Pene 1

Te mau poroi no te raˈi mai

E PARAU te Bibilia taatoa no te raˈi mai, ta to tatou Metua i te raˈi ra i horoa mai ei haapiiraa ia tatou. Teie râ, fatata e 2 000 matahiti i teie nei, e piti na poroi faufaa roa tei horoahia e te hoê melahi “e tia i te aro o te Atua.” O Gaberiela to ˈna iˈoa. E hiˈopoa anaˈe na e na te aha i aratai mai ia ˈna i te fenua nei e piti taime.

Tei te matahiti 3 tatou hou to tatou nei tau. I roto i te mau mouˈa rii i Iudea, peneiaˈe aita i atea roa ˈtu ia Ierusalema, e ora na te hoê tahuˈa o Zakaria to ˈna iˈoa. E na feia paari roa teie taata e ta ˈna vahine o Elisabeta. E aita ta raua e tamarii. Ua tae i te taime no Zakaria ia rave i ta ˈna taviniraa tahuˈa i te hiero o te Atua i Ierusalema. Ua fa taue maira o Gaberiela i te pae atau o te fata i reira e tutuihia ˈi te mea noˈanoˈa ra.

Mǎtaˈu roa ˈˈera o Zakaria. Ua tamǎrû râ o Gaberiela i to ˈna riaria, i te na ôraa mai e: “Eiaha e mǎtaˈu, e Zakaria: ua faaroohia hoi ta oe pure; e e fanau to vahine o Elisabeta i te tahi tamaiti na oe; e na oe e mairi i to ˈna iˈoa ia Ioane.” Ua parau faahou maira o Gaberiela e ‘e rahi hoi o Ioane i mua i te aro o Iehova’ e ‘e faaineine oia i te hoê pae taata ia au no Iehova.’

Aita râ o Zakaria i tiaturi. Mea fifi roa hoi ia tiaturi e e nehenehe ta raua o Elisabeta e fanau i te tamarii i teie faito matahiti. No reira o Gaberiela i parau mai ai ia ˈna e: “E vavahia oe, e ore e tia ia parau, e tae noa ˈtu i te mahana e hope ai teie nei parau i te tupu, o oe aore i faaroo i tau parau nei.”

I rapaeau mairâ, te aniani noa ra te taata e no te aha râ o Zakaria e faaea maoro noa ˈi i roto i te hiero. Ia haere mai oia i rapae, eita ta ˈna e nehenehe e paraparau tera râ e hautiuti noa o ˈna i to ˈna rima, e ua taa ˈtura ia ratou e ua ite oia i te tahi mea huru ê roa.

A hope ai te taviniraa a Zakaria i roto i te hiero, ua hoˈi atura oia i to ˈna fare. E inaha, i muri iti noa ˈˈe, ua hapu mau â o Elisabeta! A tiai noa ˈtu ai oia i te taime oia e fanau ai, ua parahi noa o Elisabeta i to ˈna fare ma te faaatea ê mai i te taata, e pae avaˈe te maororaa.

I muri aˈe, ua fa faahou maira o Gaberiela. E e paraparau atu o ˈna ia vai ra? I te hoê ïa potii apî faaipoipo-ore-hia o Maria te iˈoa, no te oire no Nazareta oia. Eaha te poroi o ta ˈna i faatae mai i taua taime ra? A faaroo na! “Ua herehia mai oe e te Atua,” o ta Gaberiela ïa i parau atu ia Maria. “E inaha, e tô oe, e fanau ta oe tamaiti, e na oe e mairi i te iˈoa ia Iesu.” Ua parau faahou atu o Gaberiela e: “E rahi oia, e e parauhia i te Tamaiti na te Teitei; . . . ei ia ˈna te hau i te fetii o Iakoba e a muri noa ˈtu; e e ore roa to ˈna basileia e mure.”

Ma te papu maitai, ua oaoa roa o Gaberiela i te mea e na ˈna i faaite i teie mau poroi. Ia taio hau atu tatou no nia ia Ioane e o Iesu, e ite papu atu tatou e no te aha taua mau poroi no te raˈi ra e riro ai ei mau parau faufaa mau. Timoteo 2, 3:16; Luka 1:5-33.

▪ Eaha na poroi faufaa roa e piti tei faataehia mai mai te raˈi mai?

▪ Na vai i faaite mai i teie mau poroi, e ua faataehia ˈtu ia vai ra?

▪ No te aha e mea fifi roa ia tiaturi i teie na poroi e piti?