Pene 6

Ua tupu mau anei te mau semeio?

Tei te matahiti 31 tatou o to tatou nei tau. Te haere tia ra Iesu e ta ˈna mau pǐpǐ i Naina, te hoê oire i te pae apatoerau no Paletetina. A fatata noa ˈtu ai ratou i te mau uputa o te oire, ua ite atura ratou i te mau taata e rave rahi e apee ra i te hoê taata pohe. Te hopoihia ra te tino pohe o te hoê taurearea, te tamaiti otahi a te tahi vahine ivi e vai noa mai atura ïa i teie nei o ˈna anaˈe. E faaroo anaˈe na eaha ta te aamu e parau ra i muri iho: ‘Ma te aroha ia ˈna, ua na ô atura Iesu ia ˈna e: “Eiaha e oto.” E, a haafatata noa ˈtu ai oia, ua tapea ˈtura oia i te iri hopoi ra (faaea noa ihora te feia i hopoi), na ô atura: “E teie nei taata apî, a tia, te parau atu nei au ia oe.” Ua tia maira taua taata i pohe ra i nia, e ua parau maira.’ — Luka 7:11-15.

1. (A faaô mai i te parau omuaraa.) a) Eaha te semeio ta Iesu i faatupu i pihai atu i te oire no Naina? b) Eaha te faufaaraa o te mau semeio i roto i te Bibilia, teie râ, te tiaturi ra anei te taatoaraa o te taata i te reira?

 E HAAPUTAPÛ mau teie aamu i te aau, tera râ, e aamu mau anei? Mea fifi roa na te rahiraa o te taata ia farii e ua tupu mau iho â te mau ohipa mai teie te huru. Ua riro râ hoi te mau semeio ei tuhaa no te mau Papai. Eita ˈtura ïa ta tatou e nehenehe e tiaturi i te Bibilia mai te peu e eita tatou e tiaturi i ta ˈna mau semeio. I te tahi aˈe pae, tei nia te taatoaraa o te mau parau mau bibilia i te hoê semeio faufaa roa i te vairaa, oia hoi: te faatia-faahou-raahia mai Iesu Mesia mai te pohe mai.

 No te aha vetahi pae e ore ai e tiaturi

2, 3. Eaha te manaˈo e horoahia ra e te taata tuatapapa philosopho ekotia ra o David Hume no te tamata i te faaite e aita te mau semeio e tupu ra?

² E outou, te tiaturi ra anei outou i te mau semeio? Aore ra te manaˈo ra anei outou e i to tatou nei anotau maramarama, e ere i te mea tano ia tiaturi tatou i te tahi mau ohipa faahiahia hoi i tupu e ua hau ê i te puai taata nei? E ere outou i te taata matamua o te ore roa ˈtu e tiaturi i te mau semeio. E piti senekele i teie nei, aita atoa te taata tuatapapa philosopho ekotia ra o David Hume i tiaturi. Peneiaˈe hoê â to outou manaˈo e to ˈna e ore ai outou e tiaturi.

³ Ia au i teie taata o Hume, e toru fifi faufaa roa e farereihia i roto i te parau no te semeio​¹. A tahi, o ta ˈna ïa e papai ra, “te hoê semeio, te oreraa ïa e faatura i te mau ture o te natura”. Mai te tau mai â, ua turui noa te taata i nia i te mau ture o te natura. Ua haapii atoa hoi oia e e topa te mau taoˈa atoa i raro ia tuu tatou, e tia mai te mahana i te mau poipoi atoa, e topa i te mau ahiahi atoa. Ua ite o ˈna e e tupu noa te mau ohipa ia au i te mau ture o ta ˈna i matau e aita hoê noa ˈˈe mea e nehenehe e haere mai e haafifi i taua mau ture o te natura ra. E “haapapuraa taatoa teie, ta Hume ïa e parau ra, hoê â huru e te hoê manaˈo no roto mai i te ohipa i tamatahia” no te patoi i te tupuraa o te hoê semeio.

4, 5. Eaha ˈtu â na manaˈo faahapa e piti ta David Hume e horoa ra no nia i te semeio?

⁴ Te piti o ta ˈna haapapuraa, teie ïa, mea ohie roa ia haavare i te taata. Te hinaaro nei vetahi pae e tiaturi i te mau mea faahiahia e i te mau semeio, i te pae iho â râ no te haapaoraa, e inaha, ua riro atura ïa e rave rahi mau semeio ei mau ohipa e manaˈohia e mea mau, area râ hoi e mea hape. E te toru o te haapapuraa, e pinepine i te faaroohia i te parau no te mau semeio i te mau anotau poiri. Rahi noa ˈtu â te taata i te maramarama, iti atoa ïa i te faahitihia i te parau no te mau semeio. Ei faahiti-faahou-raa i te mau parau a Hume, “eita te mau ohipa faahiahia mai teie te huru e  tupu i to tatou nei tau”. E ua faaoti aˈera o Hume i to ˈna manaˈo i te na ôraa e aita taua mau ohipa ra i tupu.

⁵ I teie mahana, te pee ra te rahiraa o te mau manaˈo faahapa e horoahia ra no nia i te mau semeio i te tatararaa a Hume. E tuatapapa maite anaˈe na i taua tatararaa na ˈna ra.

Aita te mau ture o te natura e faaturahia ra?

6. No te aha e ere roa ˈtu i te mea tano ia ore e farii i te mau semeio i te parauraa e ‘o te mau ture o te natura teie e ore e faaturahia ra’?

