Pene 13

No te aha te oraraa i te hoê oraraa paieti e faatupu ai i te oaoa

1. No te aha tatou e nehenehe ai e parau e e faatupu te haereraa na nia i te eˈa o Iehova i te oaoa?

 E “ATUA [oaoa],” o Iehova e te hinaaro ra oia e ia oaoa oe i te oraraa. (Timoteo 1, 1:11) Ia na nia oe i to ˈna eˈa i te haere, e nehenehe oe iho e maitai mai e e ite i te hau hohonu e te vai maoro, mai te hoê anavai e tahe noa aita e hopearaa. E faaitoito atoa te haereraa te hoê taata na nia i te eˈa o te Atua ia ˈna ia rave tamau i te mau ohipa tia, “mai te are moana ra.” E faatupu hoi te reira i te oaoaraa mau.—Isaia 48:17, 18.

2. Nafea te mau kerisetiano e nehenehe ai e oaoa noa ˈtu â ïa e hamani-ino-hia ratou i te tahi taime?

² E riro paha te tahi feia i te parau e, ‘e mauiui te taata i te tahi taime ia rave ratou i te mea tia.’ Parau mau, e o te reira tei tupu i nia i te mau aposetolo a Iesu. Noa ˈtu â ïa e ua hamani-ino-hia ratou, ua oaoa râ ratou e ua haere e “haapii atu i te taata, e o Iesu â te Mesia.” (Ohipa 5:40-42) E nehenehe tatou e huti mai i te mau haapiiraa faufaa roa i taua ohipa i tupu ra. A tahi, eita te oraraa tatou i te hoê oraraa paieti e haapapu mai e e hamani-maitai-noa-hia tatou. Ua papai te aposetolo Paulo e “e te feia atoa e opua e haapao i te paieti ei roto â i te Mesia ra ia Iesu, e hamani-ino-atoa-hia ïa.” (Timoteo 2, 3:12) Te tumu o te reira, no te mea ïa te patoi nei o Satani e to ˈna ao i te feia e ora ra i te hoê oraraa paieti. (Ioane 15:18, 19; Petero 1, 5:8) Aita râ te oaoaraa mau i taaihia i te mau mea no rapaeau noa. No roto mai râ oia i te tiaturiraa papu e te rave mau ra tatou i te mea tia e no reira te Atua e farii mai ai ia tatou.—Mataio 5:10-12; Iakobo 1:2, 3; Petero 1, 4:13, 14.

3. Nafea te haamoriraa a Iehova ia ohipa i nia i te oraraa o te hoê taata?

 ³ Te vai ra te feia e manaˈo nei e e nehenehe e noaa ia ratou i te haamaitairaa a te Atua na roto i te haamoriraa ia ˈna i te tahi taime e moehia ˈtu o ˈna i te tahi atu taime. E ere te haamoriraa mau a te Atua ra o Iehova mai te reira te huru. E ohipa oia i nia i te haerea o te hoê taata i roto i to ˈna mau taime araraa atoa, i tera e tera mahana, i tera e tera matahiti. No reira oia e parauhia ˈi e “te eˈa.” (Ohipa 19:9; Isaia 30:21) E riro mau â ei oraraa paieti ia parau e ia ohipa tatou ia au maite i te Parau a te Atua.

4. No te aha e mea maitai ia rave i te mau tauiraa no te ora ia au i te mau haerea o te Atua?

⁴ Ia ite te feia e haapii apî ra i te Bibilia e e tia ia ratou ia rave i te tahi mau tauiraa i roto i to ratou oraraa e farii mai ai o Iehova ia ratou, e riro ratou i te uiui e, ‘E mea faufaa mau anei te oraraa i te hoê oraraa paieti?’ E nehenehe oe e papu e e mea faufaa mau â. No te aha? No te mea “e [here] hoi te Atua,” e e maitaihia tatou i to ˈna mau haerea. (Ioane 1, 4:8) E Atua paari atoa te Atua e ua ite oia eaha te mea maitai roa ˈˈe no tatou nei. I te mea hoi e e Atua puai hope o Iehova, e nehenehe ïa o ˈna e faaitoito mai ia tatou ia faarue roa tatou i te hoê peu ino e ia fariihia mai tatou e ana. (Philipi 4:13) E hiˈopoa anaˈe na tatou i te tahi mau faaueraa tumu no nia i te oraraa paieti e e hiˈo atu ai nafea râ te faaohiparaa tatou i te reira ia faatupu i te oaoa.

