1. No te aha e mea fifi mau i te faatere i te hoê utuafare i teie mahana?

 “TE [TAUI] nei hoi te huru o teie nei ao.” (Korinetia 1, 7:31) Ua papaihia teie mau parau ua hau atu i te 1 900 matahiti i teie nei, auê hoi te reira i te parau mau i teie mahana! Te taui mau nei te mau mea, no nia iho â râ i te oraraa utuafare. Te mea e manaˈohia ra e mea tano aore ra matauhia a 40 aore ra 50 matahiti i teie nei, e pinepine i te ore e fariihia i teie mahana. No reira, e tautooraa rahi mau te faatereraa i te hoê utuafare ma te manuïa. Atira noa ˈtu, ia haapao-anaˈe-hia te aˈoraa a te mau Papai, e nehenehe oe e faaruru i teie mau tautooraa.

2. Eaha te mau tupuraa i te pae faanavairaa faufaa e faateimaha ra i te hoê utuafare?

² I teie mahana, aita te taata e rave rahi e mauruuru ra i te hoê oraraa utuafare haehaa. I te mea e te hamani rahi roa ˈtura te tapihooraa i te taoˈa e te ume nei i te manaˈo o te huiraatira na roto i te ravea faatianianiraa, no reira ïa e mau mirioni metua tane e metua vahine o teie e ohipa ra e rave rahi hora ia nehenehe ratou e hoo mai i teie mau taoˈa. Te tutava ra vetahi atu mirioni taata i tera e tera mahana ei maa to nia i te airaa maa. E titauhia ratou ia rave i te ohipa hau atu i te taime i matauhia na, peneiaˈe ma te rave e piti ohipa, no te aufau-noa-raa ïa i te mau mea titau-mau-hia. E no vera ma e oaoa ïa ratou ahiri e itehia mai ta ratou ohipa, ua riro hoi te ereraa i te ohipa ei fifi i te mau vahi atoa. Oia mau, e ere te oraraa i te mea ohie no te utuafare  o teie tau, e nehenehe râ te mau faaueraa tumu a te Bibilia e tauturu i te mau utuafare ia rave i tei maraa ia ratou ia au i te mau tupuraa.

3. Eaha te faaueraa tumu ta te aposetolo Paulo i faataa, e nafea te faaohiparaa i te reira ia tauturu i te taata ia manuïa i te faatere i to ˈna utuafare?

³ Ua farerei te aposetolo Paulo i te fifi i te pae faanavairaa faufaa. I to ˈna faaafaroraa i te reira, ua haapii oia i te tahi ohipa faufaa, o ta ˈna i faataa ˈtu i roto i ta ˈna rata i to ˈna ra hoa o Timoteo. Ua papai o Paulo e: “Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira.” (Timoteo 1, 6:7, 8) Parau mau, e titau te hoê utuafare hau atu i te maa e te ahu noa. E hinaaro-atoa-hia te hoê nohoraa. E mea titauhia te haapiiraa no te mau tamarii. E te vai ra te moni no te aufau i te taote e te tahi atu mau haamâuˈaraa. Noa ˈtu te reira, e nehenehe e faaohipahia te faaueraa tumu a Paulo. Ia mauruuru anaˈe tatou i te haamâha i te mau mea e titau-mau-hia eiaha râ i te faatia noa i to tatou mau hiaai, e ohie mai ïa te oraraa.

4, 5. Nafea te manaˈo-atea-raa e te opuaraa ia tauturu i te faatere i te hoê utuafare?

⁴ E ite-atoa-hia te tahi atu faaueraa tumu faufaa i roto i te hoê o te mau parabole a Iesu. Ua na ô oia: “O vai ïa taata i ǒ outou nei ia opua i te fare e faatia, e ore e mata na i te parahi i raro, a taio ai i te taoˈa e oti ai, i te navairaa ta ˈna taoˈa?” (Luka 14:28) Te parau ra o Iesu, i ǒ nei, no nia i te manaˈo-atea-raa, te opuaraa na mua ˈˈe. Ua ite tatou i roto i te hoê pene i mua e nafea te reira i te tautururaa i nau hoa apî e opua ra e faaipoipo. E i muri aˈe i te faaipoiporaa, e mea faufaa atoa ïa no te faatere i te hoê utuafare. No te manaˈo-atea-raa i roto i teie tuhaa, e titauhia ïa te hoê tabula moni, no te feruriraa e nafea ia faaohipa ma te paari i te moni e vai ra. E na reira ïa te hoê utuafare i te tarani i ta ˈna mau haamâuˈaraa,  ma te tuu i te moni i te hiti no te mau mea titau-mau-hia no te mahana taitahi aore ra hebedoma taitahi, e ma te ore e ora na nia ˈtu i te moni e vai ra.