⁶ Eaha ïa te nehenehe e parau no nia i te manaˈo faahapa ra oia hoi ua riro te mau semeio ei ‘oreraa e faatura i te mau ture o te natura’ e eita ˈtura ïa e nehenehe e parau e ua tupu mau â taua mau semeio ra? I te hiˈoraa matamua, mai te huru ra ïa e e manaˈo papu teie; teie râ, e faahohonu anaˈe na i te mau mea. I te paeau rahi, e tatarahia te parau no te semeio mai te hoê ohipa e tupu i rapaeau mai i te mau ture matauhia o te natura *. No te maere o taua ohipa ra, i taua taime iho, e parau ai te mau taata i ite atu i te reira e na te hoê puai i hau ê i te puai taata nei i faatupu i te reira. Ei haapoto-noa-raa, teie te auraa o taua faahaparaa matamua ra: ‘Eita te mau semeio e nehenehe e tupu... no te mea e semeio teie!’ Maoti râ hoi i te faaoti oioi noa i te manaˈo, no te aha ïa e ore ai e tuatapapa na mua i te mau ohipa i tupu?

7, 8. a) No te aha te manaˈo o te mau taata aivanaa i teie mahana e ore ai e papu maitai no nia i te mau mea e faatiahia ra aore ra eita e te mau ture o te natura ta tatou i matau? b) Eaha ta te taata e tiaturi ra i te Atua e tia ia farii no nia i to ˈna mana i te pae no te faatupuraa i te mau ohipa matau-ore-hia?

⁷ I te parau mau, aita te mau taata maramarama i teie mahana e ru faahou nei mai ia David Hume i te parauraa e te tano noa nei te mau ture matauhia o te natura i te mau taime atoa e i te mau vahi atoa. Te uiui nei te mau taata  aivanaa e mai te peu e, taa ê atu i na faito e toru i matauhia e tatou oia hoi — te roa, te aano e te teitei —, eita ïa e itehia i roto i te ao nei e rave rahi atu â mau faito​². Te horoa nei ratou i te tahi mau manaˈo tumu ore no nia i te vairaa mau o te mau apoo ereere, te mau fetia rarahi teie e topa nei i nia ia ratou iho e taea-roa-hia ˈtu ai i te hoê faito uˈana aita e faaauraa. Te parauhia ra e, na te hiti ia ratou, te fifi nei te huru o te reva e inaha, te mau atoa nei hoi te tereraa o te tau iho​³. Ua parau atoa te mau taata aivanaa e, i roto i te tahi mau tupuraa, e nehenehe te tau e huri no te hoˈi faahou i muri​⁴!

⁸ Ma te faahiti i te parau e faaite mai e mea nafea te ao nei i te haamataraa, te na ô ra o Stephen W. Hawking, orometua haapii i te mau numera i te Haapiiraa tuatoru no Cambridge e: “Ia au i te haapiiraa i matauhia o tei parauhia relativité générale (...), ua haamata te ao nei na roto i te hoê tupuraa huru ê roa o tei amui mai i te meumeuraa otia ore e te feferaa o te area-taime. I roto i teie mau huru tupuraa, e taui roa ïa te mau ture atoa i matauhia i te pae no te tuatapaparaa i te mau huru o te mau taoˈa​⁵.” Aita ˈtura ïa te mau taata aivanaa e manaˈo ra e aita e ohipa e nehenehe e tupu e tei ore hoi i tu i te mau ture matauhia o te natura nei. E nehenehe mau hoi te tahi mau huru tupuraa matau-ore-hia e faatupu mai i te mau ohipa maere mau. Te tiaturiraa i te hoê Atua mana hope, te farii-atoa-raa ïa e e mana to ˈna no te faatupu i te tahi mau ohipa matau-ore-hia, aore ra semeio, ia titau ta ˈna mau opuaraa i te reira. — Exodo 15:6-10; Isaia 40:13, 15.

E ohipa haavare?

9. Mea tano anei ia parau e mea haavare te tahi mau semeio? A haapapu mai i ta outou pahonoraa.

⁹ Aita e taata e ore e nehenehe e parau mai e e haavare te tahi mau semeio. Ei hiˈoraa, te parau nei vetahi mau taata e e nehenehe ta ratou e faaora i te maˈi na roto i te tahi mau semeio “maoti te faaroo”. Ua tuatapapa te hoê taote o William A. Nolan te iˈoa i taua huru faaoraraa maˈi  ra. Ua tuatapapa o ˈna e rave rahi mau “faaoraraa maˈi” i ravehia i te mau Etats-Unis, na te tahi mau taata rapaau haavare poro evanelia, e tae noa ˈtu i Asia, na te tahi mau taote tǎpǔ “e faaohipa na i te tahi huru manamana”. Eaha ihora ïa te faahopearaa o ta ˈna titorotororaa? Te taatoaraa o te mau “faaoraraa maˈi” ta ˈna i tapao mai, i roto i ta ˈna tuatapaparaa, e mau faaoraraa haavare anaˈe ïa​⁶.