E NOAA MAI TE OAOA I TE HAEREA PARAU-TIA

5. Eaha ta te Bibilia e parau ra no nia i te haavare e te eiâ?

⁵ E “Atua parau mau” o Iehova. (Salamo 31:5) E mea papu, te hinaaro nei oe e pee i to ˈna hiˈoraa e ia itehia oe ei taata parau mau. E faatupu te haerea tia i te faatura ia ˈna iho e i te huru maitai. No te mea e peu matauhia te haerea tia ore i roto i teie nei ao hara e hinaaro ai te mau kerisetiano i teie nei faahaamanaˈoraa: “Ei parau mau ta te taata atoa ia parau atu i te tahi . . . O tei eiâ na, eiaha e eiâ faahou: a rave râ to ˈna iho rima i te mea maitai, ia faufaahia ta ˈna ia horoa na tei ere ra.” (Ephesia 4:25, 28) E faatupu te mau rave ohipa kerisetiano i te hoê mahana ohipa maitai mau. Mai te peu e eita to ratou paoti ohipa e faatia, eita ïa ratou e rave i te tahi mau taoˈa a to ratou mau fatu ohipa. I te vahi raveraa ohipa, i te fare haapiiraa, aore ra i te fare, e tia i te hoê taata haamori ia Iehova ia ‘haapao maitai i te mau mea  atoa.’ (Hebera 13:18) Te taata e faariro i te haavare e te eiâ ei peu na ˈna, eita roa ˈtu ïa te Atua e farii mai ia ˈna.—Deuteronomi 5:19; Apokalupo 21:8.

6. Nafea te haerea tia o te hoê taata paieti i te faahanahana ia Iehova?

⁶ Mea rahi te mau haamaitairaa e noaa mai i te haerea tia. E vahine ivi veve roa o Selina no Afirika o te here nei i te Atua ra o Iehova e i ta ˈna mau faaueraa tumu tia mau. I te hoê mahana, ua itehia ia ˈna te hoê pute e buka parau moni to roto e e tuhaa moni rarahi. Ua rave aˈera oia i te buka numera niuniu, e ua nehenehe aˈera e itea mai ia ˈna i te fatu na ˈna teie mau taoˈa—e taata e fare toa ta ˈna e ua eiâhia o ˈna. Ua maere roa teie taata i to Selina, noa ˈtu to ˈna maˈi, haereraa ˈtu e farerei ia ˈna e i te faahoˈiraa ˈtu i te pute e te mau mea atoa i roto. “E tia te hoê haerea tia mai te reira te huru ia haamauruuruhia,” o ta ˈna ïa i parau e ua toro atura na ˈna i te hoê tino moni. Te vahi faufaa roa ˈtu â, ua haafaahiahia teie taata i te haapaoraa a Selina. Oia mau, e faateitei mau â te mau ohipa tia i te haapiiraa a te Bibilia, e e faahanahana i te Atua ra o Iehova, e e faatupu i te oaoa i roto i te feia parau-tia e haamori ia ˈna.—Tito 2:10; Petero 1, 2:12.

E FAATUPU TE HURU HOROA MAITAI I TE OAOA

7. Eaha te vahi ino o te ohipa pere moni?

⁷ E itehia te oaoa i roto i te huru horoa maitai, inaha eita te feia nounou “e parahi i te basileia o te Atua.” (Korinetia 1, 6:10) Te tahi huru o te nounou o te pere moni ïa, tei riro ei ravea e monihia ˈi i te moni a te feia i pau. Eita o Iehova e farii i te feia “popore taoˈa i te mea tia ore.” (Timoteo 1, 3:8) Noa ˈtu e fariihia te ohipa pere moni e te ture e e pere te hoê taata no te faaarearea noa ia ˈna, e nehenehe o ˈna e riro roa i taua peu ra e e faahaere i mua i te hoê peu tei faaino roa e rave rahi taata. E nehenehe atoa te pere moni e haafifi i te utuafare o te taata pere, e toe mai e maa tuhaa iti moni haihai roa no te hoo mai i te mau mea e titauhia mai te maa e te ahu.—Timoteo 1, 6:10.

8. Mea nafea to Iesu vaiihoraa mai i te hoê hiˈoraa maitai roa i te pae no te horoa maitai, e nafea tatou ia horoa maitai?