⁵ I te tahi mau fenua, e titau paha teie tabula moni e ia patoi tatou i te hinaaro uˈana e tarahu ma te faahoˈi rahi atu â no te mau tauihaa faufaa ore. I te tahi atu mau fenua, e titau paha ïa e ia haavî etaeta tatou i te faaohipa i te mau tareta moni. (Maseli 22:7) E titau atoa paha e ia patoi tatou i te hinaaro uˈana e hoo—te hooraa mai i te tahi mea i reira iho ma te ore e feruri i te mau mea titau-mau-hia e te mau faahopearaa. Hau atu, e faaite mai te hoê tabula moni i te moni e huehia ma te miimii i te pereraa, te puhipuhiraa i te avaava, e te inu-hua-raa o te faaino hoi i te faanavairaa faufaa a te utuafare, e o te patoi atoa i te mau faaueraa tumu a te Bibilia.—Maseli 23:20, 21, 29-35; Roma 6:19; Ephesia 5:3-5.

6. Eaha te mau parau mau o te mau Papai o te tauturu i te feia oraraa veve?

⁶ Eaha ˈtura ïa no te feia o tei mau i roto i te oraraa veve? A tahi, e nehenehe ratou e tamahanahanahia i te iteraa e e maa taime poto noa to teie fifi o te ao nei. I roto i te ao apî e fatata roa maira, e faaore Iehova i te veve e te tahi atu mau ati atoa e haamauiui ra i te huitaata nei. (Salamo 72:1, 12-16) I roto i teie area taime, noa ˈtu e e feia veve roa ratou, eita te mau kerisetiano mau e taiâ roa, no te mea te tiaturi nei ratou i te parau tǎpǔ a Iehova e: “E ore roa vau e taiva ia oe, e ore roa vau e faarue ia oe, e ore, e ore roa ˈtu.” No reira, e nehenehe te taata faaroo e parau ma te tiaturi e: “O [“Iehova,” MN] to ˈu tauturu, e ore au e mǎtaˈu.” (Hebera 13:5, 6) I teie mau mahana fifi, ua tauturu o Iehova i ta ˈna feia haamori na roto e rave rahi mau ravea ia ora anaˈe ratou ia au i ta ˈna mau faaueraa tumu e ia tuu anaˈe ratou i to ˈna Basileia i te parahiraa matamua i roto i to ratou oraraa. (Mataio 6:33) E rave rahi i rotopu ia  ratou o te nehenehe e haapapu mai, i te na ôraa e, ia au i te parau a te aposetolo Paulo e: “Te mau vahi atoa, e te mau mea atoa ra ua pii ïa vau, i te paia e te poia; i te taoˈa rahi e te veve. E tia ia ˈu te mau mea atoa nei i te [“Atua,” MN], tei tauturu mai ia ˈu ra.”—Philipi 4:12, 13.

7. Eaha te mau parau a Iesu, ahiri e faaohipahia, e tauturu i te faatere i te hoê utuafare ma te manuïa?

⁷ I te pae hopea o ta ˈna taviniraa i te fenua nei, ua parau o Iesu e: “E aroha ˈtu oe i to taata-tupu, mai to aroha ia oe iho na.” (Mataio 22:39) Ma te faaohipa i teie aˈoraa i roto i te utuafare, e ohie te faatereraa i te utuafare.  Inaha hoi, o vai to taata-tupu fatata roa, here-rahi-hia, e ere anei te mau melo o te utuafare—te tane e te vahine, te metua e te tamarii? Nafea te mau melo o te utuafare ia faaite i te here i te tahi e te tahi?

