Levitiko 23:1-44
23 Paraparau noa maira Iehova ia Mose, a na ô ai:
2 “A parau i te ati Iseraela: ‘Te mau oroa+ a Iehova ta outou e faaara i te nunaa,+ e tairururaa moˈa ïa. Teie ta ˈu mau oroa:
3 “‘E ravehia te ohipa e ono mahana, area te hitu o te mahana, e Sabati ïa, e mahana faafaaearaa,+ e tairururaa moˈa. Eiaha outou e rave i te tahi noa ˈˈe ohipa. Ei Sabati no Iehova i te mau vahi atoa e parahi ai outou.+
4 “‘Teie te mau oroa a Iehova, e tairururaa moˈa ia faaara outou i te nunaa i te mau taime faataahia no te reira:
5 I te 14 o te mahana o te avaˈe matamua,+ i te ahiahi, o te Pasa ïa+ na Iehova.
6 “‘I te 15 o te mahana o taua avaˈe ra, o te Oroa pane hopue ore ïa na Iehova.+ E amu outou i te pane hopue ore e hitu mahana.+
7 I te mahana matamua, e faatupu outou i te hoê tairururaa moˈa.+ Eiaha outou e rave i te tahi ohipa rohirohi.
8 Tera râ, e hopoi mai outou i te hoê tusia pûpûhia ia Iehova na roto i te auahi e hitu mahana. E tairururaa moˈa tei te hitu o te mahana. Eiaha outou e rave i te tahi ohipa rohirohi.’”
9 Paraparau noa maira Iehova ia Mose, a na ô ai:
10 “A parau i te ati Iseraela: ‘Ua tomo anaˈe outou i te fenua ta ˈu e horoa nei no outou e ua ooti anaˈe i te huero maa, e hopoi mai outou i te hoê ruru kerite o ta outou maa auhune matamua+ i te tahuˈa.+
11 E taueue oia i te ruru kerite i mua ia Iehova ia fariihia outou. Ia taueue te tahuˈa i te reira ananahi aˈe ia oti te Sabati.
12 I te mahana e taueuehia ˈi te ruru kerite, e pûpû outou ei tusia taauahi ia Iehova i te hoê mamoe oni apî oraora maitai aita â i hoê matahiti.
13 Te tusia huero maa, e piti ïa tuhaa i nia ahuru o te hoê epha* faraoa ota oro-maitai-hia anoihia e te hinu, ei tusia pûpûhia ia Iehova na roto i te auahi, ei mea hauˈa noˈanoˈa au maitai.* Te tusia uaina, hoê ïa tuhaa i nia e maha o te hoê hina* uaina.
14 Eiaha outou e amu i te pane, te huero maa tunu-paa-hia, aore ra te huero maa apî e tae roa i taua mahana ra, e a hopoi mai ai outou i te tusia i to outou Atua. E faatureraa vai maoro teie no to outou mau uˈi atoa i te mau vahi atoa e parahi ai outou.
15 “‘E taio outou e hitu Sabati mai te mahana i muri iho i teie Sabati, mai te mahana e hopoi mai ai outou i te ruru kerite o te tusia taueuehia.+ Ei hitu hebedoma taatoa.
16 E taio outou e 50 mahana+ tae roa i te mahana i muri iho i te hitu o te Sabati e e hopoi mai outou i te hoê tusia huero maa apî ia Iehova.+
17 E hopoi mai outou mai to outou nohoraa mai ei tusia taueuehia e piti pane. E hamanihia te reira i e piti tuhaa i nia ahuru o te hoê epha* faraoa ota oro-maitai-hia. E euhia te reira e te hopue,+ ei hotu paari matamua ia Iehova.+
18 E hopoi mai outou i na pane e e hitu fanauˈa mamoe oni oraora maitai, hoê matahiti, e hoê puaatoro oni apî e e piti mamoe oni.+ E pûpûhia te reira ei tusia taauahi ia Iehova e te tusia huero maa no te reira e te mau tusia uaina, ei tusia pûpûhia na roto i te auahi, ei mea hauˈa noˈanoˈa au maitai* no Iehova.
19 E e pûpû outou hoê puaaniho apî ei tusia no te hara+ e e piti fanauˈa mamoe oni, hoê matahiti, ei tusia no te hau.+
20 E taueue te tahuˈa i te reira e na pane o te mau hotu paari matamua, ei tusia taueuehia i mua ia Iehova, e na fanauˈa mamoe oni e piti. Ei mea moˈa te reira ia Iehova no te mau tahuˈa.+
21 I taua mahana ra e faaara outou i te nunaa+ e tupu te hoê tairururaa moˈa no outou. Eiaha outou e rave i te tahi ohipa rohirohi. E faatureraa vai maoro te reira i roto i to outou mau nohoraa atoa no to outou mau uˈi atoa.
22 “‘Ia ooti outou i te maa auhune o to outou fenua, eiaha e ooti pauroa i te hiti o ta outou faaapu e eiaha e ohi haere i tei toe mai o ta outou ootiraa.+ E vaiiho outou i te reira no te taata riirii*+ e no te taata ê e parahi ra i rotopu ia outou.+ O vau o Iehova to outou Atua.’”
