Te hinaaro ra te Atua ra o Iehova ia haapii te mau taata atoa no nia ia ˈna e ta ˈna Faatereraa arii i te raˈi, noa ˈtu eaha to ratou tupuraa. (Timoteo 1, 2:3, 4) No taua tumu ra, te nenei nei te mau Ite no Iehova i te mau Bibilia e te mau papai o te tauturu i e rave rahi taata ia haapii i te Bibilia, oia atoa te feia tariˈa turi. Te faaineine ra ta matou faanahonahoraa i e rave rahi roa video na roto hau atu i te 100 reo apǎraa rima! a Mea nafea te reira i te faaineineraahia e i te opereraahia? E eaha te mau haamaitairaa e ravehia a mairi ai te tau?

 E faaineinehia te mau video e te mau pǔpǔ huri ati aˈe te ao nei. E hiˈopoa maite te mero tataitahi o te pǔpǔ i te papai ta ratou e huri. I muri iho, e faaoti ratou e nafea ia huri maitai i te reira na roto i te reo apǎraa rima. Ia oti, e haruharu ratou i te reira. I teie taime, e 60 pǔpǔ e huri tamau nei i te mau papai haapiiraa Bibilia na roto i te reo apǎraa rima e e 40 pǔpǔ faataahia no te huri i te mau papai i te tahi noa mau taime.

 Na mua aˈe, e moni rahi tei titauhia no te faaineine i te mau video na roto i te reo apǎraa rima. Mea moni roa te mau mauhaa no te haruharu e no te hamani i te mau video ia faaauhia i teie mahana. Ua haruharu-atoa-hia te mau video i roto i te hoê piha haruharuraa ta matou i patu aore ra i faaapî. Ua titauhia ïa hau atu toru mirioni farane no te aufau i te mau mauhaa atoa no te hoê pǔpǔ huri reo apǎraa rima.

 No te faaohipa maitai i te mau ô, ua imi ta matou faanahonahoraa i te mau ravea no te haamaitai e no te faaohie i te ohipa huriraa reo apǎraa rima. Ua faaohipa matou i te mau ravea apî e ua iti mai te mau haamâuˈaraa. Aita e faufaa faahou ia haere i te hoê piha haruharuraa. E faaohipa râ te pǔpǔ huriraa i te hoê paruai matie e e taviri ratou i te hohoˈa i roto i ta ratou piha ohipa. Mai te peu e hinaarohia e rave rahi taeae e tuahine no te huri na roto i te reo apǎraa rima, e haruharu ïa ratou i ta ratou tuhaa i ta ratou piha ohiparaa aore ra i to ratou fare. Aita e titau-faahou-hia ia haere i roto i te hoê piha haruharuraa.

 Ua hamani atoa matou i te hoê porotarama roro uira no te tauturu i te feia huri na roto i taua reo ra. Maoti teie ravea apî, ua iti roa mai ïa te taime e titauhia no te faaineine i te mau video hinaarohia no te feia tariˈa turi. Mea au roa na to tatou mau taeae i te reira no te mea ua maitai mai te ohipa huriraa. Te parau ra te hoê taeae o Alexander te iˈoa: “Mea rahi aˈe te video na roto i te reo apǎraa rima i te piaraahia ia faaauhia i na mua ˈˈe. Oaoa roa vau. Te mataitai nei au i te mau video i te mau mahana atoa.”

 I teie mahana, e titauhia 560 000 farane tiahapa no te hoo mai i te mau mauhaa haruharuraa no te hoê pǔpǔ huriraa reo apǎraa rima. E nehenehe ïa matou e pia i te mau video no te feia tariˈa turi na roto e rave rau aˈe reo.