8. Nafea ia faaite i te here i roto i te utuafare?

⁸ Te hoê ravea ia rave ïa te melo taitahi o te utuafare i ta ˈna tuhaa tano o te ohipa i te fare. E tia iho â e ia haapiihia te mau tamarii ia faanaho i te mau tauihaa ia oti ratou i te faaohipa i te reira, e ahu anei aore ra e taoˈa hauti anei? E rahi paha te taime e te tutavaraa e titauhia no te faanaho i te roˈi i te mau poipoi atoa, e tauturu rahi râ te reira no te faatere i te utuafare. E itehia iho â te huenaneraa i te tahi mau taime, e nehenehe râ te taatoaraa e ohipa amui ia vai nahonaho au noa te fare, ma te tamâ atoa ia oti i te tamaa. E fifihia te taata atoa i te huru feruriraa faatau, faatia i to ˈna iho hinaaro, e te ohumu e te amuamu. (Maseli 26:14-16) I te tahi atu pae, e maitaihia te hoê utuafare oraraa oaoa i te huru feruriraa horoa noa ma te manaˈo tae. “O te taata horoa noa hoi ta te Atua e hinaaro.”—Korinetia 2, 9:7.

9, 10. (a) Eaha te hopoia teimaha e amo-pinepine-hia ra e te vahine o te fare, e nafea te reira ia mâmâ? (b) Eaha te manaˈo aifaito e horoahia ra no nia i te ohipa i te fare?

⁹ E tauturu te haapaoraa ˈtu ia vetahi ê e te here ia ape i te hoê tupuraa o te riro ei fifi rahi i roto i te tahi mau fare. Mai tei matauhia, o te mau metua vahine ïa te niu faufaa roa o te oraraa i te fare. Na ratou e aupuru i te tamarii, e tamâ i te fare, e puˈa i te ahu o te utuafare, e hoo e e tunu i te maa. I te tahi mau fenua, ua matau te mau vahine i te rave i te ohipa i roto i te faaapu, i te hoo i te mau maa hotu i te matete, aore ra i te hopoi i te moni no te utuafare na roto i te tahi atu mau ravea. I te mau vahi atoa e ere mai te reira i te matamua, e mau mirioni vahine faaipoipo ïa o te tia ia imi i te ohipa i rapaeau i te fare. E tia ia haapopouhia te hoê vahine faaipoipo e metua vahine atoa o te rave rahi i te ohipa  i roto i taua mau tuhaa ra. Mai te “vahine maitai” e faataahia ra i roto i te Bibilia, e mau mahana î maitai to ˈna. “Aore i amu i te maa i noaa i te faatau ra.” (Maseli 31:10, 27) E ere ïa te auraa e, o te vahine anaˈe o te rave i te ohipa i te fare. Ia oti te hoê tane e te hoê vahine i te rave i ta raua ohipa i rapaeau, e tano anei e na te vahine anaˈe e rave i te taatoaraa o te ohipa i te fare e a faafaaea noa ˈi te tane e te toea o te utuafare? Eita roa ˈtu ïa. (A faaau e te Korinetia 2, 8:13, 14.) Ei hiˈoraa ïa, ia tunu anaˈe te metua vahine i te maa, e mauruuru o ˈna mai te peu e e tauturu mai te mau melo o te utuafare i te faaineineraa, ma te faanaho i te airaa maa, ma te hoo haere, aore ra ma te faanehenehe i tera e tera vahi o te fare. Oia mau, na te taatoaraa ïa teie hopoia.—A faaau e te Galatia 6:2.

¹⁰ E na ô mai paha vera ma: “I to ˈu vahi e ere i te tiaraa o te hoê tane i te raveraa i teie mau mea.” Parau mau paha, e ere anei râ i te mea maitai ia feruri maite i te reira? I to te Atua ra o Iehova haamauraa i te utuafare, aita oia i faaue e na te vahine noa e rave i te tahi mau ohipa. I te hoê mahana, a haere mai ai te mau vea taa ê a Iehova e farerei i te taata haapao maitai ra ia Aberahama, e tufaa atoa ta ˈna i te faaineineraa e i te tuuraa ˈtu i te maa i mua i te mau ratere. (Genese 18:1-8) Te aˈo ra te Bibilia e: “E aroha atoa to mau tane i ta ratou iho mau vahine e tia ˈi mai ta ratou i aroha i to ratou iho tino ra.” (Ephesia 5:28) Mai te peu e, i te hopea mahana, ua rohirohi te tane e te hinaaro ra oia e faafaaea rii, e ere anei e hoê â huru no te vahine, e hau atu â paha? (Petero 1, 3:7) E ere anei i te mea tano e te here hoi e ia tauturu haere te tane i te fare?—Philipi 2:3, 4.

