Levitiko 11:1-47
-
Animara viivii e viivii ore (1-47)
11 Na ô maira Iehova ia Mose raua Aarona:
2 “A parau i te ati Iseraela: ‘Teie te mau animara ora o te fenua ta outou e nehenehe e amu:+
3 Pauroa te animara e maiuu amaha to ratou e tei amaha maitai te maiuu e o te tamǎrû i ta ratou maa, te nehenehe e amuhia.
4 “‘Eiaha râ outou e amu i teie mau animara o te tamǎrû i ta ratou maa aore ra e maiuu amaha to ratou: te kamela o te tamǎrû i ta ˈna maa aita râ e maiuu amaha to ˈna. Mea viivii ratou no outou.+
5 Oia atoa te rapiti no te mato,+ no te mea e tamǎrû oia i ta ˈna maa, aita râ e maiuu amaha to ˈna. Mea viivii ratou no outou.
6 Oia atoa te aranabata, no te mea e tamǎrû oia i ta ˈna maa, aita râ e maiuu amaha to ˈna. Mea viivii ratou no outou.
7 Oia atoa te puaa,+ no te mea e maiuu amaha to ˈna e mea amaha maitai to ˈna maiuu, eita râ e tamǎrû i ta ˈna maa. Mea viivii ratou no outou.
8 Eiaha outou e amu i to ratou iˈo, eiaha atoa e tapea i to ratou tino pohe. Mea viivii ratou no outou.+
9 “‘Teie ta outou e nehenehe e amu i roto i te pape: Te mau mea atoa i roto i te pape e pehau e e poa to ratou, i roto anei i te miti aore ra te anavai, tera ta outou e nehenehe e amu.+
10 Tera râ, pauroa to roto i te miti e te anavai aita e pehau e aita e poa to ratou, i rotopu pauroa te animara o te aere e pauroa te tahi atu animara ora i roto i te pape, mea faufau ïa no outou.
11 Ia riro iho â te reira ei mea faufau no outou, e eiaha outou e amu i to ratou iˈo+ e ia faufau outou i te reira tei pohe.
12 Pauroa to roto i te pape aita e pehau e aita e poa to ratou, mea faufau ïa no outou.
13 “‘Teie te mau animara rere ia faufau outou, eiaha ia amuhia, mea faufau hoi: te aeto,+ te peresa, te ozeni,+
14 te aia uteute e te mau huru aia ereere atoa,
15 te mau huru oreba atoa,
16 te ione, te tehemesa, te sehepha, te mau huru nesa atoa,
17 te tehemesa nainai, te seleka, te tehemesa tariˈa roa,
18 te tenesemata, te kata, e te rehema,
19 te heside, te mau huru anephe atoa, te dukipata, e te iore pererau.
20 Pauroa te animara pererau* avae maha o te aere, mea faufau ïa no outou.
21 “‘O te mau animara pererau avae maha o te aere, e nehenehe noa outou e amu i tera mau animara mea roa ˈˈe e piti avae i te tahi atu na avae no te ouˈa haere i nia i te fenua.
22 Teie ta outou e nehenehe e amu: te mau vivi ratere ua rau te huru, te mau vivi e tano ia amu,+ te peretei e te tahi atu mau vivi.
23 Pauroa te tahi atu animara pererau avae maha, mea faufau ïa no outou.
24 I te reira e viivii ai outou. Pauroa te taata e tapea i te reira tei pohe, e viivii ïa e ahiahi noa ˈtu.+
25 Te taata o te rave i te reira tei pohe, e horoi oia i to ˈna mau ahu.+ E viivii oia e ahiahi noa ˈtu.
26 “‘Te mau animara atoa e maiuu amaha to ratou, e ere râ mea amaha maitai te maiuu e o te ore e tamǎrû i ta ratou maa, mea viivii ïa no outou. E viivii te taata atoa o te tapea i te reira.+
27 Pauroa te animara ora o te taahi i nia i te vahi parahurahu o to ratou avae* o te mau animara avae maha atoa, mea viivii ïa no outou. Pauroa te taata e tapea i te reira tei pohe, e viivii ïa e ahiahi noa ˈtu.
