Te faatiaraa a Mareko 3:1-35
3 Tomo faahou atura Iesu i roto i te hoê sunago. E taata rima pohe* to reira.+
2 Hiˈo maitai maira te mau Pharisea ia ˈna no te ite e faaora anei oia i taua taata maˈi ra i te Sabati a faahapa mai ai ia ˈna.
3 Parau atura Iesu i te taata rima pohe:* “A tia mai e a haere mai i ropu.”
4 Na ô atura oia: “Ia au i te Ture, mea tano anei i te Sabati ia hamani maitai aore ra ia hamani ino, ia faaora aore ra ia haapohe?”+ Mamû noa aˈera ratou.
5 Hiˈo ihora Iesu ia ratou ma te riri, peapea roa ihora oia no te etaeta o to ratou aau+ e na ô atura i taua taata ra: “A toro mai na i to rima.” Toro maira oia i to ˈna rima e ora ˈtura te reira.
6 Haere atura te mau Pharisea i rapaeau e putuputu ihora e te feia o te pǔpǔ a Heroda+ no te feruri i te hoê ravea no te haapohe ia Iesu.
7 Haere atura râ Iesu e ta ˈna mau pǐpǐ i te pae miti. Mea rahi te taata no Galilea e no Iudea tei pee mai ia ˈna.+
8 Tae atoa maira e rave rahi no Ierusalema, Idumea, hitia o te râ o Ioridana e to pihai iho ia Turia e Sidona, i to ratou faarooraa i te mau mea atoa ta ˈna i rave.
9 Parau atura oia i ta ˈna mau pǐpǐ ia faaineine i te hoê poti, ia nehenehe ta ˈna ia faaatea ˈtu i tai ia piri roa mai te nahoa ia ˈna.
10 No to ˈna faaoraraa e rave rahi taata maˈi, tapiri roa maira te feia atoa e maˈi ino to ratou no te tapea ia ˈna.+
11 Ia ite atoa te mau varua viivii+ ia Iesu, e tipapa ratou i mua ia ˈna a parau atu ai ma te reo puai: “O te Tamaiti a te Atua oe.”+
12 Ua faaue maitai râ oia ia ratou e rave rahi taime eiaha e faaite o vai oia.+
13 Pauma aˈera Iesu i nia i te hoê mouˈa, titau ihora i te tahi o ta ˈna mau pǐpǐ+ e pee maira ratou ia ˈna.+
14 Maiti* ihora Iesu i te tino 12, o ta ˈna i topa i te iˈoa aposetolo, tei pee noa ia ˈna e ta ˈna i tono atu e poro
15 ma te mana e tiavaru i te mau demoni.+
16 Teie te tino 12+ ta ˈna i maiti,* Simona ta ˈna i topa atoa i te iˈoa o Petero,+
17 Iakobo te tamaiti a Zebedaio, Ioane te taeae o Iakobo (ua topa atoa oia ia raua i te iˈoa o Boanere, “Tamaiti a te patiri” te auraa),+
18 Anederea, Philipa, Baretolomea, Mataio, Toma, Iakobo te tamaiti a Alephaia, Tadaio, Simona piihia “tei itoito rahi”
19 e Iuda Isakariota, tei tuu ia Iesu i to ˈna mau enemi i muri aˈe.
Tomo atura oia i roto i te hoê fare,
20 e putuputu faahou maira te nahoa e aita ˈtura i nehenehe ta Iesu e ta ˈna mau pǐpǐ e tamaa.
21 I te faarooraa râ te fetii o Iesu i te reira, haere maira ratou e haru ia ˈna. Ua parau hoi ratou: “Ua maamaahia oia.”+
22 Ua na ô atoa te mau papai parau tei pou na Ierusalema mai: “Ua uruhia oia e Belezebuba* e te tiavaru nei oia i te mau demoni i te mana o te raatira o te mau demoni.”+
23 No reira, pii atura Iesu ia ratou ia tapiri mai e horoa ˈtura i te tahi mau faahohoˈaraa: “E nafea ïa Satani e tiavaru ai ia Satani?
24 Ia amahamaha te hoê faatereraa, eita tera faatereraa e mau.+
25 E ia amahamaha te hoê utuafare, eita taua utuafare ra e mau.
26 Oia atoa, ia aro Satani ia ˈna iho a amahamaha ˈtu ai, eita oia e mau, o te hopearaa râ no ˈna.
27 Aita hoi e taata e tomo i roto i te fare o te hoê taata puai no te eiâ i ta ˈna mau taoˈa ma te ore e taamuamu na mua i taua taata puai ra. I reira noa oia e nehenehe ai e eiâ i ta ˈna mau taoˈa.
28 Oia mau ta ˈu e parau atu: E faaorehia te mau hara atoa ta te taata e rave e ta ratou mau parau faaino atoa.
29 Tera râ, e ore roa e faaorehia te hara a te taata o te faaino i te varua moˈa,+ e hara mure ore ta ˈna.”+
30 O ta Iesu ïa i parau no to ratou na ôraa: “E varua viivii to ˈna.”+
31 Tae maira to Iesu metua vahine e to ˈna mau taeae,+ e a tia noa ˈi i rapaeau, tono maira ratou i te tahi taata e tii ia ˈna.+
32 E nahoa râ te parahi ra e ati noa ˈˈe ia Iesu e parau maira te hoê o ratou: “Inaha, tei rapaeau to metua vahine e to mau taeae, te ani mai ra ia oe.”+
33 Pahono atura râ oia: “O vai to ˈu metua vahine e to ˈu mau taeae?”
34 Hiˈo atura oia i te feia e parahi ra e ati noa ˈˈe ia ˈna e na ô atura: “Teie to ˈu metua vahine e to ˈu mau taeae!+
35 Te taata o te rave i te hinaaro o te Atua, o ˈna ïa to ˈu taeae, to ˈu tuahine e to ˈu metua vahine.”+
Nota i raro i te api
^ Aore ra “mǎrô.”
^ Aore ra “mǎrô.”
^ Aore ra “Faatoroa.”
^ Aore ra “faatoroa.”
^ No Satani teie iˈoa.
