Ieremia 19:1-15
19 Teie ta Iehova i parau: “A haere i ǒ te tahi potera+ e hoo mai i te tahi farii araea. A rave atoa i te tahi mau matahiapo o te nunaa e te tahi mau matahiapo o te mau tahuˈa,
2 e a haere i te peho o te Tamaiti a Hinoma,+ i te tomoraa o te Uputa o te huˈahuˈa farii araea. E i reira, a poro i te mau parau ta ˈu e faaite ia oe.
3 E parau oe: ‘A faaroo i te parau a Iehova, outou te mau arii o Iuda e tei parahi ra i Ierusalema. Teie ta Iehova o te mau nuu,* te Atua o Iseraela, e parau ra:
“‘“Te faatae mai nei au i te tahi ati i nia i teie vahi, e e taˈi na tariˈa o te feia e faaroo i te reira.
4 No te mea ua faarue ratou ia ˈu+ e ua faariro i teie vahi ei mea huru ê.+ I reira ratou e pûpû ai i te tusia i te tahi atu mau atua, ta ratou, to ratou mau tupuna e te mau arii o Iuda i ore i matau, e ua î teie vahi ia ratou i te toto o te feia hara ore.+
5 Ua patu ratou i te mau vahi teitei a Baala no te tanina i ta ratou mau tamarii ei tusia taauahi taatoa na Baala,+ e ohipa ta ˈu i ore i faaue aore ra i parau e tei ore i tupu aˈenei i roto i to ˈu aau.”’*+
6 “‘“No reira,” te parau ra Iehova, “inaha, te haere mai ra te mau mahana e ore ai teie vahi e parau-faahou-hia o Topheta aore ra te peho o te Tamaiti a Hinoma, te peho râ o te taparahi-pohe-raa.+
7 E faahape au i te mau opuaraa a Iuda e a Ierusalema i teie vahi, e e pohe ratou ia ˈu i te ˈoˈe i mua i to ratou mau enemi e i te rima o te feia e imi ra i te rave i to ratou ora. E e horoa vau i to ratou tino pohe ei maa na te mau manu o te raˈi e na te mau animara o te fenua.+
8 E e faariro vau i teie oire ei riariaraa e ei hioraa faaooo. Te taata atoa o te haere na reira, e hiˈo atu ïa ma te riaria e e hio no to ˈna mau ati atoa.+
9 E e rave au ia amu ratou i te iˈo o ta ratou mau tamaiti e tamahine, e e amu ratou tataitahi i te iˈo o to ratou taata tupu, no te mea ua haaatihia te oire e to ratou mau enemi e te feia e imi ra i te rave i to ratou ora,+ e no to ratou hepohepo rahi.”’
10 “I muri iho, a haaparari i te farii i mua i te mata o te mau tane e na muri ia oe,
11 e a parau ia ratou: ‘Teie ta Iehova o te mau nuu e parau ra: “Mai teie au e haaparari ai i teie nunaa e teie oire, mai te tahi taata o te haaparari i te tahi farii a te potera, a ore roa ˈtu ai e nehenehe e tataî. E e huna ratou i te feia pohe i Topheta haapao apǐ roa te vahi hunaraa.”’+
12 “‘Tera ta ˈu e rave i teie vahi e i to reira mau taata,’ te parau ra Iehova, ‘ia riro teie oire mai ia Topheta.
13 E e riro te mau fare o Ierusalema e te mau fare o te mau arii o Iuda mai teie vahi, o Topheta,+ i te viivii. Oia mau, pauroa te fare i pûpûhia ˈi te tusia i nia i te mau tafare i te nuu taatoa o te raˈi+ e i reira i niniihia ˈi te tusia uaina na te tahi atu mau atua.’”+
14 I to Ieremia hoˈiraa mai na Topheta mai i reira Iehova i te tonoraa ia ˈna e tohu, tia ihora oia i roto i te aua o te fare o Iehova e parau atura i te nunaa taatoa:
15 “Teie ta Iehova o te mau nuu, te Atua o Iseraela, e parau ra: ‘Teie au e faatae mai nei i nia i teie oire e te mau oire tapiri atoa pauroa te ati ta ˈu i parau e faatae mai, no te mea ua onoono noa ratou i te ore* e faaroo mai i ta ˈu mau parau.’”+
Nota i raro i te api
^ Aore ra “sabaota.”
^ Aore ra “feruriraa.”
^ Heb: “ua faaetaeta ratou i to ratou aˈî a ore atu ai.”