⁸ No to ratou horoa maitai here mau, e oaoa roa te mau kerisetiano i te tauturu atu ia vetahi ê, i te mau hoa faaroo iho â râ e hepohepo ra. (Iakobo 2:15, 16) Hou Iesu e haere mai ai i nia i te fenua nei, ua ite oia i te huru horoa maitai o te Atua i te huitaata nei. (Ohipa 14:16, 17) Ua horoa o Iesu iho i to ˈna taime, i to ˈna  aravihi, e to ˈna atoa râ ora no te huitaata nei. No reira, mea tia mau atura ia ˈna ia parau: “E mea maitai i te horoa ˈtu i te rave mai.” (Ohipa 20:35) Ua faahiti atoa o Iesu i te parau no te hoê vahine ivi veve roa tei horoa maitai e piti nau lepeta i roto i te afata faufaa a te hiero, ia “hope roa a ˈna taoˈa rii navai ore i te tuuhia e a ˈna i roto.” (Mareko 12:41-44) Ua horoa te mau Iseraela i tahito ra e te mau kerisetiano o te senekele matamua i te mau hiˈoraa no te horoa maitai ma te oaoa na roto i te tururaa i te amuiraa i te pae materia e i te ohipa o te Basileia. (Paraleipomeno 1, 29:9; Korinetia 2, 9:11-14) Taa ê atu i te horoaraa i te mau ô materia no taua mau tuhaa ra, te faahanahana nei te mau kerisetiano o teie nei tau ma te oaoa, i te Atua e te faaohipa nei hoi i to ratou oraraa i roto i ta ˈna taviniraa. (Roma 12:1; Hebera 13:15) Te haamaitai maira Iehova ia ratou i te mea e te faaohipa nei ratou i to ratou taime, i to ratou itoito, e i te tahi atu mau faufaa, e oia atoa i ta ratou moni, no te turu i te haamoriraa mau e no te faahaere i mua i te ohipa pororaa i te parau apî maitai o te Basileia i roto i te ao taatoa nei.—Maseli 3:9, 10.

TE TAHI ATU MAU TUHAA E FAARAHI I TE OAOA

9. Eaha te mea ino i te inu-hua-raa i te mau ava taero?

⁹ Ia oaoa ratou, e tia atoa i te mau kerisetiano ia ‘mau maite i te ite.’ (Maseli 5:1, 2) E titau te reira ia taio e ia feruri hohonu ratou i nia i te Parau a te Atua e i te mau buka bibilia maitatai. Te vai nei râ te mau mea te tia ia haapae. Ei hiˈoraa, e nehenehe te inu-hua-raa i te mau ava taero e faaere i te hoê taata i te haavî i to ˈna manaˈo. Ia naeahia taua faito ra e taiata ïa e rave rahi taata, e e haavî uˈana, e e faatupu i te mau ati pohe. Eita ïa tatou e maere ia parau te Bibilia e eita te feia taero ava e parahi i te Basileia o te Atua! (Korinetia 1, 6:10) Ma te opua maite e “haapao maitai,” e haapae te mau kerisetiano mau i te inu hua i te ava, e e riro hoi te reira i te faarahi i te oaoa i rotopu ia ratou.—Tito 2:2-6.

10. (a) No te aha te mau kerisetiano e ore ai e puhipuhi i te avaava? (b) Eaha te mau haamaitairaa e noaa mai ia haapae tatou i te mau peu e faatîtî ra ia tatou?

¹⁰ E faatupu te hoê tino viivii ore i te oaoa. Inaha, e rave rahi tei hiaai ma te mâha ore i te raau taero ino mau. Ei hiˈoraa, a rave na i te parau no te puhipuhiraa i te avaava. Te faaite ra te Faanahonahoraa i te pae o te Oraora-maitai-raa o te Ao nei e te “haapohe nei [te puhipuhiraa i te avaava] e toru mirioni taata  i te matahiti hoê.” E riro te faaoreraa i te peu puhipuhi avaava ei fifi no te mau tapao ereraa poto e itea mai. I te tahi aˈe pae, te ite nei e rave rahi feia i puhipuhi na i te avaava e ua maitai mai to ratou tino e e rahi aˈe hoi ta ratou moni e toe mai no te mau mea e hinaarohia e te utuafare. Oia mau, e riro te upootiaraa i nia i te peu puhipuhi avaava aore ra i nia i te hiaai-mâha-ore-raa i te tahi atu mau taoˈa ino mau i te faatupu i te hoê tino viivii ore, i te hoê haava manaˈo mâ, e i te oaoa mau.—Korinetia 2, 7:1.