10. I to outou manaˈo, mea haavare anei te mau semeio atoa no te mea ua haapapuhia mai e e mea haavare vetahi?

¹⁰ E tia anei ïa ia faaoti e aita te mau semeio mau i tupu aˈenei? Eita. Ia ite tatou e te faahaere-noa-hia nei te moni haavare, e te tuu nei te tahi mau taata maˈi i to ratou tiaturiraa taatoa i roto i te mau taata haavare e titau hoi i te moni rahi, aore ra ia peni te mau taata peni i te mau hohoˈa a te mau taata peni tuiroo, te parauhia ra anei e mea haavare anaˈe te taatoaraa o te mau moni, e e mau taata eiâ anaˈe te taatoaraa o te mau taote aore ra mea hape anaˈe te taatoaraa o te mau hohoˈa peni? Oia atoa, aita te haavare o te tahi mau semeio e haapapu noa ˈˈera e eita te mau semeio mau e tupu.

‘Eita te mau semeio e tupu i teie mahana’

11. Eaha te toru o te manaˈo faahapa o David Hume i te mau semeio?

¹¹ Te toru o te manaˈo faahapa o David Hume i te mau semeio, teie ïa: “Eita te mau ohipa faahiahia mai teie te huru e tupu i to tatou nei tau.” Aita o ˈna i hinaaro e tiaturi i te mau semeio no te mea aitâ o ˈna i ite aˈenei. E ere râ hoi ta ˈna huru feruriraa i te mea tano. E tia i te mau taata atoa i noaa ia ratou i te tahi mau haamaramaramaraa ia farii e na mua ˈˈe i te fanauraahia mai taua taata tuatapapa  philosopho ekotia ra, ua tupu aˈena te tahi mau “ohipa faahiahia” e aita hoi i tupu faahou i to ˈna vai-ora-raa ra. Eaha ïa mau ohipa?

12. Eaha vetahi mau ohipa faahiahia mau i tupu i mutaa ihora ta te mau ture o te natura nei e ore e nehenehe e faataa mai?

¹² A tahi, te faraa mai te ora i nia i te fenua nei, e i muri iho, te faraa mai te tahi mau huru ora tei ite i te haapaoraa, e i te pae hopea, te ora o te taata, te nehenehe e noaa ia ˈna i te paari, te feruriraa, te hiroa no te here e te hoê haava manaˈo. Aita e taata aivanaa e nehenehe e parau, ia rave mai oia i te mau ture e faatere ra i te natura i teie mahana, e mea nafea râ taua mau ohipa faahiahia mau ra i te tupuraa. Teie nei râ, mea rahi te mau haapapuraa ora mau e faaite maira e ua tupu mau iho â te reira.

13, 14. Eaha te mau ohipa matauhia i teie mahana o te nehenehe e riro ei semeio no David Hume?

¹³ E faahiti atoa anaˈe na i te parau no te tahi mau “ohipa faahiahia” i tupu mai te tau mai â o David Hume. A feruri na e ia hoˈi outou i muri i te tau, e hinaaro outou e faataa ˈtu ia ˈna i te parau no teie nei tau. A tamata i te faataa ˈtu ia ˈna e e nehenehe te hoê taata ona no Hambourg e paraparau i te hoê taata i Tokyo, i te tahi tau tausani kilometera te atearaa, e aita e faufaa na ˈna ia haapuai i te paraparau; e nehenehe te hoê tueraa popo e hautihia i Paniora e itehia, i te taime iho e hautihia ˈi, i roto i te fenua taatoa nei; aore ra e nehenehe te tahi mau faurao, rahi aˈe hoi i te mau pahi o to ˈna tau, e faarue mai i te fenua nei e e reva ˈtu ai i roto i te reva ma te hopoi atu e 500 taata oia hoi, i te tahi noa tau hora, tei tere te tahi tau tausani kilometera te atea. Te taa ra iho â ïa ia outou i ta ˈna pahonoraa: ‘Eita e nehenehe! Eita te mau ohipa faahiahia mai teie te huru e tupu i to tatou nei tau.’

¹⁴ Inaha hoi, aita anei te mau ‘ohipa faahiahia’ mai teie te huru i tupu i to tatou nei tau? Eaha hoi te tumu? No te mea, na roto i te faaohiparaa i te mau ture i te pae aivanaa ta Hume i ore roa ˈtu i ite, ua hamani te taata i te niuniu paraparau, te afata teata e te manureva. No reira, mea fifi anei ia tiaturi e ua faatupu te Atua i mutaa ihora, na roto i  te hoê ravea ta tatou e ore e taa ra, i te tahi mau ohipa tei riro ei semeio no tatou?

Nafea hoi e ite ai i te reira?

15, 16. Eaha te ravea hoê roa no tatou nei e ite atu ai tatou e ua tupu mau anei te mau semeio? A faahohoˈa mai i ta outou pahonoraa.

¹⁵ Parau mau, eita e navai i te parau-noa-raa e ua nehenehe te tahi mau semeio e tupu e haapapuhia ˈi e ua tupu mau iho â. Nafea ia ite i teie nei senekele e XX mai te peu e ua faatupu mau â te Atua, i roto i te mau tau bibilia, i te tahi mau semeio na roto i te arai o te mau taata i tavini na ia ˈna i nia i te fenua nei? Eaha te huru haapapuraa ta tatou e nehenehe e tiaturi e e itea mai ia tatou? E feruri anaˈe na e e tatarahia mai te hoê taata no roto mai i te hoê pǔpǔ taata e ora noa ra mai tahito ra, mai roto mai i te uru raau no reira oia i te fanauraahia, e aratai atu ai ia ˈna e haamataitai i te hoê oire rahi. Nafea ïa o ˈna e nehenehe ai, ia hoˈi mai o ˈna, e faataa ˈtu i to ˈna pǔpǔ taata i te mau ohipa faahiahia o te mau mea o ta ˈna i ite? Papu iho â ïa e eita ta ˈna e nehenehe e faataa mai e mea nafea râ te hoê pereoo ia tere, aore ra na te aha e rave e ia faaroohia te pehe i roto i te hoê afata radio afaifai. Eita atoa ta ˈna e nehenehe e haapapu mai e te vai mau ra te mau matini roro uira na roto i te hamaniraa i te tahi matini. Ta ˈna e nehenehe e rave, te faatia-noa-raa ˈtu ïa i te mau ohipa o ta ˈna i ite.

