Te mau tavana 20:1-48
-
Aroraa i te ati Beniamina (1-48)
20 No reira, haere pauroa maira te ati Iseraela mai Dana+ tae roa i raro i Beere-seba e mai te fenua o Gileada,+ e putuputu ihora te amuiraa taatoa mai te mea ra e hoê noa ratou i mua ia Iehova i Mizepa.+
2 Tia maira te mau raatira o te nunaa e te mau opu atoa o Iseraela i rotopu i te amuiraa o te nunaa o te Atua, e 400 000 faehau e ˈoˈe ta ratou.+
3 Faaroo aˈera te ati Beniamina e ua pauma to Iseraela i Mizepa.
Na ô atura to Iseraela: “A parau mai, mea nafea teie ohipa riaria i te tupuraa?”+
4 Pahono maira te tane ati Levi,+ te tane faaipoipo a te vahine tei haapohehia: “Ua haere au i Gibea+ no Beniamina e ta ˈu vahine faaipoipo no te taoto i reira.
5 Tia aˈera to Gibea* no te rave ino ia ˈu e haaati aˈera i te fare to reira vau i te po. Ua hinaaro ratou e haapohe ia ˈu, ua mafera râ ratou i ta ˈu vahine faaipoipo e ua pohe oia.+
6 Rave maira ïa vau i te tino o ta ˈu vahine faaipoipo, tâpûpû ihora i te reira e faatae ihora i te mau tuhaa i te mau fenua atoa o Iseraela,+ no te mea ua rave ratou i te hoê ohipa haama e te hairiiri i Iseraela.
7 I teie nei outou pauroa to Iseraela, a horoa mai i to outou manaˈo e ta outou aˈoraa+ i ǒ nei.”
8 Tia aˈera to Iseraela taatoa* e na ô aˈera: “Eita hoê o matou e haere i to ˈna fare ie aore ra e hoˈi i to ˈna fare.
9 E na ô tatou: E tuu tatou i te kelero+ no te ite o vai te aro ia Gibea.
10 E rave tatou 10 tane no roto 100 o te mau opu atoa o Iseraela, e 100 no roto 1 000, e 1 000 no roto 10 000 no te haaputu i te maa na te nuu, ia nehenehe ratou e aro ia Gibea no Beniamina, no te ohipa hairiiri ta ratou i rave i Iseraela.”
11 Putuputu aˈera to Iseraela taatoa* no te aro i te oire.
12 Tono aˈera te mau opu o Iseraela i te tahi mau tane e parau i to te opu o Beniamina: “Eaha teie ohipa riaria i tupu i rotopu ia outou?
13 I teie nei a tuu mai i tera mau tane haapaoraa ore no Gibea,+ ia haapohe matou ia ratou e ia faaore matou i te ino mai roto mai ia Iseraela.”+ Aita râ te ati Beniamina i hinaaro e faaroo i to ratou mau taeae ati Iseraela.
14 Putuputu aˈera te ati Beniamina no roto i te mau oire i Gibea no te haere e aro i to Iseraela.
15 I taua mahana ra, titau aˈera te ati Beniamina no roto i to ratou mau oire e 26 000 tane e ˈoˈe ta ratou, taa ê atu i na 700 tane maitihia no Gibea.
16 E 700 tane maitihia to roto i tera nuu, e rima aui ratou. E nehenehe ta teie mau tane atoa e taora i te ofai* ma te tano maitai e aita e haperaa.
17 Titau aˈera te mau tane o Iseraela, taa ê atu i te opu o Beniamina, e 400 000 tane e ˈoˈe ta ratou,+ e e faehau aravihi anaˈe.
18 Tia aˈera ratou e pauma aˈera i Betela e uiui i te Atua.+ Na ô atura to Iseraela: “O vai o matou te pauma na mua no te aro i te ati Beniamina?” Pahono maira Iehova: “O Iuda na mua te haere.”
19 I muri iho tia aˈera te ati Iseraela i te poipoi e puhapa ihora i pihai iho ia Gibea no te aro ia ˈna.
20 Haere aˈera to Iseraela e aro ia Beniamina. Faanaho aˈera ratou ia ratou no te aroraa i Gibea.
21 Haere maira te ati Beniamina mai Gibea mai e tairi aˈera e 22 000 tane no Iseraela i taua mahana ra.
22 Tera râ, faaitoito ihora te nuu a to Iseraela e faanaho faahou aˈera ia ratou no te aroraa i te hoê â vahi e to te mahana matamua.
23 Pauma aˈera te ati Iseraela e taˈi aˈera i mua ia Iehova e ahiahi noa ˈtu e uiui aˈera ia Iehova: “Ia haere faahou anei matou e aro i to matou mau taeae, to Beniamina mau taata?”+ Na ô maira Iehova: “A pauma e aro ia ratou.”
24 Haere faahou aˈera ïa te ati Iseraela i te ati Beniamina ra i te piti o te mahana.
25 Area Beniamina, haere maira ïa mai Gibea mai e aro ia ratou i te piti o te mahana e tairi aˈera 18 000 ati Iseraela,+ e ˈoˈe ta ratou pauroa.
26 Pauma aˈera to Iseraela taatoa i Betela. Taˈi aˈera e parahi ihora ratou i reira i mua ia Iehova,+ haapae aˈera i te maa+ i taua mahana ra e ahiahi noa ˈtu, e pûpû aˈera i te tusia taauahi+ e te tusia no te hau+ i mua ia Iehova.
