E POFAI oe i te hoê apara monamona, e hauˈa apara mau, a tuu atu ai i roto i ta oe panie ua î aˈena. Ahia ˈtura hora to oe pofai-noa-raa i te apara, aita râ oe i rohirohi. E nehenehe ta oe e tamau â. To pihai iho noa mai to oe mama, te pofai atoa ra i te apara ma te oaoa, a paraparau noa ˈi e te tahi atu mau mero utuafare e te hoa tei haere mai e tauturu. Ua hoˈi oia i to ˈna apîraa, mai ta oe i ite ia ˈna i to oe tamarii-rii-raa ra. Mea maere mau! Ua ite hoi oe ia ˈna i te ruhiruhiaraa i roto i te ao tei mou ahia ˈtura maororaa. Ua ite oe ia ˈna i te maˈiraahia, te tapea ra oe i to ˈna rima i to ˈna hutiraa i to ˈna aho hopea, e ua taˈi oe i to ˈna hunaraahia. Teie râ, ua ora faahou mai oia, mea oraora maitai, mai e rave rahi atu!

E ite iho â tatou i te reira, ua papu ia tatou, no te mea e tupu iho â ta te Atua i fafau. I teie tuhaa, e hiˈopoa mai tatou e nafea te tahi mau parau fafau a te Basileia e tupu ai ua fatata hoi, e tae roa ˈtu i te tamaˈi o Aramagedo. E hiˈo faahou atoa mai tatou i te tahi mau parau fafau faahiahia ta te Basileia e faatupu i muri iho. Mea oaoa mau â ia ite i te Basileia o te Atua ia faatere i teie fenua taatoa, a faaapî ai i te mau mea atoa!