E OAOA I ROTO I TE FAAIPOIPORAA

11. Eaha te titauhia ia tia to tatou faaipoiporaa i mua i te ture e ia vai maoro ma te tura?

¹¹ E tia i te feia e ora amui ra ei tane e ei vahine ia papu e ua tapao-mau-hia anei to ratou faaipoiporaa e te ture tivila. (Mareko 12:17) E tia atoa ia ratou ia faariro i to ratou tiaraa taata faaipoipo ei hopoia faufaa roa. Parau mau, e titauhia paha te faataaraa mai te peu e eita e horoahia te mau mea e hinaarohia no te oraraa o te utuafare, ia rahi roa te hamani-ino-raa, aore ra ia fifi roa i te pae varua. (Timoteo 1, 5:8; Galatia 5:19-21) Tera râ, te faaitoito maira te mau parau a te aposetolo Paulo i roto i te Korinetia 1, 7:10-17 i te feia faaipoipo ia ora amui noa raua. Papu maitai ia nehenehe raua e oaoa mau, e tia ia raua ia here mau te tahi i te tahi. Ua papai o Paulo e: “Ia haamaitaihia te faaipoipo i te taata atoa ra, e te viivii ore hoi te roi; e haava hoi te Atua i te poreneia e te faaturi ra.” (Hebera 13:4) Te faataa ra te parau “te roi” i te parau no te taatiraa pae tino i roto i te hoê tane e te hoê vahine tei faaipoipohia i mua i te ture. Eita te tahi atu taatiraa i te pae tino, mai te faaipoiporaa hau atu i te hoê noa vahine, e nehenehe e parauhia e faaipoiporaa “haamaitaihia . . . i te taata atoa ra.” Hau atu, te faautua ra te Bibilia i te taatiraa hou te faaipoiporaa e i te peu mahu.—Roma 1:26, 27; Korinetia 1, 6:18.

12. Eaha vetahi mau hotu iino o te poreneia?

¹² E riro paha te poreneia i te faatupu i te tahi mau taime e navenave ai te tino ra, eita râ te reira e faatupu i te oaoa mau. Eita te Atua e au i te reira e e nehenehe atoa hoi e faaino tamau i te haava manaˈo o te taata. (Tesalonia 1, 4:3-5) E nehenehe e itehia te mau faahopearaa peapea o te taatiraa i rapaeau i te faaipoiporaa mai te SIDA e te tahi atu mau maˈi pee e parare na roto i te taatiraa i te pae tino. “Ua tapaohia e hau atu  i te 250 mirioni taata o te ao nei tei roohia i te mau matahiti atoa i te maˈi purumu parauhia blennorragie, e fatata e 50 mirioni i te maˈi purumu parauhia tona,” ta te tahi ïa parau i te pae no te rapaauraa e faahiti ra. Te vai atoa ra te fifi no te mau hapûraa hinaaro-ore-hia. Te faaite ra te Taatiraa a te mau nunaa no te faataimeraa i te fanau e, i roto i te ao taatoa nei, hau atu i te 15 mirioni tamahine i roto i te area matahiti 15 e tae atu i te 19 matahiti o te hapû ra i te mau matahiti atoa e hoê i nia i te toru o te haamarua nei i ta ratou aiû. Te faaite ra te hoê maimiraa e, i roto i te hoê fenua no Afirika, no te mau fifi e itehia maoti te haamaruaraa tamarii, e 72 i nia i te hanere o te feia pohe, no roto ïa i te mau tamahine i raro mai i te 20 matahiti. Eita paha vetahi feia poreneia e peehia i te hoê maˈi e e hapû, eita râ ratou e ape i te inoraa o te mau manaˈo hohonu. E rave rahi tei erehia i te faatura ia ratou iho e te faufau roa atoa ia ratou iho.

13. Eaha vetahi atu â mau fifi e faatupuhia e te faaturi, e eaha te tiai maira i te feia e tamau â i te riro ei poreneia e ei faaturi?