¹⁶ Area tatou nei, hoê â ïa to tatou huru e te mau melo o to ˈna puhapa. No te iteraa e mai te peu e ua faatupu mau â te Atua i te tahi mau semeio, te vai nei ia tatou nei te faaiteraa otahi roa o te mau taata hiˈopoa o te nehenehe noa e faataa mai i te mau mea o ta ratou i ite ma te ore râ e haamaramarama mai, aore ra e faatupu faahou mai i te  reira. Inaha, ma te papu maitai, e nehenehe te mau taata i ite roa ˈtu i taua ohipa ra e haavarehia. Mea ohie roa atoa no ratou ia faarahi roa i te parau e ia horoa i te tahi mau haamaramaramaraa hape. Na mua ˈˈe e tiaturi atu ai i ta ratou parau, e tia ia tatou ia papu maitai e e nehenehe mau anei ratou e tiaturihia e eaha to ratou huru i te pae morare e te rotahi o to ratou mau manaˈo hohonu.

Te semeio i haapapu-rahi-roa ˈˈe-hia

17. a) Eaha te semeio o te Bibilia tei haapapu-rahi-roa ˈˈe-hia? b) Eaha te mau ohipa i tupu no nia i te poheraa o Iesu?

¹⁷ Aita e semeio o te Bibilia i haapapu-rahi-roa ˈˈe-hia maoti râ te tia-faahou-raa o Iesu Mesia. E nehenehe anei te reira e haamanahia? E hiˈopoa na mua anaˈe na i te mau ohipa mai tei faaitehia mai: ua tapeahia o Iesu i te ahiahi o te 14 no Nisana, oia hoi i te hoê ahiahi mahana maha ia au i ta tatou kalena *. Ua tia ˈtu oia i mua i te mau raatira o te mau ati Iuda i faahapa mai ia ˈna i te na ôraa mai e eita o ˈna e faatura i te Atua e ua faautua maira hoi ia ˈna i te utua pohe. Ua aratai taua mau taata nei ia Iesu i mua i te tavana rahi roma ra o Ponotio Pilato, tei farii i to ratou manaˈo ma te tuu atu ia Iesu i roto i to ratou rima ia haapohehia oia. I te mahana i muri iho, i te mahana pae, i taua noâ 14 no Nisana ra ia au i te kalena ati iuda, ua patitihia ˈtu Iesu i nia i te pou haamauiuiraa i reira to ˈna poheraa tau hora i muri iho. — Mareko 14:43-65; 15:1-39.

18. Ia au i te Bibilia, mea nafea te parau apî no nia i te tia-faahou-raa o Iesu i haamata ˈi i te parare?

 ¹⁸ I muri aˈe to te hoê faehau roma haapapu-maitai-raa e ua pohe mau iho â o Iesu na roto i te patiaraa ˈtu oia i to ˈna pae aoao e ta ˈna mahae, ua tuuhia ˈtura to ˈna tino i roto i te hoê menema apî roa. Ia poipoi aˈe, i te 15 no Nisana (mahana pae/mahana maa), e mahana sabati ïa. I te poipoi o te 16 no Nisana (sabati poipoi), ua haere atura te tahi tau pǐpǐ i te menema ra, e inaha, aore e taata i roto. Ua parare oioi hoi te parau e te ora ra Iesu. Ua faatupu taua parau nei i te hoê huru mai te nehenehe e itehia i teie mahana oia hoi: te tiaturi ore. Aita te mau aposetolo iho i hinaaro e tiaturi. Teie râ, a ite ai ratou ia Iesu ma te ora maitai, ua tia ˈˈera hoi ratou ia farii e ua faatia-mau-hia iho â oia mai roto mai i te feia pohe. — Ioane 19:31 e tae atu i te 20:29; Luka 24:11.

Aita e taata i roto i te menema

19-21. a) Ia au i te taata ra o Justin, mea nafea to te mau ati Iuda faahaparaa i te mau kerisetiano i poro na no nia i te tia-faahou-raa o Iesu? b) E nehenehe tatou e papu i te aha no nia i te menema o Iesu i te 16 no Nisana ra?

¹⁹ Ua faatia-mau-hia anei o Iesu, aore ra e aamu feruri-noa-hia anei teie? I taua tau ra, eita e ore e e rave rahi mau taata tei aniani e tei roto noa anei te tino o Iesu i te menema. Mea fifi roa iho â ïa na te mau pǐpǐ ia paruru i ta ratou mau parau mai te peu e aita to ratou mau enemi i farii i te parau no te tia-faahou-raa o Iesu na roto i te faaiteraa ˈtu i to ˈna tino e vai noa râ i to ˈna iho vahi. Aita râ hoi te aamu e faatia maira i te parau mai te reira te huru. Ia au i te Bibilia, ua faaue atu te mau raatira ati iuda i te mau faehau e na ratou e haapao i te menema i te na ôraa ˈtu e: “E parau outou e, Na ta ˈna iho mau pǐpǐ i tii mai e i eiâ ia ˈna i te po te taoto ra matou.” (Mataio 28:11-13). I te tahi aˈe pae, na te tahi mau buka e ere no roto i te Bibilia e haapapu ra i teie ohipa i ravehia e te mau raatira ati iuda.

