I te 19 no Me 2022, ua hau i te 75 tia tei faaite i te Apooraa o te Parururaa o te mau Nunaa Amui e, “no te maˈi pee COVID-19 e te tauiraa o te ahuaraˈi, ua ere vetahi fenua i te maa e no te tamaˈi i Ukraine, e nehenehe te oˈe e tupu na te ao nei.” I muri iti noa ˈˈe, ua faaite te vea Economist e “no te tamaˈi, e rahi atu â te taata o te pohe i te poia.” I roto i te Bibilia, ua tohuhia e e tupu te oˈe i to tatou nei tau. Te horoa atoa nei râ te Bibilia i te ravea no te faaoromai tamau i te reira.

•    Ua tohu Iesu: “E aro hoi te tahi nunaa i te tahi atu nunaa e te tahi faatereraa i te tahi atu faatereraa, e e tupu te oˈe.”—Mataio 24:7.

•    I roto i te buka Apokalupo, te faahitihia ra e maha taata faahoro puaahorofenua. E faahohoˈahia hoê o ratou i te tamaˈi. Na muri ia ˈna, te tere ra te taata faahoro puaahorofenua ereere o te faahohoˈahia ra i te oˈe, oia hoi, te hoê tau e taranihia te maa aore ra e maraa ˈtu â te moni o te maa. “Ite atura vau e inaha, te hoê puaahorofenua ereere, e e faito tei te rima o tei parahi ra i nia iho. Faaroo atura vau mai te hoê reo . . . i te parauraa: ‘Hoê kilo sitona, hoê ïa denari. E toru kilo kerite, hoê ïa denari.’”—Apokalupo 6:5, 6.

 Te tupu ra teie mau parau tohu i to tatou nei tau, oia hoi, te tau ta te Bibilia e pii ra “te mau mahana hopea.” (Timoteo 2, 3:1) No te ite atu â no nia i “te mau mahana hopea” e na maha taata faahoro puaahorofenua o te Apokalupo, a mataitai i te video Le monde a changé depuis 1914 e a taio i te tumu parau “Na taata faahoro puaarehenua, te auraa no tatou.”

•    I roto i te Bibilia, te vai ra te mau aˈoraa î i te paari o te nehenehe e tauturu ia tatou ia faaoromai tamau i te mau tupuraa fifi, mai te maraaraa o te moni maa e te oˈe. No te tahi mau hiˈoraa, a taio i te tumu parau “Comment vivre avec moins.”

•    I roto i te Bibilia, te horoa-atoa-hia ra te tiaturiraa e e maitai mai te oraraa. Te fafauhia ra e “e rahi te huero maa i nia i te fenua” e e fanaˈo te taata atoa i te rahi o te maa. (Salamo 72:16) No te ite atu â no nia i te tiaturiraa ta te Bibilia e horoa ra no a muri aˈe e no te aha outou e nehenehe ai e tiaturi i te reira, a taio i te tumu parau “Te hoê tiaturiraa papu no te hoê oraraa maitai aˈe.”