11. Mea nafea Iesu i te haamauraa i te hoê hiˈoraa maitai no te mau melo taitahi o te utuafare?

¹¹ Ua riro o Iesu ei hiˈoraa maitai roa ˈˈe o tei auhia mai e te Atua e o tei faaoaoa i to ˈna mau hoa. Noa ˈtu e  aita o Iesu i faaipoipo, ua riro oia ei hiˈoraa maitai no te mau tane, e oia atoa no te mau vahine e te mau tamarii. Ua parau oia no ˈna iho e: “Aita atoa hoi te Tamaiti a te taata nei i haere mai ia tavinihia to ˈna, ei tavini râ,” teie ïa, te taviniraa ˈtu ia vetahi ê. (Mataio 20:28) Auê i te au rahi e teie mau utuafare i reira te mau melo atoa e faatupu ai i teie huru haerea!

12. Eaha ta Iehova e titau maira i te feia e tavini ra ia ˈna?

¹² E itehia i roto i te Korinetia 2, 7:1 te tahi atu faaueraa tumu a te Bibilia o te tauturu no te faatere i te hoê utuafare. Te taiohia ra: “E tamâ hua tatou ia tatou iho i te mau viivii atoa o te tino e te varua.” E fariihia e Iehova te feia e auraro i teie mau parau faauruahia, o te titau ra i te “haamoriraa mâ e te porao ore.” (Iakobo 1:27, MN) E e fanaˈo to ratou utuafare i te mau haamaitairaa e au.

13. No te aha e mea faufaa te vai-mâ-raa i roto i te huru faatereraa o te utuafare?

 ¹³ Ei hiˈoraa, te haapapu maira te Bibilia e e tae te mahana e ore roa te maˈi. I taua tau ra, “e ore hoi to reira e parau e, Ua paruparu vau i te maˈi.” (Isaia 33:24; Apokalupo 21:4, 5) E tae noa ˈtu râ i tera tau, e faaruru iho â te mau utuafare atoa i te maˈi i tera e tera taime. Ua roo-atoa-hia o Paulo e o Timoteo i te maˈi. (Galatia 4:13; Timoteo 1, 5:23) Te parau nei râ te feia rapaau aravihi e e nehenehe e rave rahi mau maˈi e araihia. E paruruhia te mau utuafare manaˈo paari i te tahi mau maˈi ia ape anaˈe ratou i te viivii o te tino e to te pae varua. E hiˈopoa na tatou e nafea râ.—A faaau e te Maseli 22:3.

14. E nafea te vai-mâ-raa i te pae morare ia paruru i te hoê utuafare i te maˈi?

¹⁴ E titau te vai-mâ-raa i te pae varua i te vai-mâ-raa i te pae morare. Mai tei ite-maitai-hia, te turu ra te Bibilia i te mau ture morare teitei e te faautua ra oia i te mau huru taatiraa atoa i te pae tino i rapaeau i te faaipoiporaa. “E ore hoi te taiata, . . . e te faaturi, e te mahu, e te paia, . . . e parahi i te basileia o te Atua.” (Korinetia 1, 6:9, 10) E mea faufaa roa te auraroraa i teie mau ture etaeta no te mau kerisetiano e ora ra i roto i teie ao viivii roa. I te na reiraraa e mauruuru ïa te Atua e e tauturu atoa no te paruru i te utuafare i te mau maˈi e peehia na roto i te taatiraa i te pae tino mai te SIDA, te tona, te omaha ura e te chlamydiose.—Maseli 7:10-23.

