I teie matahiti, hoê o te mau tupuraa ta te mau Ite no Iehova i tiai ru o te matararaa ïa o te Video 1 o te Parau apî oaoa no nia ia Iesu. E mirioni taata tei mataitai i teie video. Teie ïa te video matamua o na 18 video. Eaha te ravehia ra no te taviri i teie mau video, e mea nafea oe i te tururaa i teie mau ohipa?

I te amaa no Auteralia-Asia, i reira te rahiraa o te video Parau apî oaoa i tavirihia ˈi, piri i te 50 tae atu 80 taata to reira ia tavirihia te tuhaa tataitahi o te video. a Te vai ra te mau taeae e tuahine o te faaineine i te maa e te amuamu no te avatea e te ahiahi no te taatoaraa o te feia hauti e pǔpǔ rave ohipa. E faanaho atea ratou eaha te maa no tera e tera mahana. Ua faataa Esther o te ohipa ra i te Tuhaa o te haapao i te maa: “E hoo mai matou i te maa i te mau fare toa e rave rahi ia noaa mai te maa mea maitai e mea mâmâ. E haapao maitai atoa matou eiaha te maa e mâuˈa.” No reira, i te mau mahana atoa, te haamâuˈaraa no te maa no hoê noa taata, e 500 ïa moni farane.

E ere noa te maa ta te mau taata hauti e te pǔpǔ rave ohipa e hinaaro ra, e titau-atoa-hia râ ia paruruhia ratou. Ia paruruhia ratou i te aha? Mea mahana roa i Auteralia-Asia e ia puai roa te mahana mea atâta ïa. No reira, no te paruru i te mau taata atoa i te mahana e ia ore ratou ia rohirohi no te veavea, e tamau te mau taeae e tuahine i te mau fare ie e te mau vahi haumârû. E horoa atoa ratou i te mau monoˈi paruru i te iri, te mau fare amarara e te pape. Ua faataa Kevin o te ohipa ra i te Tuhaa o te haruharuraa e video: “Te rahiraa o te mau taeae e tuahine, e rima tauturu anaˈe ïa o te ohipa i te Betela. E ohipa ratou i roto i teie opuaraa e i te tahi atu mau ohipa ma te haehaa e te oaoa. Eita matou e nehenehe e rave i tera opuaraa aita anaˈe ratou.”

Eita te tahi mau tuhaa video e nehenehe e tavirihia i te amaa, i te mahora faaineinehia no te reira i muri mai i te Betela aore ra i te piha haruharuraa. Ua tavirihia te reira i te hoê vahi atea roa i te amaa. Ua titauhia ïa i te mau taata hauti e te pǔpǔ rave ohipa ia haere i te mau vahi atea e aita e taura uira, e purumu tâhia e aita e fare tahua mai to teie tau. E faanahohia ïa te ahu, te taihaa e te matini o te afaihia e o te vaiiho-maitai-hia i te vahi e tavirihia ˈi taua mau tuhaa video ra. Hou a haamata ˈi te taviriraa hohoˈa, e haapao maitai te mau tiaau tauturu e te vai ra te mau matini ho uira, te pape mâ e te vahi haumitiraa. E faaea te mau taata hauti e te pǔpǔ rave ohipa i te fare o te mau taeae e tuahine, i roto i te mau fare tavere, te mau hotera aore ra te mau piha.

Mea moni roa ia taviri i te hohoˈa i te vahi atea, e titauhia te taime e e mea rohirohi atoa no te taatoaraa. No reira, i 2023, ua farii te Tino aratai ia hoohia mai te hoê tiapai paruai video e 2,5 mirioni moni Marite (fatata ïa 270 000 000 F CFP). Ia patahia mai te hoê hohoˈa i nia i taua paruai ra, mea maramarama roa ïa te hohoˈa, e ia au i te puai o te mau mori e patahia ˈtu i nia i te paruai, mai te huru ra to roto roa i taua hohoˈa ra. No reira, eita matou e haere pinepine i te mau vahi i reira e tavirihia ˈi i te hohoˈa no te mea e mea moni roa. Ua faataa Darren, te hoê mero o te Tomite amaa no Auteralia-Asia: “Ia tavirihia te hohoˈa maoti teie mau paruai rarahi, e iti mai ïa te rohirohi o te mau taata hauti e e nehenehe te pǔpǔ rave ohipa e na nia iho noa i te pata i te tahi mau tuhaa video. Ei hiˈoraa, mai te peu e taviri matou i rapaeau, maa minuti noa ta matou no te pata i te hoê toparaa mahana. Maoti râ te mau paruai rarahi, e nehenehe matou e hamani faahou i te hoê toparaa mahana e rave rahi taime a noaa mai ai te hohoˈa tano maitai.”

Ua titauhia e rave rahi taata hauti e pǔpǔ rave ohipa no te taviri i te mau video o te Parau apî oaoa. Eaha to ratou manaˈo no nia i ta te mau taeae e tuahine e rave ra no ratou?

Ua tere Amber hau atu 700 kilometera mai to ˈna fare i Melbourne no te apiti i teie opuaraa. Ua papai oia: “I to ˈu taeraa ˈtu i te tauraa manureva, ua aupuru maitai te mau taeae o te Betela ia ˈu. E rave rahi mero o te Betela tei titau manihini ia ˈu no te tamaa aore ra no te inu i te ti. I te vahi taviriraa hohoˈa, ua haapao maitai te taatoaraa ia ˈu e ua faaite mai ratou i te here. I te roaraa o to ˈu tere, ua fanaˈo vau e rave rahi haamaitairaa. E au ra e aita vau i rave i te haapaeraa!”

Te ohipa ra Derek e te pǔpǔ o te haapao ra i te tuhaa video. Ua parau o ˈna: “E rave rahi tuhaa ohipa a te amaa tei turu ia matou mai te haamataraa mai â. Te haamauruuru nei au i te mau taeae e tuahine tei horoa i to ratou taime, ta ratou mau faufaa e to ratou puai no teie opuaraa. Ua turu noa mai ratou, e feruriraa haapae to ratou e te maitai. Mea papu, ua haamaitai Iehova ia ratou e ia matou atoa. Ua papu ia ˈu eita oia e haapao noa ia oti ta matou ohipa, oia atoa râ e nafea matou e rave ai i taua ohipa ra.”

Mauruuru ia outou tei turu i teie mau video maoti ta outou mau ô, oia atoa te mau ô ta outou i horoa i nia i te donate.jw.org.