28 Te taata o te rave i te reira tei pohe, ia horoi ïa i to ˈna mau ahu,+ e e viivii oia e ahiahi noa ˈtu.+ Mea viivii ratou no outou.
29 “‘Teie te mau animara o te aere o te fenua mea viivii no outou: te iore heru, te iore ouˈa,+ te mau huru moo atoa,
30 te aneke, te moo rahi, te letae, te moo one, e te moo û rau.
31 Mea viivii teie mau animara o te aere no outou.+ Pauroa te taata e tapea i te reira tei pohe, e viivii ïa e ahiahi noa ˈtu.+
32 “‘Pauroa te mea e topahia i te reira ia pohe ratou, e viivii ïa, e taihaa raau anei, e ahu, e iri, aore ra e ahu oto. E tapuruhia i roto i te pape te taihaa atoa o te faaohipahia, e e viivii te reira e ahiahi noa ˈtu, i reira e mâ ˈi.
33 Ia topa tera mau animara i roto i te hoê farii araea, e tuparari outou i te reira, e e viivii te mau mea atoa i roto i taua farii ra.+
34 E viivii te mau huru maa atoa ua rari i te pape no roto i taua farii ra e e viivii te mea atoa te nehenehe e inuhia i roto i taua farii ra.
35 E viivii te mau mea atoa te topahia i te reira tei pohe. E umu anei aore ra e ofai paˈe pani, e tupararihia ïa. Mea viivii ratou, e ia viivii noa ratou no outou.
36 Te pape pihaa noa e te apoo pape no te haapue i te pape te vai viivii ore, te taata râ te tapea i te reira tei pohe, e viivii ïa.
37 Ia topa râ te reira tei pohe i nia iho i te tahi huero maa o te ueuehia, mea viivii ore ïa.
38 Ia rari râ te tahi huero maa i te pape tei topahia i te tahi tuhaa o te reira tei pohe, mea viivii ïa taua huero maa ra no outou.
39 “‘E ia pohe te tahi animara ta outou e rave ei maa na outou, e viivii te taata e tapea i to ˈna tino pohe e ahiahi noa ˈtu.+
40 E horoi te taata e amu i to ˈna tino pohe i to ˈna mau ahu, e e viivii oia e ahiahi noa ˈtu.+ E horoi te taata e hopoi ê i to ˈna tino pohe i to ˈna mau ahu e e viivii oia e ahiahi noa ˈtu.
41 Mea faufau pauroa te animara o te aere o te fenua.+ Eiaha te reira ia amuhia.
42 Eiaha roa outou e amu i te tahi animara e nee i nia i to ˈna opu, te tahi animara avae maha, aore ra te tahi atu animara o te aere mea rahi to ˈna avae, mea faufau hoi te reira.+
43 Eiaha e faariro ia outou ei mea faufau na roto i te mau animara o te aere, e eiaha e haaviivii ia outou iho a viivii atu ai outou i te reira.+
44 O vau hoi o Iehova to outou Atua,+ ia haamoˈa outou ia outou e ia moˈa outou,+ no te mea mea moˈa vau.+ Eiaha ïa outou e haaviivii ia outou i te tahi animara e aere o te fenua.
45 O vau hoi o Iehova, tei aratai ia outou i rapae i te fenua o Aiphiti no te haapapu ia outou e o vau te Atua,+ e ia moˈa outou,+ no te mea mea moˈa vau.+
46 “‘Tera te ture no nia i te mau animara, te mau animara rere, te mau animara ora atoa o te au i roto i te mau pape, e no nia i te mau animara atoa o te aere i nia i te fenua,
47 no te faataa ê i te mea viivii e te mea viivii ore, i te mau animara ora te nehenehe e amuhia e te ore e nehenehe e amuhia.’”+
