Deuteronomi 13:1-18
-
Nafea e rave i te feia taiva (1-18)
13 “Ia tia noa mai i rotopu ia outou te tahi peropheta aore ra te tahi taata o te tohu na roto i te moemoeâ, e ia horoa mai i te tahi tapao aore ra ia tohu i te tahi ohipa maere,
2 e ia tupu te tapao aore ra te ohipa maere ta ˈna i parau ia oe, a na ô ai: ‘Mai haere anaˈe na muri i te tahi atu mau atua,’ te mau atua aita oe i ite o vai, ‘e e tavini anaˈe ia ratou,’
3 eiaha e faaroo i te mau parau a taua peropheta ra aore ra a taua taata moemoeâ+ ra, te tamata+ nei hoi Iehova to outou Atua ia outou no te ite te here ra anei outou ia Iehova to outou Atua ma to outou aau atoa e to outou ora* atoa.+
4 Na muri ia Iehova to outou Atua e haere ai outou, o ˈna ta outou e mǎtaˈu, ta ˈna mau faaueraa ta outou e auraro, to ˈna reo ta outou e faaroo. O ˈna ta outou e tavini, e o ˈna ta outou e ati maite.+
5 Area taua peropheta ra aore ra taua taata moemoeâ ra, ia haapohehia+ ïa, no te mea ua turai oia i te taata ia orure hau ia Iehova to outou Atua, tei aratai ia outou i rapae i Aiphiti e tei hoo mai ia outou i te fenua* o te faatîtîraa, no te faahahi ê ia outou i te eˈa ta Iehova to outou Atua i faaue ia outou ia na reira i te haere. E iriti ê oe i te mea ino mai rotopu ia outou.+
6 “Ia tamata noa ˈtu to taeae, te tamaiti a to metua vahine, aore ra to tamaiti, to tamahine, to vahine faaipoipo here aore ra to hoa rahi i te faahema ia oe ma te omoˈe, a na ô ai: ‘Mai haere anaˈe e tavini i te tahi atu mau atua,’+ te mau atua aita oe e aita atoa to mau tupuna i ite o vai,
7 i rotopu i te mau atua o te mau nunaa ati aˈe ia outou, mea piri anei aore ra mea atea ia oe, mai te hopea o te fenua i te tahi atu hopea o te fenua,
8 eiaha oe e faatia i to ˈna hinaaro aore ra e faaroo ia ˈna.+ Eiaha atoa e aroha, e aumihi e e paruru ia ˈna.
9 Tera râ, e haapohe mau â oe ia ˈna.+ Na to rima na mua e haapohe ia ˈna, e te rima o te nunaa taatoa i muri iho.+
10 E pehi oe ia ˈna i te ofai e ia pohe roa,+ no te mea ua imi oia i te haafariu ê ia oe ia Iehova to Atua, tei aratai ia outou i rapae i Aiphiti, te fenua* o te faatîtîraa.
11 E faaroo ïa o Iseraela taatoa, e mǎtaˈu ratou, e e ore roa ratou e rave faahou i te tahi ohipa ino mai tera i rotopu ia outou.+
12 “Ia faaroo noa ˈtu oe i roto i te hoê o to mau oire ta Iehova to Atua e horoa ˈtu nei ia parahi oe i reira, i teie parau:
13 ‘E feia faufaa ore no rotopu ia outou tei haere e haafariu ê i te mau taata o to ratou oire, a na ô ai: “Mai haere anaˈe e tavini i te tahi atu mau atua,” te mau atua aita outou i ite o vai,’
14 e hiˈopoa ïa oe i taua ohipa ra, e titorotoro e e ui haere oe i te taata.+ E mai te peu e tera iho â, te ravehia ra taua ohipa hairiiri ra i rotopu ia outou,
15 e tairi mau â oe i te mau taata o taua oire ra i te ˈoˈe.+ A faataa i taua oire ra e to roto atoa, tae noa ˈtu ta ˈna mau animara, no te haamouraa+ i te ˈoˈe.
16 E haaputu oe i muri iho i ropu i te mahora o taua oire ra pauroa te taoˈa i haruhia i reira, e tanina oe i te oire, e e riro tei haruhia ei tusia taatoa pûpûhia ia Iehova to Atua. E riro taua oire ra ei haapueraa huˈahuˈa e a muri noa ˈtu. E ore roa ˈtu te reira e patu-faahou-hia.
17 Eiaha to rima e rave i te tahi mea tei faataahia no te haamouraa,*+ ia fariu ê Iehova i to ˈna riri rahi, ia aroha hamani maitai, ia aumihi e ia faarahi oia ia oe, mai ta ˈna iho â i horeo i to mau tupuna.+
18 E faaroo hoi oe ia* Iehova to Atua ma te auraro i ta ˈna mau faaueraa atoa ta ˈu e faaue nei ia oe i teie mahana, a rave ai i te mea tia i te aro o Iehova to Atua.+
Nota i raro i te api
^ Heb: “fare.”
^ Heb: “fare.”
^ Aore ra “tei faataa-ê-hia na roto i te tahi opaniraa.”
^ Aore ra “faaroo hoi oe i te reo o.”