¹³ Noa ˈtu â ïa e e nehenehe e faaore i te hara a te faaturi, e niu papu maitai teie no roto mai i te mau Papai e nehenehe ai te taata i ore i rave i te hara e ani i te faataa. (Mataio 5:32; a faaau e te Hosea 3:1-5.) Ia mutu te hoê faaipoiporaa e o te taiataraa te tumu, e nehenehe te reira e vaiiho mai i te mau pepe hohonu mau, i roto i te hoa faaipoipo aita i rave i te hara e i nia i ta raua mau tamarii. No te maitai o te fetii taata nei, te faaite ra te Parau a te Atua e e faatae mai oia i ta ˈna haavaraa i nia i te mau poreneia e te mau faaturi e ore e tatarahapa. Hau atu, te faaite maramarama maitai ra te reira e te feia e rave i te peu tia ore i te pae taatiraa “e ore ratou e parahi i te basileia o te Atua ra.”—Galatia 5:19, 21.

“E ERE I TO TEIE NEI AO”

14. (a) Eaha vetahi mau peu haamori idolo e haapaehia e te hoê taata paieti? (b) Eaha te aratairaa e itehia i roto i te Ioane 17:14 e te Isaia 2:4?

¹⁴ Te feia e hinaaro ra e ia farii mai Iehova ia ratou e ia fanaˈo i te mau haamaitairaa a te Basileia, e haapae ïa ratou i te mau huru ohipa haamori idolo atoa. Te faaite ra te Bibilia e e ere roa ˈtu i te mea tano ia hamani e ia haamori i te mau hohoˈa, mai to te Mesia, aore ra to te metua vahine o Iesu, o Maria. (Exodo 20:4, 5; Ioane 1, 5:21) No reira, eita te mau kerisetiano mau e haamori i te mau hohoˈa faaroo penihia i nia i te raau, te mau  satauro, e te mau hohoˈa. E haapae atoa ratou i te mau huru haamoriraa idolo haavarevare, mai te haamoriraa i te reva e te himeneraa i te mau himene aiˈa e faahanahana ra i te mau nunaa. Ia faahepohia ratou e rave i taua mau huru ohipa ra, e haamanaˈo ïa ratou i te mau parau a Iesu ia Satani e na ô ra e: “O to Atua o Iehova ta oe e haamori, e oia anaˈe ra ta oe e faaroo.” (Mataio 4:8-10) Ua parau o Iesu i ta ˈna mau pǐpǐ e “e ere ratou i to teie nei ao.” (Ioane 17:14) Te auraa ra eiaha roa ˈtu e faaô atu i roto i te mau ohipa politita e ia ora ma te hau ia au i te Isaia 2:4, e na ô ra: “Na ˈna [te Atua ra o Iehova] e haava i roto i te mau [nunaa], e e faataa i te parau i te taata atoa e rave rahi; e tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”

15. Eaha mau na o Babulonia Rahi, e eaha ta te feia haapii apî i te Bibilia e rave rahi, i rave no te haere mai i rapae ia Babulonia Rahi?

¹⁵ Te auraa atoa o te parau ra “e ere i to teie nei ao”, te faaore-roa-raa  ïa i te mau amuimuiraa atoa e o “Babulonia Rahi,” te hau emepera o te haapaoraa hape o te ao nei. Ua parare roa te haamoriraa viivii mai Babulonia tahito atu e mau noa ˈtu te mau taata o te ao nei i raro aˈe i ta ˈna faatereraa ino i te pae varua. To roto ia “Babulonia Rahi” te taatoaraa o te mau haapaoraa aita te mau haapiiraa e te mau peu e tuati ra e te ite no nia i te Atua. (Apokalupo 17:1, 5, 15) Eita te feia haamori haapao maitai a Iehova e faaô ia ratou i roto i te mau taatiraa faaroo na roto i te apitiraa ˈtu i roto i te tahi atu mau haapaoraa aore ra na roto i te faahoaraa ˈtu i te pae varua e te tahi noa ˈˈe tuhaa no Babulonia Rahi. (Numera 25:1-9; Korinetia 2, 6:14) No reira, te faatae ra e rave rahi feia i haapii apî i te Bibilia, i te hoê rata e haapapu e te tatara ra ratou ia ratou i te mau haapaoraa e melo ratou i reira. Ua haafatata hoi te reira ia ratou i te Atua mau, mai tei tǎpǔhia mai e: “E haere mai outou i rapae au mai roto mai ia ratou ra, ia taa ê outou, [o ta Iehova ïa e parau ra,] e eiaha e rave noa ˈtu i te mea viivii ra; e na ˈu e farii atu ia outou.” (Korinetia 2, 6:17; Apokalupo 18:4, 5) E ere anei te  fariiraa mai to tatou Metua i te raˈi ra ia tatou o ta oe ïa e hinaaro mau ra?

