiva tatou i te Atua. Eaha ta ˈna mau raveraa?

16. (a) Eaha ta Satani mau raveraa ia faaea tatou i te riro ei hoa no te Atua? (b) Eaha paha ta te Diabolo e faaohipa ia faaoti oe i te faaea i te tavini ia Iehova?

¹⁶ Ua rau te raveraa a Satani ia faaea tatou i te riro ei hoa no te Atua. E tairi oia “mai te liona uuru e imi nei i te amu i te hoê taata.” (Petero 1, 5:8) Eiaha e maere ia tamata te mau hoa, fetii e te tahi atu i te turai ia oe ia faaea i te haapii i te Bibilia e te rave i te mea maitai. E taa ia oe e te tamatahia ra oe. a (Ioane 15:19, 20) E faariro atoa Satani ia ˈna “ei melahi no te maramarama.” E turai ïa o ˈna ia tatou ia faaroo ore ia Iehova. (Korinetia 2, 11:14) Te tahi atu raveraa a Satani, e turai mai o ˈna ia faahapa ia tatou iho a manaˈo atu ai eita e tia ia tatou ia tavini i te Atua.—Maseli 24:10.

17. Na te aha e turai ia tatou ia auraro ia Iehova?

¹⁷ Ma te auraro ia Iehova, e haapapu tatou o Satani tei haavare. Eaha te tauturu mai ia riro ei taata auraro? Te na ô ra te Bibilia: “E hinaaro [aore ra here] atu oe i to Atua ia Iehova ma to aau atoa, e ma to varua atoa, e ma to puai atoa.” (Deuteronomi 6:5) Na te here e turai ia tatou ia auraro ia Iehova. A rahi noa ˈi to tatou here ia  Iehova, e hinaaro tatou e rave i te mau mea atoa ta ˈna e ani mai ra. Ua papai te aposetolo Ioane: “Teie hoi te here i te Atua, ia haapao tatou i ta ˈna mau faaueraa. E ere ta ˈna mau faaueraa i te mea teimaha.”—Ioane 1, 5:3.

18, 19. (a) Eaha te tahi mau mea ta Iehova i parau e mea ino? (b) Eaha te haapapu ra eita roa o Iehova e ani mai ia rave i te ore e maraa ia tatou?

¹⁸ Eaha râ te tahi mau mea ta Iehova i parau e mea ino? Te vai ra te tahi mau hiˈoraa i roto i te tumu parau tarenihia “ Eiaha e au i ta Iehova e au ore.” I te haamataraa, e na ô paha oe, ‘E ere hoi teie mau mea i te mea ino roa!’ Ia taio e ia feruri maite râ oe i nia i te mau irava Bibilia, e taa ia oe mea maitai aˈe ia haapao i ta Iehova mau ture. E ite atoa paha oe, e titauhia ia rave oe i te tahi mau tauiraa. A na reira noa ˈtu e ere i te mea ohie i te tahi taime. E fanaˈo hoi oe i te hau e te oaoa ia riro ei hoa haapao  maitai no te Atua. (Isaia 48:17, 18) Eaha te haapapu ra e nehenehe tatou e rave i tera mau tauiraa?

¹⁹ Eita roa o Iehova e ani mai ia rave i te ore e maraa ia tatou. (Deuteronomi 30:11-14) E hoa papu o Iehova e o ˈna te mea ite aˈe i to tatou huru ia tatou iho. Ua ite hoi i to tatou mau huru maitatai e to tatou mau vahi paruparu. (Salamo 103:14) Ua faaitoito mai te aposetolo Paulo na roto i teie mau parau: “Eita râ te Atua haapao maitai e vaiiho ia tamatahia outou hau aˈe i ta outou e nehenehe e faaruru. Tera râ, a tamata-noa-hia ˈi outou, te faaineine atoa ra oia i te faaoraraa ia nehenehe outou ia faaoromai maite.” (Korinetia 1, 10:13) E horoa mai iho â o Iehova i te puai no te rave i te mea maitai. No ǒ mai ia ˈna “te puai o te hau ê i to te taata nei” o te tauturu mai ia faaoromai i te fifi. (Korinetia 2, 4:7) Ua ite roa Paulo i te rima o Iehova i roto i te fifi, no reira o ˈna i na ô ai: “E puai  to ˈu ia faaruru i te mau mea atoa maoti tei horoa mai i te puai.”—Philipi 4:13.

20. Eaha te mau huru maitatai ta oe e tia ia faaite e eaha te tumu?

²⁰ No te riro ei hoa no Iehova, e tia ia haapae i te rave i ta Iehova i parau e mea ino. Eita râ e navai noa i reira. (Roma 12:9) E hinaaro atoa te mau hoa o te Atua i te mau mea o ta ˈna e au. Ua faaitehia te reira i roto i te Salamo 15:1-5. (A taio.) E pee atoa te mau hoa o Iehova i to ˈna hiˈoraa e e faaite ratou i te mau huru maitatai mai “te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te haavîraa ia ˈna iho.”—Galatia 5:22, 23.

21. Eaha te tauturu atu ia faaite i te mau huru maitatai o ta te Atua e au?

²¹ Eaha te tauturu atu ia faaite i tera mau huru maitatai nehenehe mau? E titauhia ia haapii eaha te mau mea ta Iehova e au ma te tamau i te taio e te haapii i te Bibilia. (Isaia 2:3) Ma te na reira, e rahi mai to oe here ia Iehova e e hinaaro oe e auraro ia ˈna.

22. Eaha te faahopearaa ia auraro oe ia Iehova?

²² E nehenehe e faahohoˈa i te mau tauiraa ta oe e rave i te tatararaa i te ahu tahito no te oomo mai i te mea apî. Te parau ra te Bibilia, e titauhia ia “tatara i te huru taata tahito” e ia ahu mai i “te huru taata apî.” (Kolosa 3:9, 10) E ere paha i te mea ohie, ma te rave râ i tera mau tauiraa e ma te auraro ia Iehova, e haamaitairaa te tiai mai ra. (Salamo 19:11) A faaoti ïa i te auraro ia Iehova e te haapapu o Satani tei haavare. A tavini ia Iehova no to oe here ia ˈna, eiaha no te mau haamaitairaa ta ˈna e horoa mai a muri aˈe. I reira oe e riro ai ei hoa mau no te Atua!