Ieremia 39:1-18
39 I te iva o te matahiti faatereraa a Zedekia te arii o Iuda, i te ahuru o te avaˈe, haere maira Nebukanesa te arii o Babulonia e ta ˈna nuu taatoa i Ierusalema, e haaati aˈera ratou i taua oire ra.+
2 I te 11 o te matahiti faatereraa a Zedekia, i te iva o te mahana o te maha o te avaˈe, faaapoo aˈera ratou i te aua o te oire.+
3 E tomo ihora pauroa te huiarii a te arii o Babulonia e parahi ihora i te Uputa i ropu,+ oia hoi Neregala-sarezera te Samagara, Nebo-saresekima te Rabasarisa,* Neregala-sarezera te Rabamaga* e pauroa te toea o te huiarii a te arii o Babulonia.
4 I to Zedekia te arii o Iuda e pauroa te faehau iteraa ˈtu ia ratou, horo ê aˈera ratou+ i te po, a haere ai i rapae i te oire na te ô o te arii, na te uputa i ropu i na patu e piti, e haere noa ˈtura ratou na te eˈa e tae atu ai i te Araba.+
5 Aˈuaˈu aˈera râ te nuu Kaladaio ia ratou, e noaahia ˈtura Zedekia i te mau vahi papu pâpâmǎrô o Ieriko.+ Haru aˈera ratou ia ˈna e aratai atura ia ˈna ia Nebukanesa te arii o Babulonia i Ribela+ i te fenua o Hamata,+ i reira to te arii faautuaraa ia ˈna.
6 Na nia i te faaueraa a te arii o Babulonia, haapohehia aˈera na tamaiti a Zedekia i mua i to ˈna aro i reira i Ribela. Na nia atoa i te faaueraa a te arii o Babulonia, haapohehia aˈera pauroa te huimana o Iuda.+
7 Haapo ihora oia i te mata o Zedekia, e i muri iho, taamu atura oia ia ˈna i te fifi veo no te afai ia ˈna i Babulonia.+
8 Tanina aˈera te mau Kaladaio i te aorai* o te arii e te mau fare o te nunaa,+ e vavahi aˈera i te aua o Ierusalema.+
9 Hopoi ê atura Nebuzaradana,+ te raatira o te mau tiai, i Babulonia i te feia i roto â i te oire, te feia tei horo ia ˈna ra, e te taata atoa e toe ra.
10 Vaiiho maira râ Nebuzaradana, te raatira o te mau tiai, i te fenua o Iuda vetahi o te mau taata veve roa ˈˈe, te feia aita hoê aˈe taoˈa ta ratou. I taua mahana ra, horoa atoa ˈtura oia na ratou i te faaapu vine e te tâpû fenua no te faaapu.*+
11 Horoa ihora râ Nebukanesa te arii o Babulonia ia Nebuzaradana te raatira o ta ˈna mau tiai, i teie faaueraa no Ieremia:
12 “A tii ia ˈna e a aupuru ia ˈna. Eiaha oe e rave ino ia ˈna, e a horoa ˈtu i ta ˈna e ani ia oe.”+
13 Tono ihora ïa Nebuzaradana te raatira o te mau tiai, Nebusabana te Rabasarisa,* Neregala-sarezera te Rabamaga* e pauroa te taata tiaraa teitei o te arii o Babulonia i te taata
14 e tatara mai ia Ieremia i te Aua tiairaa,+ e tuu atura ratou ia ˈna ia Gedalia+ ra te tamaiti a Ahikama+ te tamaiti a Saphana+ o tei afai ia ˈna i to ˈna fare. E ora ihora Ieremia i rotopu i te nunaa.
15 Te tapeahia ra Ieremia i roto i te Aua tiairaa+ i tae mai ai te parau a Iehova ia ˈna e na ô ra:
16 “A haere a parau ia Ebeda-meleka+ te taata Etiopia: ‘Teie ta Iehova o te mau nuu,* te Atua o Iseraela, e parau ra: “E faatupu vau i ta ˈu i parau no teie oire, te ati, e ere i te maitai. E i taua mahana ra, e ite mata oe i te reira.”’
17 “‘E faaora râ vau ia oe i taua mahana ra,’ te parau ra Iehova, ‘e eita oe e tuuhia i te feia ta oe e mǎtaˈu ra.’
18 “‘E rave mau â hoi au e ia ora ˈtu oe, e eita oe e pohe i te ˈoˈe. O to oe ora te taoˈa haruhia,*+ no te mea ua tiaturi oe ia ˈu,’+ te parau ra Iehova.”
Nota i raro i te api
^ Aore ra “Neregala-sarezera, Samagara-nebo, Saresekima, Rabasarisa,” ia au i te tahi atu faanahoraa taˈo o te papai Hebera.
^ Aore ra “te raatira o te feia peu manamana (feia hiˈo fetia).”
^ Heb: “fare.”
^ Huri-atoa-hia “te ohipa titauhia.”
^ Aore ra “te raatira o te mau tia mana.”
^ Aore ra “te raatira o te feia peu manamana (feia hiˈo fetia).”
^ Aore ra “sabaota.”
^ Aore ra “E ora ˈtu oe.”