15. A horoa i te hoê hiˈoraa no nia i te ereraa i te vai-mâ-raa o te faatupu mai i te hoê maˈi aita e faufaa.

¹⁵ ‘Ia tamâ hua tatou ia tatou iho i te mau viivii atoa o te tino’ e tauturu te reira no te paruru i te utuafare i te tahi atu mau maˈi. E tupu mai e rave rahi mau maˈi no te mâ ore i te pae tino. Te hiˈoraa matamua o te peu puhipuhiraa i te avaava. Eita te puhipuhiraa i te avaava e faarepo noa i te mahaha, i te ahu, e i te reva atoa, e roo-atoa-hia râ te taata i te maˈi. E mau mirioni taata  tei pohe, i te mau matahiti atoa, i te puhipuhiraa i te avaava. A feruri i te reira; i te mau matahiti atoa, e mau mirioni taata e ore e roohia i te maˈi e e pohe oioi ahiri ratou i ape i te “viivii atoa o te tino”!

16, 17. (a) Eaha te ture ta Iehova i horoa no te paruru i te mau ati Iseraela i te tahi mau maˈi? (b) Nafea ia faaohipa i te auraa o te faaueraa tumu a te Deuteronomi 23:12, 13 i roto i te mau utuafare atoa?

¹⁶ A hiˈopoa na i te tahi atu hiˈoraa. A 3 500 matahiti i teie nei, ua horoa te Atua i ta ˈna Ture i te nunaa Iseraela no te faanaho i ta ratou haamoriraa e, i to ratou atoa hoi oraraa i te mahana taitahi. Ua tauturu teie Ture i te paruru i te nunaa i te maˈi na roto i te haamauraa i te tahi mau ture tumu no te vai-mâ-raa. Te hoê o teie ture no nia ïa i te hunaraa i te tutae taata, o tei tia ia tapoˈi-maitai-hia i rapaeau i te aua ia ore te vahi faaearaa o te taata ia viiviihia. (Deuteronomi 23:12, 13) E aˈoraa maitai â to teie ture tahito. I teie atoa mahana, te roohia ra te taata i te maˈi e te pohe  nei ratou no te mea aita ratou e pee ra i te reira. *

¹⁷ Ia au maite i te auraa o te faaueraa tumu a teie ture a Iseraela, e tia te vahi hopuraa e haumitiraa—tei roto anei aore ra tei rapaeau anei i te fare—ia vai mâ e ia tinaihia te mau manumanu ino. Ia ore anaˈe te vahi haumitiraa e vai mâ e e tapoˈihia, e marere mai ïa te mau raˈo i reira ma te haapurara i te mau manumanu maˈi i te tahi atu mau vahi o te fare—e tae roa ˈtu i nia i te maa o ta tatou e amu! Hau atu, e tia i te tamarii e te taata paari ia horoi i to ratou rima i muri aˈe i te haumitiraa. Ahiri aita, e hopoi mai ratou i te manumanu maˈi i nia i to ratou iri. Ia au i te hoê taote farani, te horoiraa i te rima “o te hoê noâ ravea maitai roa ˈˈe no te arairaa i te tahi mau maˈi o te opu, o te mahaha, aore ra o te iri.”

18, 19. Eaha te mau manaˈo tauturu e horoahia ra ia vai mâ noa te hoê fare noa ˈtu tei te vahi nohoraa veve?

¹⁸ Parau mau, e tautooraa te vai-mâ-raa i te hoê vahi nohoraa veve. Ua faataa te hoê taata tei matau i teie huru nohoraa: “Ua tatai piti te fifi no te vai-mâ-raa i te vahi ahuaraˈi veavea roa. E ô te repo fenua o te mau vero i roto roa i te mau afafa atoa o te fare e te repo puehu paopao. . . . E faatupu atoa te maraaraa o te huiraatira i roto i te mau oire, e i te tahi mau mataeinaa, i te mau ati i te pae no te oraora-maitai-raa. Ua riro te mau taheraa pape repo tapoˈi-ore-hia, te mau pehu pue noa o te ore i ohihia, te mau vahi haumitiraa veuveu a te oire, te mau iore afai maˈi, te mau popoti, e te mau raˈo ei mau mea ite-pinepine-hia.”