²⁰ Fatata hoê senekele i muri aˈe i te poheraa o Iesu, ua papai aˈera o Justin i ta ˈna Aparauraa e o Tryphon. Teie ta tatou e taio: “Outou [te mau ati Iuda] ua maiti outou i te  mau taata ia au i to outou hinaaro, ua tono outou ia ratou na nia i te fenua atoa nei e poro e ua tupu te hoê pǔpǔ faaroo paieti ore e te ino maoti te hape i ravehia e te tahi taata o Iesu te iˈoa, no Galilea: ua faasatauro matou ia ˈna, o ta ratou ïa e parau ra, ua eiâ râ hoi ta ˈna mau pǐpǐ ia ˈna i te po, i roto i to ˈna menema tei reira to ˈna tuuraahia​⁷.”

²¹ E ati iuda o Tryphon, e te tapao ta te Aparauraa e o Tryphon e titau ra, te parururaa ïa i te kerisetianoraa i mua i te haapaoraa ati iuda. No reira, e nehenehe iho â ïa e parau e aita o Justin i faahiti i taua faahaparaa ra — oia hoi te eiâraa te mau kerisetiano i te tino o Iesu i roto i te menema — mai te peu e aita te mau ati Iuda i faahiti i te reira. Mai te peu râ e aita iho â ratou i na reira, mea ohie atura ïa ia parau e e taata haavare o Justin. Inaha, eita roa ˈtu o ˈna e na reira i te parau ahiri e aita te mau ati Iuda i tono i taua mau vea ra. I te tahi aˈe pae, ua faahiti te mau ati Iuda i taua parau nei no te mea i te 16 no Nisana o te matahiti 33, aita o Iesu i roto i to ˈna menema e eita ˈtura ïa ta ratou e nehenehe e parau e aita te tia-faahou-raa o Iesu i tupu ma te faaite i to ˈna tino i roto i te menema. Inaha, eaha hoi te ohipa i tupu? Ua eiâ mau anei te mau pǐpǐ i te tino o to ratou fatu? Aore ra ua tatarahia anei oia na roto i te tahi semeio ei haapapuraa i to ˈna tia-faahou-raa?

Te mau manaˈo faahopearaa a te taote ra o Luka

22, 23. O vai te taata ite roa o te senekele I tei tuatapapa maite i te parau no nia i te tia-faahou-raa o Iesu, e eaha te mau ravea e vai ra ia ˈna ra?

²² I te senekele I, ua tuatapapa maite te hoê taata tei noaa ia ˈna i te ite rahi, i taua ohipa ra. O Luka te iˈoa o taua taata ra e e taote oia (Kolosa 4:14). Ua papai o Luka e piti na buka e vai ra i teie mahana i roto i ta tatou Bibilia: te hoê Evanelia, aore ra aamu no nia i te taviniraa a Iesu, e te buka Ohipa a te mau aposetolo ra, e faatia maira i te parau no nia i te parareraa te kerisetianoraa i roto i te mau matahiti i muri noa ˈˈe i te poheraa o Iesu.

²³ I roto i te parau omuaraa o ta ˈna Evanelia, te parau ra o Luka no nia i te mau papai e rave rahi ta ˈna i rave mai,  e mau papai hoi tei moe i teie mahana: ua tuatapapa o ˈna i te tahi mau papai e faatia ra i te oraraa o Iesu, ua aparau atu o ˈna i te feia ta Iesu i matau e tei riro ei ite no to ˈna poheraa e i muri iho, no to ˈna tia-faahou-raa. No reira, te na ô râ oia e: “Ua itea-papu-hia e au te mau parau atoa mai te matamua mai â.” (Luka 1:1-3). Ma te feaa ore, e mau tuatapaparaa papu ta Luka i rave. Eaha râ te nehenehe e parau no nia i to ˈna huru taata tuatapapa aamu?

24, 25. Ia au i te mau taata e rave rahi, eaha te huru o Luka i te pae o te tuatapaparaa aamu?

²⁴ E rave rahi teie e farii nei i to ˈna aravihi i roto i taua tuhaa ra. I roto i te hoê oreroraa parau i horoahia i te matahiti 1913, ua faahiti o Sir William Ramsay i te parau no te faufaa o te mau ohipa i ravehia e Luka i te pae no te aamu. Eaha hoi ta ˈna faaotiraa? “E taata tuatapapa aamu faahiahia roa o Luka. Eita noa ta ˈna mau parau e nehenehe e tiaturihia, tei roto atoa râ ia ˈna te huru mau o te hoê taata tuatapapa aamu​⁸.” No teie roa iho nei, hoê â ïa manaˈo i horoahia e te tahi mau taata tuatapapa bibilia. Teie te nehenehe e taiohia i roto i te mau parau omuaraa o te hoê buka e rave rahi tuhaa (The Living Word Commentary) i haapaohia no nia i te buka a Luka: “E taata tuatapapa aamu o Luka (i roto i te mau taata aravihi roa ˈˈe) taa ê atu i to ˈna aravihi i te pae no te tuatapaparaa i te parau no nia i te Atua.”

