Isaia 46:1-13
46 Te piˈo ra o Belâ,+ ua fefe o Nebo.
Te faautahia ra to raua mau idolo i nia i te animara, e animara faauta taihaa,+Mai te taihaa e faateiaha i te animara rohirohi.
2 Ua fefe e ua piˈo raua.Eita raua e nehenehe e faaherehere mai i ta raua e faauta ra,*E o raua atoa te hopoi-ê-hia.
3 “A faaroo mai ia ˈu, e te utuafare o Iakoba, e outou pauroa te toea o te nunaa o Iseraela,+Outou ta ˈu i faaoromai tae roa i te fanauraa, e ta ˈu i amo mai to outou fanauraahia mai.+
4 E ruhiruhia noa ˈtu outou, eita vau e taui.+E hinahina noa ˈtu to outou upoo, e amo noa vau ia outou.
Mai ta ˈu i rave, e amo, e hopoi e e faaora vau ia outou.+
5 Ia vai outou e faaau, e faaaifaito aore ra e faahohoˈa ˈi ia ˈu,+Ia hohoˈa mâua?+
6 Te vai ra o te tatara rahi mai i te auro no roto i ta ratou pute moni.E faito ratou i te ario i nia i te faito.
E tarahu ratou i te taata tupai auri, e e hamani oia i te atua i te reira.+
E tipapa ratou, oia mau, e haamori ratou* i te reira.+
7 E amo ratou i te reira i nia i to ratou tapono.+E amo ratou i te reira a tuu atu ai i to ˈna vairaa, e e vai noa i reira.
Eita te reira e hauti i to ˈna vahi.+
E taparu ratou i te reira, eita râ e pahono mai.Eita te reira e nehenehe e faaora i te taata e ahoaho ra.+
8 A haamanaˈo i te reira, e a faaitoito.
A feruriruri i te reira i roto i to outou aau, outou te feia ofati ture.
9 A haamanaˈo i te mau mea tahito* i mutaa iho ra,O vau hoi te Atua,* e aita ˈtu.
O vau te Atua, e aita ˈtu mai ia ˈu.+
10 Mai te haamataraa, e tohu vau i te hopearaa,E mai mutaa iho ra, te mau mea aita â i ravehia ˈtura.+
E parau vau: ‘E tupu ta ˈu faaotiraa,*+E e rave au i te mau mea atoa tei au ia ˈu.’+
11 Te pii nei au i te aeto mai te hitiraa mai o te mahana,*+E te taata e faatupu i ta ˈu faaotiraa* mai te tahi fenua atea.+
Ua parau vau, e e rave au.
Ua opua vau, e e faatupu atoa vau.+
12 A faaroo mai ia ˈu, outou te feia aau haapaari,*Outou tei atea ê i te parau-tia.
13 Ua faafatata mai au i ta ˈu parau-tia.E ere i te mea atea,E eita ta ˈu faaoraraa e haamaoro.+
E horoa vau i te faaoraraa no Ziona, e to ˈu hanahana no Iseraela.”+
Nota i raro i te api
^ Oia hoi ta raua mau idolo faautahia ra i nia i te animara.
^ Heb: “e piˈo ratou i mua.”
^ Heb: “matamua.”
^ Aore ra “E Atua hoi au.”
^ Aore ra “opuaraa,” “aˈoraa.”
^ Aore ra “mai hitia o te râ mai.”
^ Aore ra “opuaraa,” “aˈoraa.”
^ Heb: “puai.”