23 Paraparau faahou maira Iehova ia Mose, a na ô ai:
24 “A parau i te ati Iseraela: ‘I te mahana matamua o te hitu o te avaˈe, e haapao outou i te hoê mahana faafaaearaa, e haamanaˈoraa faaarahia na roto i te hoê faaotoraa pu,+ e tairururaa moˈa.
25 Eiaha outou e rave i te tahi ohipa rohirohi, e e hopoi mai outou i te hoê tusia pûpûhia ia Iehova na roto i te auahi.’”
26 Paraparau faahou maira Iehova ia Mose, a na ô ai:
27 “Tera râ, i te ahuru o te mahana o taua hitu o te avaˈe ra, o te Mahana faahauraa ïa.+ E faatupu outou i te hoê tairururaa moˈa, e faaite outou i to outou oto*+ e e hopoi mai outou i te hoê tusia pûpûhia ia Iehova na roto i te auahi.
28 Eiaha outou e rave i te tahi ohipa i taua mahana taa ê ra, no te mea e mahana faahauraa no te pûpû i te faahauraa+ no outou i mua ia Iehova to outou Atua.
29 Te taata e ore e faaite i to ˈna oto* i taua mahana ra, e haapohehia ïa mai roto mai i to ˈna nunaa.+
30 E haamou vau mai rotopu mai i to ˈna nunaa i te taata atoa e rave i te ohipa i taua mahana ra.
31 Eiaha outou e rave i te tahi ohipa. E faatureraa vai maoro te reira no to outou mau uˈi atoa i te mau vahi atoa e parahi ai outou.
32 E Sabati te reira, e mahana faafaaearaa no outou, e e faaite outou i to outou oto+ i te iva o te mahana o te avaˈe i te ahiahi. E haapao outou i ta outou Sabati mai te ahiahi i te tahi atu ahiahi.”
33 Paraparau noa maira Iehova ia Mose, a na ô ai:
34 “A parau i te ati Iseraela: ‘I te 15 o te mahana o taua hitu o te avaˈe ra, o te Oroa patiaraa tiahapa* ïa e hitu mahana no Iehova.+
35 E faatupuhia te hoê tairururaa moˈa i te mahana matamua, e eiaha outou e rave i te tahi ohipa rohirohi.
36 E hitu mahana, e hopoi mai outou i te hoê tusia pûpûhia ia Iehova na roto i te auahi. I te vaˈu o te mahana, e faatupu outou i te hoê tairururaa moˈa+ e e hopoi mai outou i te hoê tusia pûpûhia ia Iehova na roto i te auahi. E tairururaa taa ê. Eiaha outou e rave i te tahi ohipa rohirohi.
37 “‘Tera te mau oroa+ a Iehova ia faaara outou i te nunaa ei tairururaa moˈa+ no te hopoi mai i te hoê tusia pûpûhia ia Iehova na roto i te auahi: te tusia taauahi+ e te tusia huero maa+ pûpûhia e te tusia animara e te mau tusia uaina+ ia au i tei faataahia no te mahana tataitahi.
38 Mea taa ê te reira i tei pûpûhia i te mau Sabati a Iehova,+ e ta outou mau ô,+ ta outou mau tusia euhe,+ e ta outou mau ô horoa noa,+ ia horoa outou ia Iehova.
39 Tera râ, i te 15 o te mahana o te hitu o te avaˈe, ua haaputu anaˈe outou i te maa o te fenua, ia faatupu outou i te oroa a Iehova e hitu mahana.+ I te mahana matamua, e mahana faafaaearaa ïa e i te vaˈu o te mahana, e mahana faafaaearaa ïa.+
40 I te mahana matamua, e rave outou i te hotu o te mau tumu raau nehenehe, te mau amaa tamara,+ te mau amaa o te mau tumu raau mea rauere roa e te mau amaa arobe o te peho, e e oaoa outou+ i mua ia Iehova to outou Atua e hitu mahana.+
41 E faatupu outou i te reira ei oroa na Iehova e hitu mahana i te matahiti.+ Ei faatureraa vai maoro no to outou mau uˈi atoa, e faatupu outou i te reira i te hitu o te avaˈe.
42 E parahi outou i raro aˈe i te mau tiahapa e hitu mahana.+ E parahi pauroa te taata tumu i Iseraela i raro aˈe i te mau tiahapa,
43 ia ite to outou mau uˈi no a muri aˈe+ e i raro aˈe i te mau tiahapa to ˈu haaparahiraa i te ati Iseraela, i to ˈu aratairaa ia ratou i rapae i te fenua o Aiphiti.+ O vau o Iehova to outou Atua.’”
44 Paraparau atura ïa Mose i te ati Iseraela no nia i te mau oroa a Iehova.
Nota i raro i te api
^ 1 hina: 3,67 L. Hiˈo i te tuhaa hau B14.
^ Aore ra “tamǎrû.” Heb: “faahau.”
^ 2/10 epha: 4,4 L. Hiˈo i te tuhaa hau B14.
^ 2/10 epha: 4,4 L. Hiˈo i te tuhaa hau B14.
^ Aore ra “tamǎrû.” Heb: “faahau.”
^ Aore ra “e mauiui ra.”
^ Ma te haapae anei i te maa aore ra te tahi atu mau mea.
^ Huri-atoa-hia “haapae i te maa.”
^ Aore ra “tamaru no tau mahana noa.”