²⁵ Ia au i te taata ra o David Gooding, orometua tahito o te reo heleni no te Faufaa Tahito i te fenua Irelane Apatoerau, “e taata tuatapapa aamu [o Luka] no te tau tahito ra ia au i te peu matauhia e te mau taata tuatapapa aamu o te Faufaa Tahito e hoê â anairaa e o Thucydide [te hoê o te  mau taata tuatapapa aamu o te Tau tahito farii-rahi-roa ˈˈe-hia]. Mai ia ratou, ua haa maite o Luka no te heheu i roto i te mau ravea e vai ra ia ˈna ra, no te maiti i ta ˈna mau haamaramaramaraa e no te faaite mai i ta ˈna mau ohipa. (...) Ua apiti o Thucydide i teie huru raveraa, i te hoê hiaai rahi no te tano-mau-raa i te pae o te aamu: aita hoê noa ˈˈe mea e haapapu maira e mea iti aˈe to Luka anaanatae i roto i taua tuhaa ra​⁹”.

26. a) Eaha te faaotiraa ta Luka i horoa mai no nia i te tia-faahou-raa o Iesu? b) Eaha te mea i turu paha ia ˈna i roto i ta ˈna faaotiraa?

²⁶ E hoˈi mai anaˈe na tatou i nia i te menema i vai taata ore noa i te 16 no Nisana ra. Eaha ïa te faaotiraa ta teie nei taata aravihi roa e rave? I roto i ta ˈna Evanelia mai roto atoa i te buka Ohipa, te vauvau maira o Luka i te parau no nia i te tia-faahou-raa o Iesu mai te hoê ohipa i tupu mau iho â (Luka 24:1-52; Ohipa 1:3). Aita roa ˈtu to ˈna manaˈo i feaa noa ˈˈe i nia i taua tumu parau ra. Eita e ore taua mau manaˈo papu no ˈna ra i te turuhia e te mau ohipa o ta ˈna iho i ite, no te mea mai te peu e aita o ˈna i ite mata roa ˈtu i te tia-faahou-raa o Iesu, te parau ra râ oia e ua ite roa ˈtu oia i te tahi mau semeio i faatupuhia e te aposetolo Paulo. — Ohipa 20:7-12; 28:8, 9.

Ua ite ratou ia Iesu i faatia-faahou-hia mai

27. A faaite mai na i te iˈoa o vetahi o te feia i haapapu e ua ite ratou ia Iesu i faatia-faahou-hia mai?

²⁷ Na e piti na taata tei matau ia Iesu i papai e piti na Evanelia, tei reira hoi raua i to ˈna mahana poheraa e ua haapapu mai raua e ua ite roa ˈtu raua ia ˈna i muri aˈe i to ˈna tia-faahou-raa. O te aposetolo Mataio te hoê, e telona tahito hoi teie aore ra e taata titau tute, e o Ioane te tahi, te aposetolo herehia e Iesu. Te parau atoa ra te tahi atu taata papai bibilia, oia hoi te aposetolo Paulo, e ua ite oia i te Mesia tei faatiahia mai mai roto mai i te feia pohe. Hau atu, te faahiti ra oia i te iˈoa o te tahi atu mau taata tei ite atoa ia Iesu i to ˈna oraraa ra, e te haapapu maira e i te hoê taime, ua fa mai Iesu i mua i “te mau taeae e pae atoa hanere e tiahara”. — Korinetia 1, 15:3-8.

28. Eaha ta te tia-faahou-raa o Iesu i faatupu i nia ia Petero?

 ²⁸ Te hoê o te mau taata i ite mata roa ˈtu e ta Paulo e faahiti ra o Iakobo ïa, te taetaeae o Iesu, tei matau maitai iho â ïa ia Iesu mai to ˈna tamarii-rii-raa ra. O te aposetolo Petero atoa te tahi o ratou. Te faaite maira te taata papai aamu ra o Luka i to ˈna parau i te faahitiraa mai ma te mǎtaˈu ore i te tia-faahou-raa o Iesu, tei haapohehia tau hebedoma noa na mua ˈtu (Ohipa 2:23, 24). Te parau ra te peu tutuu e na Petero i papai i na rata e piti e vai ra i roto i te Bibilia. I roto i te rata matamua, te faaite ra o Petero e mea faufaa roa na ˈna te tia-faahou-raa o Iesu, te tahi tau matahiti i muri aˈe te mau ohipa i tupu ai. Teie ta ˈna i papai: “Ia haamaitaihia te Atua te Metua o to tatou Fatu ra o Iesu Mesia, o tei faafanau faahou ia tatou no te rahi o to ˈna ra aroha, ia noaa te manaˈo ora i te tia-faahou-raa o Iesu Mesia mai te pohe maira.” — Petero 1, 1:3.

29. Noa ˈtu â ïa e eita ta tatou e nehenehe e aparau roa ˈtu e te mau taata i ite mata roa ˈtu i te tia-faahou-raa o Iesu, eaha râ te faaiteraa faufaa mau e vai ra ia tatou nei?