27 I muri iho, uiui aˈera to Iseraela ia Iehova,+ to reira hoi te afata o te faufaa a te Atua mau i taua mau mahana ra.
28 Area Phinehasa+ te tamaiti a Eleazara, te tamaiti a Aarona, te rave ra ïa i ta ˈna taviniraa* i mua i te afata o te faufaa i taua mau mahana ra. Ui atura ratou: “Ia haere faahou anei matou e aro i to matou mau taeae, to Beniamina mau taata, aore ra ia faaea matou?”+ Pahono maira Iehova: “A pauma, no te mea ananahi au e tuu ai ia ratou i to outou rima.”
29 Tuu aˈera Iseraela i te taata tamoemoe+ ati aˈe Gibea.
30 Pauma aˈera te ati Iseraela no te aro i te ati Beniamina i te toru o te mahana, e faanaho aˈera ia ratou no te aro ia Gibea mai te tahi atu mau taime.+
31 I te haereraa mai te ati Beniamina e aro i te nuu, faaateahia aˈera ratou i te oire.+ E mai te tahi atu mau taime, haamata aˈera ratou i te aro e te haapohe i te tahi mau faehau i nia i te mau purumu rahi, hoê o te pauma ra i Betela e te tahi i Gibea, a vaiiho ai i reira piri i te 30 tane no Iseraela tei pohe.+
32 Na ô aˈera ïa te ati Beniamina: “Te pau ra ratou i mua ia tatou mai na mua ˈˈe.”+ Na ô aˈera râ te ati Iseraela: “E horo ê tatou e e faaatea ia ratou i te oire e tae atu ai i nia i te mau purumu rahi.”
33 Tia aˈera ïa to Iseraela taatoa mai te mau vahi to reira ratou e faanaho aˈera ia ratou i Baala-tamara no te aroraa, a faura mai ai te mau taata tamoemoe no Iseraela mai te mau vahi to reira ratou, na pihai iho ia Gibea.
34 Haere aˈera 10 000 tane maitihia no roto ia Iseraela taatoa i mua ia Gibea, e mea huru rahi te aroraa. Aita râ te ati Beniamina i ite e fatata ratou i te roohia i te ati.
35 Pau aˈera Beniamina ia Iehova+ i mua ia Iseraela, e i taua mahana ra haapohe aˈera te ati Iseraela e 25 100 tane no te opu o Beniamina, e ˈoˈe ta ratou pauroa.+
36 Ua manaˈo râ te ati Beniamina e pau te tane no Iseraela i to ratou horo-ê-raa ia ratou,+ ua horo ê râ ratou no te mea ua tiaturi ratou i te mau taata tamoemoe ati aˈe Gibea.+
37 Haa oioi atura te mau taata tamoemoe e horo aˈera i Gibea. Parare atura te mau taata tamoemoe e tairi aˈera i te oire taatoa i te ˈoˈe.
38 E ua faanaho to Iseraela ia faahaere te mau taata tamoemoe i te oire i te au auahi i nia mai reira mai ei tapao.
39 I te horo-ê-raa te ati Iseraela i te aroraa, aro maira to Beniamina e haapohe aˈera piri i te 30 tane no Iseraela,+ e na ô aˈera ratou: “Papu, te pau faahou ra ratou i mua ia tatou, mai i to na mua ˈtu aroraa.”+
40 Itehia aˈera râ te tapao mai te oire mai, mai te tahi pou au auahi ra. I te fariuraa to Beniamina no te hiˈo, ite aˈera ratou i te ura auahi o te oire taatoa e pee ra i te raˈi.
41 Fariu atura to Iseraela, e horuhoru ihora to Beniamina, ua ite hoi ratou e ua roohia ratou i te ati.
42 Horo ê aˈera ïa ratou i to Iseraela i te medebara, pee maira râ te nuu ia ratou. Apiti atoa maira te mau tane no roto mai i te oire no te haapohe ia ratou.
43 Haaati aˈera ratou i te ati Beniamina e aˈuaˈu noa aˈera ia ratou. Haapohe aˈera to Iseraela ia ratou i mua noa ia Gibea i hitia o te râ.
44 I te pae hopea, 18 000 tane no te opu o Beniamina tei pohe, e aito puai anaˈe.+
45 Fariu ê ihora to Beniamina e horo ê aˈera i te medebara i te mato o Rimona.+ Haapohe* aˈera te ati Iseraela e 5 000 o ratou i nia i te mau purumu rahi, e aˈuaˈu noa aˈera ia ratou tae roa i Gidoma. Haapohe aˈera ïa ratou e 2 000 â tane.
46 I taua mahana ra, ua pohe e 25 000 taata no Beniamina e ˈoˈe ta ratou,+ e aito puai anaˈe.
47 E 600 râ tei horo ê i te medebara i te mato o Rimona, e faaea ihora ratou i te mato o Rimona e maha avaˈe.
48 Fariu aˈera to Iseraela no te aro i te ati Beniamina e tairi aˈera i to te mau oire i te ˈoˈe, te taata e te animara, pauroa tei toe. Hau atu â, tanina aˈera ratou i te mau oire atoa na reira ratou i te haereraa.
Nota i raro i te api
^ Huri-atoa-hia “to Gibea mau fatu fenua.”
^ Heb: “mai te hoê noa taata.”
^ Heb: “mai te hoê noa taata.”
^ Ma te faaohipa i te taora ofai.
^ Heb: “te tia ra ïa.”
^ Heb: “pofai.”
