Maseli 10:1-32
10 Te mau parau paari a Solomona.+
E faaoaoa te hoê tamaiti feruriraa paari i to ˈna metua tane,+E otoraa râ te hoê tamaiti maamaa na to ˈna metua vahine.
2 Aita e faufaa to te mau taoˈa i noaa mai i te ohipa taviri,Area te parau-tia, e faaora mai ïa i te taata i te pohe.+
3 Eita Iehova e vaiiho i te taata parau-tia ia pohe i te poia,+Eita râ oia e horoa na te taata ino i ta ˈna e hiaai ra.
4 E vevehia te taata rima faatau,+E taoˈahia râ te taata rima itoito.+
5 E haaputu te tamaiti e feruriraa haroˈaroˈa to ˈna i te maa i te tau auhune,Area te tamaiti e haerea haama to ˈna, mea topa maitai to ˈna taoto i te tau ootiraa.+
6 E haamaitairaa to nia iho i te upoo o te taata parau-tia,+Area te vaha o te taata ino, te huna ra ïa i te haavîraa uˈana.
7 E haamanaˈohia te taata parau-tia e e parau maitai to ˈna,+Area te iˈoa o te taata ino, e pê ïa.+
8 E farii te taata aau î i te paari i te mau aratairaa,*+Area te taata e parau maamaa ta ˈna, e taataahihia ïa.+
9 Te taata e haerea hapa ore to ˈna, e haere ïa ma te taiâ ore,+Area te taata o te faatioioi i to ˈna haerea, e faaitehia mai ïa.+
10 Te taata o te amoamo i te mata ma te haavarevare, e faatupu ïa i te oto,+E te taata e parau maamaa ta ˈna, e taataahihia ïa.+
11 E tumu o te ora te vaha o te taata parau-tia,+Area te vaha o te taata ino, te huna ra ïa i te haavîraa uˈana.+
12 No te hae e tupu ai te tatamaˈiraa,Area te here, e tapoˈi ïa i te mau hapa atoa.+
13 E paari to nia iho i te utu o te taata haroˈaroˈa,+Area te raau, no te tua ïa o te taata e ere ra i te haroˈaroˈa.*+
14 E poihere te feia feruriraa paari i te ite,+Area te vaha o te taata maamaa, e titau ïa i te ati.+
15 Te faufaa a te hoê taata taoˈa rahi, o to ˈna ïa oire auahia i te patu.
Te ati o te feia veve, o to ratou ïa veve.+
16 I te ohipa a te taata parau-tia e fanaˈo ai oia i te ora,Area te faahopearaa o te ohipa a te taata ino, o te hara ïa.+
17 Te taata o te haapao maite i te aˈo, e eˈa ïa* e tae atu ai i te ora,Area te taata o te ore e haapao ia tamaˈihia oia, e faahahi ê ïa ia vetahi ê.
18 Te haavare ra te taata o te huna i to ˈna hae,+E e maamaa te taata e faaatutu i te parau faaino.*
19 Ia rahi te parau, e hapa to muri mai.+Area te taata atoa o te haavî i to ratou utu, e feruriraa paari ïa to ratou.+
20 Mai te ario tamâhia te arero o te taata parau-tia,+Area te aau o te taata ino, aita rea faufaa.
21 E faatamaa* te utu o te taata parau-tia e rave rahi taata,+Area te taata maamaa, e pohe ïa no te haroˈaroˈa ore.+
22 I te haamaitairaa a Iehova e taoˈahia ˈi te tahi taata,+E eita oia e tuu mai i te mauiui.*
23 No te taata maamaa, mai te ohipa hauti te peeraa i te haerea haama,Area te paari, no te taata haroˈaroˈa ïa.+
24 E roohia te taata ino i ta ˈna e mǎtaˈu ra,E horoahia râ na te taata parau-tia ta ˈna e hinaaro ra.+
25 Ua reva anaˈe atu te vero, aita faahou te taata ino,+Area te taata parau-tia, e niu ïa e a muri noa ˈtu.+
26 Mai te vineta no te niho e te au auahi no te mata,O te taata faatau ïa no to ˈna paoti ohipa.*
27 E roa ˈtu â te oraraa i te mǎtaˈu ia Iehova,+Area te mau matahiti o te taata ino, e haapotohia ïa.+
28 E hopoi mai ta te taata parau-tia e tiai* ra i te oaoa,+Area ta te taata ino e tiaturi ra, e mou ïa.+
29 E pare te mau raveraa a* Iehova no te taata hapa ore,+E ati râ te reira no te feia ohipa ino.+
30 E ore roa te taata parau-tia e faahiˈahia.+Te taata ino râ, e ore ïa e parahi faahou i te fenua nei.+
31 E parau* te vaha o te taata parau-tia i te paari,Area te arero haavarevare, e haamamû-roa-hia ïa.
32 Ua ite te utu o te taata parau-tia eaha te parau au,Area te vaha o te taata ino, mea haavarevare ïa.
Nota i raro i te api
^ Heb: “faaueraa.”
^ Heb: “aau.”
^ Huri-atoa-hia “to nia iho ïa i te eˈa.”
^ Aore ra “parau faaino ta ˈna i faarooroo.”
^ Aore ra “aratai.”
^ Aore ra “oto,” “fifi.”
^ Aore ra “tei tono ia ˈna.”
^ Aore ra “tiaturi.”
^ Heb: “te eˈa o.”
^ Aore ra “faahotu.”