²⁹ Noa ˈtu â ïa e eita ta tatou e nehenehe, mai ia Luka, e aparau roa ˈtu i te feia i haapapu mai e ua ite ratou ia Iesu i muri aˈe i to ˈna poheraa e ua aparau atu ratou ia ˈna, e nehenehe ta tatou e taio i te mau parau ta vetahi o ratou i papai. E nehenehe atura hoi tatou iho e faaoti e ua haavarehia anei taua mau ite ra aore ra aita, aore ra te hinaaro ra anei ratou e haavare mai ia tatou aore ra ua ite mau anei ratou ia Iesu i faatia-faahou-hia mai. I te parau mau, eita roa ˈtu e nehenehe e parau e ua haavarehia ratou. Te vai ra hoi i rotopu ia ratou te feia tei riro ei hoa rahi roa no Iesu e tae roa ˈtu i to ˈna poheraa. Ua ite roa ˈtu vetahi o ratou i to ˈna mau taime hopea i nia i te pou haamauiuiraa. Ua ite atu ratou i te pape e te toto i te taheraa mai mai roto mai i te pepe ta te faehau i rave i nia ia ˈna ma te patia ˈtu e ta ˈna mahae. Mai ia ratou, ua ite papu maitai taua faehau ra e ua pohe mau â o Iesu. Ua faaite mai taua nei â mau ite ra i muri iho e ua ite ratou ia Iesu i te oraraa mai e ua paraparau roa ˈtu ia ˈna, e inaha, eita ïa e nehenehe e parau e ua  haavarehia ratou. No reira, te tamata ra anei ratou i te haavare mai ia tatou i te haapapuraa mai e ua faatiahia o Iesu? — Ioane 19:32-35; 21:4, 15-24.

30. No te aha e ore ai e nehenehe e parau e ua haavare te feia i ite mata roa ˈtu i te tia-faahou-raa o Iesu?

³⁰ Ia ite tatou i te reira, ia pahono ïa tatou i te hoê noa anaˈe ra uiraa oia hoi: Te tiaturi ra anei ratou iho i te mau mea o ta ratou e parau ra? Papu maitai e oia mau, te tiaturi mau ra ratou. I te parau mau, ua riro te tia-faahou-raa o Iesu no te mau kerisetiano, e tae noa ˈtu no te feia e parau ra e ua ite roa ˈtu ratou i te reira, ei niu iho no to ratou faaroo. Teie ta te aposetolo Paulo i parau: “E aore te Mesia i tia i nia ra, e haavare mau ta matou aˈo nei, [e e faufaa ore atoa to matou faaroo] (...). E aita hoi te Mesia i faatiahia ra, e mea faufaa ore to outou faaroo.” (Korinetia 1, 15:14, 17). O te reira anei te manaˈo o te hoê taata e faahua parau e ua ite o ˈna i te Mesia i te faatia-faahou-raahia mai?

31, 32. Eaha te mau haapaeraa ta te mau kerisetiano matamua i rave, e no te aha te reira i riro ai ei haapapuraa paari maitai e e parau mau ta ratou ia ratou i faaite atea mai i te parau no nia i te tia-faahou-raa o Iesu?

³¹ A feruri na i te auraa no te hoê taata e riro mai ei kerisetiano i taua tau ra. Eita hoi te reira e horoa mai i te hoê roo rahi, aore ra te hoê mana rahi aˈe, aore atoa e horoa mai i te mau taoˈa materia e rave rahi. Eita roa ˈtu. I roto i te mau kerisetiano matamua, e rave rahi ‘tei farii noa ma te oaoa i te haruraahia i ta ratou mau taoˈa’ no to ratou faaroo (Hebera 10:34). Te fariiraa i te kerisetianoraa, te auraa ra o te fariiraa ïa i te tahi mau haapaeraa e te tahi mau hamani-ino-raa e e pinepine hoi e aratai tia i te haamauiuiraa, i te hoê pohe ino mau.

³² No roto atoa mai vetahi mau kerisetiano i te mau huifetii moni roa, mai te aposetolo Ioane, e manaˈohia ra e e pu ravaai ruperupe roa hoi ta to ˈna metua tane i Galilea. E oraraa faahiahia hoi to mua i te tahi atu o ratou mai ia Paulo, oia hoi hou aˈe oia e riro mai ai ei kerisetiano, tei haapiihia na te rabi tuiroo ra o Gamaliela e tei haamata i te  tui te roo i mua i te aro o te mau raatira ati iuda (Ohipa 9:1, 2; 22:3; Galatia 1:14). Teie râ, ua haapae taatoa ratou i te mau mea ta te ao nei e pûpû maira ia ratou no te haere e faaite i te hoê poroi i niuhia i nia i te tia-faahou-raa o Iesu (Kolosa 1:23, 28). No te aha hoi ratou e farii ai i te mau haapaeraa mai teie te huru e no te aha hoi e mauiui ai ma te turu i te hoê tumu mai te peu e ua ite ratou e e haavare taua tumu ra? Eita iho â ïa ratou e na reira. Ua ineine ratou i te mauiui e i te pohe no te mea ua ite ratou e ua niu-papu-hia te tumu ta ratou e turu ra i nia i te parau mau.

Te tupu mau nei iho â te mau semeio

33, 34. I te mea hoi e ua tupu mau â te tia-faahou-raa o Iesu, eaha ïa te nehenehe e parau no nia i te tahi atu mau semeio o te Bibilia?

