Maseli 6:1-35
6 Ta ˈu tamaiti, mai te peu ua farii oe e aufau i te tarahu a to oe taata tupu,+Mai te peu ua horoa oe i to rima* i te hoê taata aita oe i matau,+
2 Mai te peu ua fifihia oe i ta oe parau fafau,Ua mau oe i te mau parau a to oe vaha,+
3 A na ô, ta ˈu tamaiti, e ia tiamâ mai oe,Ua topa hoi oe i roto i te rima o to oe taata tupu:
A haere a hiˈo i to oe taata tupu, a faahaehaa ia oe e a onoono i te taparuparu ia ˈna.+
4 Eiaha e vaiiho i to oe mata ia taotoE i to oe tapoˈi mata ia topatopa.
5 Ia tiamâ mai oe mai te hoê zabi i te rima o te taata aˈuaˈu animara,Mai te hoê manu i te rima o te taata haru manu.
6 A haere a hiˈo i te ro, oe te taata faatau.+A hiˈo i ta ˈna huru raveraa e ia paari oe.
7 Noa ˈtu aita to ˈna e raatira, e tia mana aore ra e faatere,
8 E faaineine oia i ta ˈna maa i te tau veavea,+E e haaputu oia i ta ˈna pueraa maa i te tau ootiraa.
9 Ehia â maororaa e tarava noa ˈi oe te taata faatau?
Afea oe e tia mai ai i to oe taotoraa?
10 Maa taoto iti, maa varea taoto iti,Maa opiraa iti i te rima no te faafaaea,+
11 I reira ïa to oe veve e tae mai ai mai te eiâ,E to oe ereraa mai te hoê taata e mauhaa ta ˈna.+
12 E hahaere te taata faufaa ore e te ino a faahiti ai i te parau haavare.+
13 E amoamo to ˈna mata,+ e tairiiri to ˈna avae, e e tohu oia i to ˈna rima.
14 Ma te aau haavarevare,E opua noa oia i te ino+ e e faahuehue noa oia.+
15 No reira to ˈna ati e tae taue mai ai,I te hoê taime poto e ofatihia oia e aita e rapaauraa.+
16 E ono ohipa mea hae na Iehova,Oia mau, e hitu ohipa mea au ore roa na ˈna:
17 Te mata teoteo,+ te arero haavare,+ e te rima o te haamanii i te toto hara ore,+
18 Te aau o te opua i te ino,+ e te avae o te horo oioi i te ino ra,
19 Te ite haavare o te haavare i te mau taime atoa,+E te taata atoa o te faahuehue i te mau taeae.+
20 A haapao, ta ˈu tamaiti, i te faaueraa a to metua tane,E eiaha e faarue i te haapiiraa* a to metua vahine.+
21 A taamu noa i te reira ati aˈe to aau.A taamu atu i nia i to arapoa.
22 Ia haere oe, e aratai te reira ia oe.Ia taoto oe, e tiai te reira ia oe,E ia ara mai oe, e paraparau* te reira ia oe.
23 E mori hoi te faaueraa,+E e maramarama te ture,+E te faaiteraa i te hapa e te aˈo, o te eˈa ïa e tae atu ai i te ora.+
24 E paruru te reira ia oe i te vahine ino,+I te arero faahinaaro o te vahine e peu taotoraa tia ore ta ˈna.*+
25 Eiaha oe e hinaaro i to ˈna haviti i roto i to aau,+Eiaha atoa oe ia noaahia i to ˈna mata faahinaaro,
26 No te hoê noa ˈˈe vahine taiata, hoê noa ïa tâpû iti faraoa te maa a te hoê tane,+Mai te peu râ e vahine faaipoipo na te tahi atu tane, e ere ïa oe i te ora* faufaa roa.
27 E nehenehe anei te tahi taata e tuu i te auahi i nia i to ˈna ouma, eita râ to ˈna ahu e paapaa?+
28 Aore ra e nehenehe anei te tahi taata e haere na nia iho i te arahu ama, eita râ to ˈna avae e paapaa?
29 Hoê â atoa no te taata o te taoto i te vahine faaipoipo a to ˈna taata tupu.E faautuahia iho â te taata e hauti noa ˈtu ia ˈna.+
30 Eita te hoê eiâ e vahavahahiaUa eiâ anaˈe oia no te haamâha i to ˈna poia.
31 Ia itehia mai râ oia, e tataihitu ïa ta ˈna e faahoˈi.E haapae oia pauroa te faufaa o to ˈna fare.+
32 Te taata atoa o te faaturi e te tahi vahine, te ere ra ïa i te haroˈaroˈa.*Te taata o te na reira, e faatae mai ïa i te ino i nia iho ia ˈna.+
33 Te mea noa e noaa mai ia ˈna, te pepe ïa e te haama,+E eita to ˈna haama e moˈe.+
34 E riri hoi te hoê tane faaipoipo no te pohehae.Eita roa ˈtu oia e aumihi ia tahoo oia.+
35 Eita oia e farii i te tahi faahoˈiraa.*Eita oia e mǎrû mai noa ˈtu te rahi o ta oe ô e horoa.
Nota i raro i te api
^ Oia hoi e tapao e aufau oe i ta ˈna tarahu.
^ Aore ra “ture.”
^ Aore ra “haapii.”
^ Heb: “aau.”
^ Aore ra “hoo.”
