Iosua 2:1-24
2 Tono omoˈe atura Iosua te tamaiti a Nuna e piti tane ei mata huna mai Sitima+ mai. Parau atura oia ia raua: “A haere a hiˈopoa i tera fenua, o Ieriko iho â râ.” Haere aˈera ïa raua e tae atura i ǒ te tahi vahine taiata o Rahaba+ te iˈoa, e faaea ihora i reira.
2 Parauhia ˈtura te arii no Ieriko: “Inaha, e tane Iseraela tei tomo mai i ǒ nei inapo ra e hiˈopoa i te fenua.”
3 Faatae ihora te arii no Ieriko i te tahi poroi ia Rahaba: “A tuu mai i rapaeau i na tane tei haere mai e te faaea ra i ǒ oe, ua haere mai hoi raua e hiˈopoa i teie fenua taatoa.”
4 I rave mai na râ te vahine i na tane e piti e i faatapuni na ia raua. Parau atura oia: “Ua haere mai iho â na tane ra i ǒ ˈu, aita râ vau i ite nohea mai raua.
5 E i te poiriraa, a fatata ˈi te uputa o te oire i te tapirihia, haere aˈera na tane i rapae. Aita vau i ite ihea raua i te haereraa, ia tapapa oioi râ outou ia raua, e roaahia raua e outou.”
6 (I afai na râ oia ia raua i nia i te tapoˈi fare e i faatapuni na ia raua i raro aˈe i te mau lino tei apǎpǎhia i nia i te tapoˈi fare.)
7 Tapapa aˈera te mau tane ta te arii i tono ia raua na te eˈa e tae atu ai i Ioridana i te mau vahi papaˈu,+ e tapirihia ˈtura te uputa o te oire i to ratou haereraa ˈtu i rapae.
8 Hou na tane a tarava ˈi no te taoto, haere aˈera te vahine ia raua ra i nia i te tapoˈi fare.
9 Parau atura oia ia raua: “Ua ite iho â vau e horoa Iehova i teie fenua no outou+ e ua mǎtaˈu roa matou ia outou.+ Te hepohepo ra te mau taata atoa o teie fenua no outou aˈe,+
10 ua faaroo hoi matou mea nafea te miti Uteute i te mǎrôraa ia Iehova i mua ia outou i to outou faarueraa i Aiphiti,+ e ta outou i rave i na arii e piti o te ati Amori, o Sihona+ raua Oga,+ ta outou i haamou i te tahi atu pae* o Ioridana.
11 I to matou faarooraa i te reira, toaruaru ihora to matou aau, e ere ihora te taata atoa i te itoito no outou aˈe, e Atua hoi Iehova to outou Atua no te raˈi i nia e te fenua i raro.+
12 I teie nei, a horeo mai na i mua ia Iehova e, no te here taiva ore ta ˈu i faaite ia orua, e faaite atoa mai orua i te here taiva ore i te utuafare o to ˈu metua tane. E horoa mai orua i te hoê tapao e tapea iho â orua i ta orua parau.*
13 E faaherehere outou i te ora o to ˈu metua tane e metua vahine, to ˈu mau taeae e tuahine, e pauroa to ratou taata, e e faaora outou ia matou i te pohe.”+
14 Parau maira na tane ia ˈna: “E horoa mâua i to mâua ora no outou! Ia ore oe ia faaite i to mâua tere, e faaite matou i te here taiva ore e te haapao maitai ia oe ia horoa mai Iehova i teie fenua no matou.”
15 I muri iho, haapou atura oia ia raua i raro na te haamaramarama maoti te tahi taura, tei te hoê pae aua patuhia o te oire to ˈna fare. Oia hoi, te faaea ra oia i nia iho i te aua patuhia.+
16 Parau atura oia ia raua: “A haere i te tuhaa fenua mouˈa e a tapuni i reira e toru mahana, ia ore orua ia itehia mai e te feia e tapapa ra ia orua. E ua hoˈi anaˈe mai ratou, e nehenehe orua e haere i to orua tere.”
17 Parau maira na tane ia ˈna: “Eita mâua e harahia i teie horeo ta oe i faahoreo ia mâua+
18 mai te peu, ia tomo mai matou i teie fenua, e taamu oe i teie taura uteute i te haamaramarama na reira oe i te haapouraa ia mâua i raro. E haaputuputu oe i to metua tane, to metua vahine, to mau taeae, e pauroa te utuafare o to metua tane i ǒ oe.+
19 Te taata râ e haere i rapae na te mau uputa o to fare, ei nia to ˈna toto i to ˈna iho upoo, e eita mâua e harahia. Ia fifi râ* te hoê taata e faaea noa e oe i roto i to fare, ei nia to ˈna toto i to mâua upoo.
20 Ia faaite râ oe i to mâua tere,+ eita mâua e harahia i ta oe horeo ta oe i faahoreo ia mâua.”
21 Pahono atura oia: “Na reira ïa mai ta orua i parau.”
Tuu atura oia ia raua ia haere, e haere atura raua i to raua tere. I muri iho, taamu ihora oia i te taura uteute i te haamaramarama.
22 Faarue maira ïa raua i reira, haere atura i te tuhaa fenua mouˈa e faaea ihora i reira e toru mahana e ia hoˈi roa te mau tane tei tapapa ia raua. Ua imi haere ratou ia raua na te mau purumu atoa, aita râ i itehia mai.
23 Pou ihora na tane e piti mai nia mai i te tuhaa fenua mouˈa, na roto atura i te anavai e tae atura ia Iosua ra te tamaiti a Nuna. Faatia pauroa ˈtura raua ia ˈna i to raua tere.
24 Parau atura raua ia Iosua: “Ua tuu mai Iehova i teie fenua taatoa ia tatou.+ Oia hoi, ua hepohepo to teie fenua atoa no tatou aˈe.”+
Nota i raro i te api
^ Oia hoi te pae hitia o te râ.
^ Aore ra “hoê tapao e nehenehe e tiaturihia.”
^ Aore ra “Ia rave noa mai te hoê taata i te tahi mea i nia i.”