³³ Te horoa maira taua mau ohipa atoa ra i tupu i te hoê faaiteraa papu rahi mau. Ua faatia-mau-hia iho â o Iesu mai roto mai i te feia pohe i te 16 no Nisana o te matahiti 33 ra, e inaha, e nehenehe atoa ˈtura ïa te tahi atu mau semeio o te Bibilia, e tupu, e mau semeio tei haapapuhia mai to ratou tupuraa na te feia i ite mata roa ˈtu. Te Puai i faatia mai ia Iesu, o te Puai atoa ïa tei faatia ia ˈna i te faaora mai i te tamaiti a te vahine ivi no Naina. Maoti oia o Iesu i nehenehe ai e faatupu i te mau semeio haihai aˈe, tera râ e mea faahiahia atoa: te mau faaoraraa maˈi. Ua horoa atoa ˈtu oia no ˈna i te mana no te faaamuraa na roto i te tahi semeio, i te hoê nahoa rahi taata, e no te haereraa na nia i te pape. — Luka 7:11-15; Mataio 11:4-6; 14:14-21, 23-31.

³⁴ Ei faaotiraa, eita te mau aamu no nia i te mau semeio e faatiahia ra i roto i te Bibilia e faatia ia tatou ia haafeaa i to tatou manaˈo no nia i to ˈna parau mau. Te haapapu maira râ te mau semeio i tupu i te mau tau bibilia ma te faahiahia mau e e Parau mau iho â teie buka na te Atua. Teie râ, te riro nei â te Bibilia ei tumu no te tahi atu â fifi. Oia mau, e rave rahi mau taata teie e parau nei e te faahapa ra oia ia ˈna iho e no taua tumu ra ratou e ore ai e tiaturi e e Parau mau iho â oia na te Atua. Mai te reira mau anei?

[Nota i raro i te api]

[Uiraa haapiiraa]

[Parau iti faaôhia i te api 81]

Ua parau te mau enemi o te kerisetianoraa e na te mau pǐpǐ a Iesu i eiâ i to ˈna tino. Mai te peu e mai te reira te huru, no te aha pai ïa te mau kerisetiano i ineine ai i te pohe no te hoê faaroo i niuhia i nia i to ˈna tia-faahou-raa?

 [Tumu parau tarenihia i te api 85]

No te aha aita e semeio faahou i to tatou nei tau?

I te tahi taime, e faaroohia teie uiraa: ‘No te aha aita e semeio faahou i to tatou nei tau mai i te mau tau bibilia?’ Teie ïa te pahonoraa: e tiaraa faufaa roa to te mau semeio i te mau tau tahito ra, te hinaaro nei râ te Atua i teie mahana i ta ˈna mau tavini ia ora ratou ma te faaroo. — Habakuka 2:2-4; Hebera 10:37-39.

I Tahito ra, ua riro te mau semeio ei mau tapao haapapuraa na Mose, ei faaiteraa e te faaohipa ra o Iehova ia ˈna, no ǒ mai te faufaa o te Ture i te Atua ra e ua riro te mau ati Iseraela ei nunaa maitihia na te Atua. — Exodo 4:1-9, 30, 31; Deuteronomi 4:33, 34.

I te senekele I, ua turu maite te mau semeio i te tiaraa o Iesu, e i muri aˈe, i te tiaraa o te amuiraa kerisetiano apî. Ua faaite ratou e o Iesu te Mesia i tǎpǔhia mai, e i muri aˈe i to ˈna poheraa, ua riro maira te amuiraa kerisetiano ei nunaa taa ê na te Atua ei monoraa ia Iseraela i te tino nei, e aita ˈtura ïa te Ture a Mose e mana faahou ra. — Ohipa 19:11-20; Hebera 2:3, 4.

Na roto i te poheraa o te mau aposetolo, ua mou atoa aˈera te mau semeio. O ta Paulo ïa i faataa mai i te na ôraa mai e: “Area te mau tohu ra, e mou ïa; area te parau ěê ra, e ore atoa ïa; area te ite ra, e faaorehia ïa te reira. Te ite pae tahi nei tatou, e te tohu pae tahi nei. Ia tae râ i te mea tia mau ra, ei reira te mea pae tahi noa ra faaorehia ˈi.” — Korinetia 1, 13:8-10.

Te vai nei ia tatou nei i teie nei i te Bibilia taatoa, te horoa mai nei i te ravea e ite atu ai tatou i te mau faaiteraa atoa e te mau aˈoraa atoa a te Atua. Tei te hopea tatou o te tupuraa o ta ˈna mau parau tohu e te vai nei ia tatou nei i te hoê maramarama maitai aˈe no nia i te mau opuaraa a te Atua. Eita ˈtura tatou e hinaaro i te semeio. Teie râ, te ohipa noa nei â te varua o te Atua tei riro ei tumu no te mau semeio e te horoa mai nei hoi i teie mahana i te tahi mau tapao papu maitai no nia i te puai o te Atua. E rahi atu â to tatou ite no nia i taua tumu parau nei i roto i te hoê pene i mua ˈtu.

[Hohoˈa i te api 75]

E rave rahi teie e parau nei e ua riro te taui-ore-raa te mau ture o te natura, mai te tiaraa mai te mahana i te mau mahana atoa, ei haapapuraa e eita te mau semeio e nehenehe e tupu.

[Hohoˈa i te api 77]

Ua riro te poieteraahia te fenua nei e to ˈna faaineineraahia no te farii i te mau mea ora ei mau ‘ohipa faahiahia mau’ tei tupu hoê anaˈe ra taime.

[Hohoˈa i te api 78]

Nafea ïa outou ia faataa i te parau no te mau ohipa faahiahia i ravehia e te mau aivanaa o to tatou nei tau i te hoê taata i ora na a 200 matahiti i teie nei?