A HIˈOPOA MAITE I TE MAU OROA O TE MATAHITI

16. No te aha te mau kerisetiano mau e ore ai e faatupu i te oroa Noela?

¹⁶ E faatiamâ te hoê oraraa paieti ia tatou i te faatupupinepine-raa i te mau mahana oroa teimaha a te ao nei. Ei hiˈoraa, aita te Bibilia e faaite maira ia tatou i te mahana mau o Iesu i fanauhia ˈi. ‘Ia manaˈo vau, ua fanauhia o Iesu i te 25 no titema!’ o ta vetahi pae paha e parau. Eita roa ˈtu no te mea ua pohe o ˈna i te tau uaaraa tiare i te matahiti 33 o to tatou nei tau i te 33 e te afaraa o to ˈna matahiti. Hau atu, i to ˈna fanauraahia, e tiai mamoe “te tia ra i roto i te mau aua, i te tiairaa i ta ratou mau nǎnǎ.” (Luka 2:8) I Iseraela, e taime toetoe roa te hopea avaˈe no titema, e tau ûa i reira te mau mamoe e vaiihohia ˈi i roto i te mau tamǎru no te paruru ia ratou i te po i te tau toetoe. Oia mau, ua faarirohia te 25 no titema na to Roma ei mahana fanauraa no to ratou atua mahana. Tau senekele i muri aˈe i to Iesu parahiraa i te fenua nei, ua farii te mau kerisetiano apotata i taua taio mahana nei no te faatupu i te oroa fanauraa o te Mesia. No reira, eita te mau kerisetiano mau e faatupu i te Noela aore ra i te tahi atu mahana oroa i niuhia i nia i te mau tiaturiraa faaroo hape. No te mea o Iehova anaˈe ta ratou e haamori, eita atoa ratou e haapao i te mau mahana oroa e faariro i te mau taata hara aore ra i te mau nunaa mai te mau atua ra te huru.

17. No te aha te feia paieti e ore ai e faatupu i te mau oroa mahana fanauraa, e noa ˈtu te reira no te aha te mau tamarii kerisetiano e oaoa ˈi?

¹⁷ E piti noa oroa mahana fanauraa ta te Bibilia e faahiti ra no nia e piti nau taata aore i tavini i te Atua. (Genese 40:20-22; Mataio 14:6-11) I te mea e aita te mau Papai e faaite ra i te taio mahana fanauraa o te taata tia roa ra o Iesu Mesia, no te aha ïa tatou e tâuˈa ˈi i te mahana fanauraa o te mau taata tia ore? (Koheleta 7:1) Parau mau, eita te mau metua paieti e tiai i te hoê mahana taa ê no te faaite i to ratou here i ta ratou mau tamarii. Teie ta te tahi tamahine kerisetiano 13 matahiti i parau: “E arearea atoa vau e to ˈu utuafare. . . . E mea fatata roa vau i to ˈu na metua e ia ani anaˈe te tahi atu mau tamarii e no te aha eita vau e faahanahana i te mau mahana oroa, e parau vau ia ratou e e faahanahana vau i te mau mahana atoa.” Teie ta te tahi taurearea  kerisetiano 17 matahiti i parau: “I to matou fare, e horoahia te mau ô i te roaraa o te matahiti.” E oaoa rahi te itehia ia horoahia te mau taoˈa ma te ore e tapea.

