Te feia o te ratere na te mau tuhaa fenua apî no te haamarari i te eˈa no vetahi ê, e parau-pinepine-hia ïa e “pionie.” Mai tera atoa Iesu. Ua tonohia mai oia i te fenua nei no te rave i te hoê taviniraa o te horoa i te ravea e ora ˈi te taata. (Mataio 20:28) Mai ia ˈna, te faataa atoa nei ta ˈna mau pǐpǐ i te taime no te “faariro i te taata . . . ei pǐpǐ.” (Mataio 28:19, 20) Ua rave vetahi i ta matou e parau te taviniraa pionie.

E taata poro taime taatoa. E feia poro i te parau apî oaoa te mau Ite no Iehova atoa. Ua faanaho râ vetahi i to ratou oraraa no te rave e 70 hora pororaa i te avaˈe hoê ei pionie tamau. E rave rahi ïa e ohipa afa mahana ta ratou. Area te tahi atu, ua maitihia ïa ei pionie taa ê i te mau tuhaa fenua e hinaaro-rahi-hia ˈi te feia poro i te Faatereraa arii. E rave ratou 130 hora aore ra hau atu i te avaˈe hoê. E oraraa au noa to te mau pionie. Te oaoa nei ratou, a tiaturi ai e na Iehova e aupuru ia ratou. (Mataio 6:31-33; Timoteo 1, 6:6-8) No te tahi atu râ, e nehenehe noa ta ratou e rave e 30 aore ra e 50 hora pororaa hoê avaˈe ei pionie tauturu.

Mea here na ˈna i te Atua e te taata. Mai ia Iesu, ua taa ia matou e te hiaai roa nei e rave rahi e ite o vai te Atua e eaha ta ˈna mau opuaraa. (Mareko 6:34) E nehenehe matou e tauturu ia ratou i teie nei â ma te faaite atu i te tiaturiraa papu no a muri aˈe. No to ˈna here i te taata tupu e horoa noa ˈi te hoê pionie i to ˈna taime e itoito no te faaite atu i te parau apî oaoa. (Mataio 22:39; Tesalonia 1, 2:8) E puai atu â ïa to ˈna faaroo, e piri atu â oia i te Atua e e oaoa roa oia.—Ohipa 20:35.

• A faataa na eaha te hoê pionie.

• No te aha vetahi e tavini ai ei pionie taime taatoa?