I te matahiti 1930, aita te mau Ite no Iehova i poro i Initonetia, Malaisie e Papua. E nafea te parau apî e haapararehia ˈi i tera mau fenua? Ua hoo te amaa no Auteralia (Auteralia-Asia i teie mahana) i te hoê pahi taie 16 metera te roa. Ua horoahia te iˈoa Lightbearer no te mea e fano te mau pionie a i te mau vahi atea no te haaparare i te parau mau.—Mataio 5:14-16.

 I Fepuare 1935, ua fano na horo pahi e hitu mai Sydney i te pae hitia o te râ i te hiti o Auteralia no te haere i Port Moresby, i Nouvelle-Guinée. Ua taiˈa ratou i te iˈa i te roaraa o to ratou tere, ua tapea ratou i roto e rave rahi uahu no te faaî i te mori, no te haaputu i te maa e no te tataî. I te 10 no Eperera 1935, ua fano ratou i Cooktown, i Queensland. Ua faaohipa ratou i te matini i te hoê vahi atâta mau parauhia la Grande Barrière de corail. Tera râ, ua faaarearea te matini e ua tupohe ratou i te reira. Titauhia anei ia ratou ia hoˈi i muri aore ra ia fano roa i Nouvelle-Guinée? Ua parau Eric Ewins te tapena: “Aita matou i hinaaro e hoˈi i muri.” Ua fano ïa te Lightbearer e ua tapae i Port Moresby i te 28 no Eperera 1935.

 A tataîhia ˈi te matini, ua pou te taatoaraa o te horo pahi i Port Moresby no te poro, aita râ o Frank Dewar. Ua faataa hoê o ratou e “tavini avae teretere” o Frank. Ua parau Frank: “Ua rave au i te mau papai e ua haere au mai tatahi i uta i nia 32 kilometera te atea no te poro i te feia e faaea ra i ǒ.” I to ˈna hoˈiraa mai, ua rave oia i te tahi atu eˈa e ua na roto o ˈna i te hoê anavai mea rahi roa te moo taehae. Tera râ, ua haapao maitai oia e tae roa ˈtu i te oire. Ua faufaahia te mau tutavaraa a te taatoaraa. Te tahi mau taata o tei farii i te mau papai i tera tau, ua riro mai ratou i muri iho ei Ite no Iehova.

 I muri aˈe te tataîraahia te matini, ua faarue te Lightbearer ia Port Moresby no te fano tia ˈtu i te motu no Java i Initia hitia o te râ no Holane (te taatoaraa o Initonetia i teie mahana). Ua tapea ratou i te mau uahu e rave rahi no te haaputu i te maa, e tapae atura te horo pahi i Batavia (Jakarta i teie mahana) i te 15 no Tiurai 1935.

 I tera taime, ua pou Charles Harris mero o te Lightbearer e ua faaea i Java, i reira oia i te poro-tamau-raa ma te itoito rahi. b Te parau ra oia: “E i tera tau, ta matou ohipa o te opereraa ïa i te mau papai Bibilia e i muri iho haere atu ai i te tahi atu oire. Te vai ra ta ˈu mau papai na roto i te reo Arabia, Tinito, Holane, Marite, e Initonetia. Mea farii ohie roa te mau taata i ta ˈu mau papai, no reira ua opere au fatata 17 000 papai i te matahiti.”

 Ua tapao te feia mana no Holane e taata itoito roa o Charles. I te hoê mahana, ua ani te hoê ofitie i te tahi atu Ite o te poro ra i Java, ehia Ite no Iehova i hitia o te râ no Java, te vahi i reira o Charles. Ua pahono te taeae: “Hoê anaˈe.” Na ô atura te ofitie: “E manaˈo ïa oe e tiaturi vau i ta oe parau? Titauhia e rave rahi taata no te opere i tera mau papai.”

 Mai Initonetia ua fano te Lightbearer i Singapour, e ua tapae i te 7 no Atete. I te mau vahi atoa e haere ai ratou, e haapuroro te mau taeae i te mau oreroraa parau haruharuhia ma te faaohipa i te mau haapurororaa reo. Maoti teie ravea ua anaanatae rahi mai te taata. Te parau ra te Singapore Free Press: “I te po mahana toru, ua faaroohia te hoê reo mai te miti mai. Te hoê oreroraa parau tei haapararehia mai te Lightbearer. Mai to ˈna taeraa mai i Auteralia, ua faaroohia te oreroraa parau a te Taiete Watch Tower i Singapour. Ia maitai anaˈe te reva, e faaroo-maitai-hia te oreroraa parau i nia e toru aore ra e maha kilometera te atea.”