18. Eaha te hoê oroa ta Iesu i faaue i ta ˈna mau pǐpǐ e haapao, e e faahaamanaˈo mai te reira ia tatou i te aha?

¹⁸ No te feia e tamau na i te ora i te hoê oraraa paieti, te vai ra te hoê mahana i roto i te matahiti te tia ia haapao-taa-ê-hia. O te Amuraa Maa Ahiahi ïa a te Fatu, pinepine i te piihia te Oroa Haamanaˈoraa i te poheraa o te Mesia. No taua oroa ra, ua faaue maira o Iesu i ta ˈna mau pǐpǐ e: “E na reira outou ei manaˈoraa ia ˈu.” (Luka 22:19, 20; Korinetia 1, 11:23-25) Ia Iesu i faatupu i taua oroa ra i te rui o te 14 no Nisana o te matahiti 33 o to tatou nei tau, ua rave oia i te pane faahopue-ore-hia e te uaina uteute, taipe no to ˈna tino taata hara ore e no to ˈna toto tia roa. (Mataio 26:26-29) Na te mau kerisetiano faatavaihia i te varua moˈa o te Atua e amu e e inu i teie mau taipe. Ua fariihia ratou i roto i te faufaa apî e te faufaa i faaauhia no te Basileia, e te tiaturi ra hoi ratou e ora i nia i te raˈi. (Luka 12:32; 22:20, 28-30; Roma 8:16, 17; Apokalupo 14:1-5) Tera râ, e mau haamaitairaa te itehia e te feia atoa e tae atu i te ahiahi e tano i te 14 no Nisana i nia i te kalena tahito ati Iuda. E haamanaˈo ratou i te here ta te Atua ra o Iehova e ta Iesu Mesia i faaite, no te hoo o te tusia taraehara ta ˈna i horoa e nehenehe ai te ora mure ore e noaa i te feia ta te Atua e farii.—Mataio 20:28; Ioane 3:16.

TE OHIPA E TE PEU FAAANAANATAERAA MANAˈO

19. Eaha te fifi ta te mau kerisetiano e faaruru ia noaa ia ratou i te mau mea e hinaarohia no te oraraa?

¹⁹ E tia i te mau kerisetiano mau ia rave puai i te ohipa ia noaa ia ratou i te mau mea e hinaarohia e ratou. Ia na reira ratou, e oaoa mau ai te mau upoo utuafare. (Tesalonia 1, 4:11, 12) Papu maitai, ia ore te ohipa a te hoê kerisetiano e tuati i te Bibilia, e erehia o ˈna i te oaoa. Inaha, i te tahi mau taime mea fifi ia itea mai i te hoê kerisetiano i te ohipa e tano i te mau faaueraa a te Bibilia. Ei hiˈoraa, i te tahi taime e ani te mau fatu ohipa i ta ratou mau rave ohipa e haavare atu i te feia e haere mai e hoo i te hoê taoˈa. I te tahi aˈe pae, e faaau e rave rahi mau fatu ohipa ia ratou iho i te haava manaˈo o te taata rave ohipa haerea parau-tia, no te mea eita ratou e hinaaro ia erehia ratou i te hoê rave ohipa e nehenehe e tiaturihia. Noa ˈtu eaha te ohipa e tupu,  e nehenehe oe e tiaturi e e haamaitai mai te Atua i ta oe mau tutavaraa ia noaa mai ta oe ohipa e ei haava manaˈo viivii ore noa to oe.—Korinetia 2, 4:2.

20. No te aha e tia ia tatou ia maiti i ta tatou mau faaanaanataeraa manaˈo?

²⁰ I te mea e te hinaaro maira te Atua e ia oaoa ta ˈna mau tavini, e tia ïa ia tatou ia faaaifaito i te ohipa e te mau taime haamâharaa i te rohirohi ma te arearea e te faafaaea rii. (Mareko 6:31; Koheleta 3:12, 13) Te faahaere nei te ao a Satani i te mau peu faaanaanataeraa manaˈo paieti ore i mua. Ia farii mai râ te Atua ia tatou, e tia ia tatou ia maiti i te mau buka ta tatou e taio, i te mau porotarama radio e te pehe ta tatou e faaroo, e tae noa ˈtu i te mau hautiraa upaupa, te mau hohoˈa taviri, te ohipa taaro, te mau porotarama afata teata, e te mau ripene video ta tatou e mataitai. Mai te peu e te faaanaanataeraa manaˈo ta tatou i maiti i mutaa ihora aita e tano ra i te mau faaararaa i roto i te mau irava mai te Deuteronomi 18:10-12, Salamo 11:5, e te Ephesia 5:3-5, e farii mai ïa Iehova ia tatou e e rahi aˈe hoi tatou i te oaoa ia taui anaˈe tatou.

FAATURA I TE ORA E TE TOTO

21. Nafea te parau no te faaturaraa i te ora ia ohipa i nia i to tatou manaˈo no nia i te haamaruaraa tamarii, mai nia atoa i ta tatou mau peu i matau e i to tatou haerea?