¹⁹ E mea fifi te vai-mâ-noa-raa i roto i teie huru tupuraa. E mea faufaa râ teie tutavaraa. Te puˈa e te pape e  maa ohipa iti e mea mâmâ aˈe ïa i te raau e te moni no te aufau i te fare maˈi. Mai te peu e te ora ra oe i roto i teie huru vahi, ia au i tei maraa ia oe, ia vai mâ noa ïa to oe iho fare e to oe iho aua e eiaha e para animala. Ia varivari anaˈe te eˈa o to oe fare i te tau ûa, e nehenehe anei oe e tuu maa iriiri aore ra maa ofai i nia i te eˈa eiaha te fare ia varihia? Ei tiaa aore ra ei tamaa i nia i te avae, e nehenehe anei e tatara hou oia a tomo ai i roto i te fare? E tia atoa ia ara eiaha te pape ia viiviihia. Te manaˈohia ra e fatata e piti mirioni taata i pohe i te matahiti hoê i te mau maˈi no te pape repo e te navai ore o te mau ravea no te vai-mâ-raa.

20. Ia vai mâ te fare, o vai atoa te tia i te amo i te hopoia?

²⁰ Tei te taatoaraa te parau no te hoê fare mâ—te metua vahine, te metua tane, te mau tamarii, e te mau manihini. Ua parau te hoê metua vahine no Kenya e vau tamarii ta ˈna: “Ua haapii ratou atoa i te rave i ta ratou tuhaa.” E hiˈo-maitai-hia te taatoaraa o te utuafare ahiri e mea mâ e mea nahonaho maitai te fare. Te na ô ra te hoê parau paari paniora e: “Eita te veve e faataupupu i te vai-mâ-raa.” Ia ora noa ˈtu te hoê taata i roto i te hoê aorai, te hoê piha aore ra te hoê fare au noa, aore ra te hoê tiahapa, ua riro te vai-mâ-raa ei ravea ia vai oraora maitai noa te hoê utuafare.

21. Ia au maite i te Maseli 31:28, na te aha e tauturu ia itehia te oaoa i roto i te hoê utuafare?

²¹ Te parau ra te buka Maseli no nia i te vahine maitai ra e: “E tia ta ˈna mau tamarii ma te faaora ia ˈna; e tana tane atoa, ma te haamaitai ia ˈna.” (Maseli 31:28) Eaha te taime hopea oe a haapopou ai i te hoê melo o te utuafare? E au mau tatou i te mau tiare te huru i te tau tupuraa raau o te ineine i te uaa ia noaa ia ratou te mahanahana e te haumi e au. E no tatou, e hinaaro tatou i te mahanahana o te haapopouraa. E tauturu te reira i te hoê vahine ia ite e te mauruuru ra ta ˈna tane i  ta ˈna haaraa e ta ˈna aupururaa ma te here e aita oia e haafaufaa ore ra ia ˈna. (Maseli 15:23; 25:11) E mea au atoa ia haapopou te hoê vahine i ta ˈna tane no ta ˈna ohipa i rapaeau e i roto atoa i te fare. E tupu maitai atoa te mau tamarii ia arue anaˈe to ratou nau metua ia ratou no ta ratou mau tutavaraa i te fare, i te fare haapiiraa, aore ra i roto i te amuiraa kerisetiano. Auê te rahi o te ohipa o ta te hoê parau rii haamauruururaa e faatupu! Eaha te pau ia parau anaˈe: “Mauruuru”? E pau iti roa, e faufaa rahi râ te noaa i te utuafare i te pae morare.

22. Eaha te titauhia ia “papu hoi” te hoê utuafare, e nafea te reira e naeahia ˈi?

²² No te mau tumu e rave rahi, e ere i te mea ohie ia faatere i te hoê utuafare. E nehenehe râ e ravehia ma te manuïa. Te na ô ra te hoê maseli o te Bibilia e: “E patuhia te fare i te paari e oti atu: e e papu hoi taua fare ra i te ite.” (Maseli 24:3) E noaahia te paari e te ite ia tutava anaˈe te utuafare taatoa no te haapii i te hinaaro o te Atua ma te faaohipa i te reira i roto i to ratou oraraa. Mea faufaa mau te tutavaraa ia itehia mai te hoê utuafare oaoa!