Mai to ˈu tamariiraa, mea au roa na ˈu te natura, pinepine to matou utuafare i te haere e ori haere, e mataitai i te mau uru raau nehenehe mau e te mau roto e vai ra i to matou oire o Jyväskylä i Filelane. Mea au roa atoa na ˈu te animara, ite anaˈe au i te hoê mimi aore ra urî, oioi roa vau i te hinaaro e rave mai i roto i to ˈu rima. Ite anaˈe au i te taata ia hamani ino i te animara, eita vau e au. No reira vau i faaô ai i roto i te hoê taatiraa e paruru i te animara. Mea na reira to ˈu farereiraa i te tahi atu mau taata hoê â fa ta matou.

Ua opere atoa matou i te api parau e ua taahi atoa no te patoi i te mau fare toa e hoo nei i te mau taoˈa hamanihia i te huruhuru animara, e oia atoa, i te mau tamatamataraa e ravehia i nia i te animara. Ua haamau matou i te hoê taatiraa apî no te paruru i te mau animara. No ta matou faahuehueraa, ua tapeahia matou e te mutoi e ua horo-atoa-hia i mua i te haavaraa e rave rahi taime.

Ua haapeapea atoa vau no te mau ohipa e tupu ra na te ao, te tumu ïa vau i turu ai e rave rau taatiraa e paruru i te tiaraa o te taata, oia atoa i te natura mai te Amnesty International e te Greenpeace. Ua horoa taatoa vau ia ˈu i roto i te ohipa a teie mau taatiraa. Ua tamata atoa vau i te paruru i te feia veve, te feia e pohe i te poia e te feia riirii.

Ua taa ia ˈu e eita e tia ia ˈu ia faaafaro i te mau fifi e tupu ra na te ao. Na roto i te mau taatiraa, ua roaa rii ia faaafaro i te tahi mau fifi, te mau fifi rahi râ, aita ïa, ua ino roa ˈtu te reira! Mai te huru ra e tei raro aˈe te ao taatoa i te mana o te mau varua ino, aita râ te taata e tâuˈa nei. Ua topa roa to ˈu morare!

No to ˈu hepohepo rahi, ua haamata vau i te feruri i te Atua e i te Bibilia. Ua haapii aˈena vau e te mau Ite no Iehova e mea maitai roa ratou i nia iho ia ˈu. Aita râ vau i rave i te mau tauiraa i roto i to ˈu oraraa. I teie râ taime, mea taa ê!

Ua haamata vau i te taio i ta ˈu Bibilia e ua ite au e rave rahi irava e parau ra ia hamani maitai i te animara mai te Maseli 12:10 e parau ra, ‘e haapao â te taata parau-tia ra i ta ˈna ra animara.’ Ua taa atoa ia ˈu e ere te Atua te tumu o te mau fifi e tupu ra na te ao, o te taata râ te ore e pee ra i te mau aratairaa Bibilia. Ua faahiahia roa râ vau i te here e te faaoromai faito ore o Iehova, ua tamahanahana mau te reira ia ˈu!—Salamo 103:8-14.

Ua faaî au i te hoê api parau no te ani ia afaihia mai te hoê buka Eaha ta te Bibilia e haapii mau ra? Na te hoê taeae e ta ˈna vahine i afai mai i te reira i te fare e haamata ˈtura vau i te haapii i te Bibilia. Ua apiti atoa vau i te mau putuputuraa e mea na reira te parau mau i te aˈaraa i roto i to ˈu aau.

Ua maitai roa mai to ˈu oraraa i to ˈu haapiiraa i te Bibilia. Ua faaea vau i te puhipuhi i te avaava, i te inu hua i te ava e ua taui roa to ˈu huru rapaeau e ta ˈu huru paraparau. Ua taui atoa vau i ta ˈu huru hiˈoraa i te feia mana. (Roma 13:1) Ua faarue atoa vau i ta ˈu mau peu haapaoraa ore i te pae taotoraa.

Te mea fifi roa ˈˈe no ˈu, o te tauiraa ïa i ta ˈu huru hiˈoraa i te mau taatiraa ta ˈu i turu na. Ia tatara mai au ia ˈu i teie mau taatiraa, mai te huru te faarue ra vau ia ratou! Ua haamanaˈo râ vau o te Faatereraa arii anaˈe a te Atua te nehenehe e faatitiaifaro i te mau fifi atoa na te ao. No reira vau e turu papu ai i tera Faatereraa arii e e tauturu ai i te taata ia haapii i te parau mau.—Mataio 6:33.

I manaˈo na vau e piti anaˈe pǔpǔ taata i teie mahana, te feia maitai e te feia ino. E mai te peu e e rave te hoê taata i te ino, e enemi ïa oia no ˈu. Auaa râ te Parau a te Atua, ua faaea vau i te hiˈo ino e ua tutava i te here i te mau huru taata atoa ma te faaite ia ratou i te parau apî oaoa o te Faatereraa arii a te Atua. (Mataio 5:44) Te tauturu ra teie ohipa pororaa i te taata ia faatupu i te hau, ia oaoa i teie nei â e ia fanaˈo i te hoê tiaturiraa papu no a muri aˈe.

I teie nei, ua papu ia ˈu e eita to tatou Atua poiete e vaiiho ia hamani-ino-hia te animara e te taata e a muri noa ˈtu! Eita atoa o ˈna e vaiiho ia tuino-roa-hia te fenua! E faaohipa râ o ˈna i ta ˈna Faatereraa arii no te faaore i te mau ohipa ino atoa. Aita ïa vau e haapeapea faahou ra, fatata hoi Iehova i te faatitiaifaro i teie mau fifi atoa! (Isaia 11:1-9) Te oaoa nei au i te ite i teie mau parau fafau e i te tauturu ia vetahi ê ia tiaturi atoa i te reira! E ere na ˈu e taui i te tupuraa o te ao, na te Atua râ!