²¹ Ia oaoa mau tatou, e tia ia tatou ia faariro i te ora o te taata ei mea moˈa, mai ta Iehova e faariro ra. Te opani maira ta ˈna Parau ia tatou ia taparahi pohe i te taata. (Mataio 19:16-18) Inaha, te faaite ra te Ture a te Atua i to Iseraela e mea faufaa roa na ˈna i te ora o te aiû i roto i te opu—e ere te hoê mea o te tia ia haamouhia. (Exodo 21:22, 23) No reira, eita e tia ia tatou ia faariro i te ora mai te hoê mea faufaa ore na roto i te puhipuhiraa i te avaava, i te rave-ino-raa i to tatou tino i te raau taero aore ra i te ava taero, aore ra i te faaû-faufaa-ore-raa i te ati. Eita atoa tatou e faaô ia tatou i roto i te tahi mau ohipa e fifi ai to tatou ora e eita atoa hoi tatou e haafaufaa ore i te mau ravea parururaa e roohia ˈtu ai tatou i te utua toto.—Deuteronomi 22:8.

22. (a) Eaha te hiˈoraa paieti no nia i te toto e te faaohiparaa i te toto? (b) To vai anaˈe râ toto o te nehenehe mau e faaora i te hoê taata?

²² Ua faaite mai o Iehova ia Noa e i to ˈna utuafare e ua faaau o ˈna i te toto ei nephe, aore ra ora. No reira, ua opani roa te Atua ia ratou ia amu i te toto noa ˈtu eaha te huru. (Genese 9:3, 4) I te  mea e e huaai tatou na ratou, no tatou paatoa ïa taua ture ra. Ua parau atu o Iehova i to Iseraela e ia maniihia te toto i nia i te repo e ia ore e faaohipahia no te mau opuaraa a te taata e tia ˈi. (Deuteronomi 12:15, 16) E ua faahiti-faahou-hia te ture a te Atua no nia i te toto a faauehia ˈtu ai i te mau kerisetiano matamua e: “Eiaha outou e amu i . . . te toto.” (Ohipa 15:28, 29) No te faatura i te huru moˈa o te ora, eita te nunaa paieti o te Atua e farii i te mau pâmuraa toto, noa ˈtu e e onoono mai te tahi pae i te parauraa mai e e faaora taua ravea ra i te taata. E rave rahi mau ravea rapaauraa e fariihia e te mau Ite no Iehova tei ite-papu-hia to ratou maitai e eita hoi te taata e faaruru atu i te mau tupuraa atâta o te mau pâmuraa toto. Ua ite te mau kerisetiano e o te toto manii anaˈe o Iesu, te nehenehe mau e faaora i te taata. Ia tiaturi tatou i te reira, e faaorehia mai ïa ta tatou mau hara e e noaa atoa ia tatou i te tiaturiraa o te ora mure.—Ephesia 1:7.

23. Eaha te tahi mau haamaitairaa e noaa mai ia ora tatou i te hoê oraraa paieti?

²³ Ma te papu maitai, e titau te oraraa paieti i te tutavaraa. E riro paha tatou i te faaooohia mai e te mau melo o to tatou mau fetii aore ra e te feia matau. (Mataio 10:32-39; Petero 1, 4:4) Tera râ, te mau haamaitairaa e noaa mai i te oraraa i taua huru oraraa ra, e hau aˈe ïa i te mau tamataraa. E faatupu te hoê oraraa paieti i te haava manaˈo viivii ore e e fanaˈo hoi tatou i te auhoaraa maitai o te feia e haamori ia Iehova. (Mataio 19:27, 29) No reira, a feruri atoa na i te ora mure ore i roto i te ao apî parau-tia a te Atua. (Isaia 65:17, 18) E auê i te oaoa ia faaohipa tatou i te aˈoraa a te Bibilia e ia faaoaoa tatou i te mafatu o Iehova e! (Maseli 27:11) Eita ˈtura ïa tatou e maere e e faatupu te oraraa tatou i te hoê oraraa paieti, i te oaoa mau!—Salamo 128:1, 2.

A HIˈOPOA NA I TO OE ITE

Eaha vetahi mau tumu e haapapu ra e no te aha te hoê oraraa paieti e faatupu ai i te oaoa?

E titau te oraraa paieti i teihea mau tauiraa?

No te aha oe e hinaaro ai i te oraraa paieti?

[Uiraa haapiiraa]

[Hohoˈa i te mau api 124, 125]

E faaoaoa te faaaifaitoraa i te mau ohipa i te pae varua e te mau tau faafaaearaa i te feia e ora ra i te hoê oraraa paieti