 Noa ˈtu tei Singapour te Lightbearer, ua haamata Frank i te hoê ohipa apî. Te haamanaˈo ra o ˈna i to ˈna revaraa: “Ua haamata matou i te poro i Singapour a ora noa ˈi i nia i te pahi. I te taime râ a faarue ai te Lightbearer, ua hitimahuta roa vau i te mau parau a Eric Ewins. Ua na ô oia: ‘Frank, ua parau oe e ua maiti oe ia Siam (Thaïlande i teie mahana) ei tuhaa fenua na oe. I ǒ nei ia tatou e faaea ˈi!’ Aita vau i taa faahou e nafea, ua painu roa vau: ‘Aita hoi au i ite e nafea vau no te haere i Siam.’” Parau atura Eric ia Frank ia rave i te pereoo auahi mai Kuala Lumpur (Malaisie i teie mahana). Reva ˈtura Frank i Kuala Lumpur e tapae atura oia i Thaïlande e rave rahi avaˈe i muri iho. c

 A fano ai te Lightbearer i te pae tooa o te râ i te hiti o Malaisie, ua tapae te pahi i Johor Bahru, Muar, Malacca, Klang, Port Swettenham (Port Kelang i teie mahana) e Penang. I te mau uahu atoa e tapea ai ratou, e haapuroro te mau horo pahi i te mau oreroraa parau Bibilia haruharuhia mai te pahi mai. Ua parau te hoê tuahine o Jean Deschamp o tei tavini i Initonetia: “Ua anaanatae aˈe te taata i te pahi ahani ua tau mai te hoê faurao.” I muri aˈe i te haapurororaa e te mau haruharuraa, ua pou te mau horo pahi e ua opere i te mau papai i te mau taata e anaanatae ra.

 I Penang, ua na roto te horo pahi i te détroit de Malacca tae atu i Medan, Sumatra (e tuhaa atoa no Initonetia i teie mahana). Te haamanaˈo ra Eric Ewins: “Mea au roa to matou tere i Medan, e e rave rahi taata tei faaroo i te parau apî oaoa.” Ua opere te mau taeae fatata 3 000 papai i tera vahi.

 A fano ai te Lightbearer i te pae apatoa, ua poro te horo pahi i te mau uahu i te pae hitia o te râ o Sumatra. I Novema 1936, ua hoˈi te pahi i Singapour, te vahi i reva ˈi o Eric Ewins. Tau mahana i muri iho, ua faaipoipo o ˈna ia Irene Struys te hoê Ite no Iehova o tei ora i Singapour. Ua tavini amui raua ei pionie i Sumatra. Mea papu, e titauhia hoê tapena apî no te Lightbearer.

 Te tapena apî o Norman Senior ïa, te hoê taata faatere pahi aravihi. Ua tae oia i Sydney i Tenuare 1937. I muri iho, ua fano atu te horo pahi mai Singapour i Bornéo e i Célèbes (Sulawesi i teie mahana) i reira to ratou pororaa i nia 480 kilometera mai tatahi tae atu i uta.

 I to te Lightbearer taeraa i te uahu no Samarinda i Bornéo, aita te tapena o te uahu i farii ia poro te feia horo pahi i te feia no ǒ. Tera râ, i to Norman faataaraa i ta ratou ohipa pororaa ua farii teie taata e ua rave atoa i te tahi mau papai.

 I te hoê taime, ua titau manihini te orometua ia Norman ia paraparau i roto ta ˈna fare pure. Aita râ o ˈna i horoa i te hoê oreroraa parau, ua haapuroro Norman e pae oreroraa parau Bibilia haruharuhia maoti te matini faataˈi pehe e ua farii te orometua. Ua rave atoa oia i te mau papai no te opere na to ˈna mau hoa. Tera râ, o te orometua anaˈe tei au i te parau apî oaoa, area te taatoaraa o te tia faaroo aita roa ˈtu ratou i oaoa noa ˈˈe i te ohipa a te mau Ite no Iehova. No reira ratou i faahepo atoa ˈi i te feia mana ia opani ia haere te Lightbearer i te tahi atu mau uahu.

 I Titema 1937, i muri aˈe i te opaniraa a te tia faaroo ua hoˈi te Lightbearer i Auteralia. Ua faaea te horo pahi i te uahu no Sydney no te apiti i te hoê tairururaa a te mau Ite no Iehova i Eperera 1938. Toru matahiti ïa i muri aˈe i te faarueraa te Lightbearer ia Sydney. Ua hoohia te pahi i te matahiti 1940, i muri aˈe te opaniraahia te ohipa a te mau Ite no Iehova i Auteralia. “Ua faaohipa-maitai-hia teie pahi,” ta taeae Ewins ïa i parau, ma te faataa i ta ˈna taviniraa i nia i te Lightbearer mai “te mau matahiti oaoa roa ˈˈe o to ˈna oraraa.”

 Ua poro te feia horo pahi o te Lightbearer i te parau apî oaoa na te mau vahi mea rahi te taata. E noa ˈtu te mau patoiraa, ua faufaahia ta ratou ohipa. (Luka 8:11, 15) I te mau fenua i porohia ˈi e teie mau pionie matamua, teie mahana ua hau atu e 40 000 feia poro. Auê ïa haamaitairaa rahi ta teie mau taata itoito i vaiiho mai e ua tano maitai te iˈoa tuuhia i nia i teie pahi!