 Ia oti te hoê video, e mea tia ia pia i te reira. I na mua ˈtu, ua haruharuhia te video i nia i te mau ripene video e DVD, tera râ mea moni roa te reira, e pau rahi te taime e e ohipa rahi te titauhia. E afaihia tera video i te hoê taiete ê no te pia e rave rahi atu â ripene e DVD. I muri iho, e haponohia te reira i te mau amuiraa. I 2013 noa, ua titauhia hau atu i te 224 mirioni farane no te pia i te mau DVD reo apǎraa rima.

 Ua mauruuru roa te feia tariˈa turi i teie maa pae varua. Tera râ, e ere roa ˈtu i te mea ohie ia faaohipa i te reira no te rahi o te mau ripene aore ra DVD tei piahia. I te tahi taime, e titauhia e rave rau DVD no te haruharu i te hoê noa buka Bibilia. Te na ô ra te taeae Gilnei no Beresilia: “I te mau taime atoa e hinaaro ai matou e taio i te hoê irava, e titauhia ia imi i te ripene video tano. E ere i te mea ohie.” Te parau ra te tahi tuahine o Rafayane te iˈoa, tei faaohipa i te mau DVD reo apǎraa rima: “Mea rohirohi roa ia rave i ta ˈu iho haapiiraa Bibilia. Ua titauhia e rave rahi taime no te imi noa i te mau irava aore ra te mau faahororaa.” E ia haere to tatou mau taeae e tuahine i roto i te pororaa, ua titauhia ia rave ratou i te mau DVD aore ra ripene video a nehenehe atu ai e pata i te reira i nia i te afata teata a te taata tei anaanatae mai. Ua rave atoa te tahi mau taeae i ta ratou iho matini DVD. I muri aˈe i matara mai ai te mau matini afaifai e paruai to nia no te mataitai i te hoê video. E rave rahi taeae tei faaohipa i te reira. Ua parau Bobby no Marite: “Mai te peu e hinaaro oe e faaite hoê irava Bibilia e te tahi atu, e titauhia ia taui i te DVD. E pau ïa te taime e e mea fifi roa ia faaohipa i te Bibilia i roto i te mau aparauraa.”

 I 2013, ua haamau te faanahonahoraa a Iehova i te porotarama roro uira JW Library Sign Language. Maoti te reira, ua nehenehe te mau taeae e tuahine e rave mai e e mataitai i te mau video reo apǎraa rima i nia i ta ratou mau matini afaifai. Na mua roa, ua matara mai tera porotarama na roto noa i te reo apǎraa rima Marite. I 2017 râ, ua tuuhia te taatoaraa o te mau reo apǎraa rima i roto i tera porotarama. Ua oaoa roa te mau taeae e tuahine na te ao nei. Ua parau Juscelino, hoê taeae no Beresilia: “Ua faahiahia roa vau. Ua feruri maite au i te here o te Tino aratai no matou, te feia tariˈa turi. Te hinaaro mau nei ratou ia haere matou i mua i te pae varua, mai te feia e ere i te tariˈa turi. Ua oaoa roa vau e ua turai tera porotarama roro uira ia ˈu ia haapii atu â i te Bibilia.”

 I teie mahana, te pia nei matou i te mau video reo apǎraa rima atoa i nia i ta matou reni natirara e te porotarama roro uira JW Library Sign Language. Ei faahopearaa, e titauhia tau mahana noa no te huri, haruharu e opere i te mau video reo apǎraa rima, eiaha faahou râ tau avaˈe aore ra matahiti mai i na mua ˈtu. I teie nei, e matara mai te mau video na roto e rave rahi reo apǎraa rima i te hoê â taime e te mau papai no te feia e ere i te tariˈa turi.

 A hiˈopoa na i ta vetahi mau taeae e tuahine tariˈa turi i parau. Te na ô ra te tuahine Klízia: “Teihea faanahonahoraa e aupuru nei i te feia tariˈa turi e e horoa nei ia ratou i te maa pae varua na roto i te hoê ravea ohie roa ia faaohipa? O te faanahonahoraa anaˈe a Iehova te na reira ra.” Te na ô ra Vladimir: “Te faaite nei te mau video e te aupuru nei Iehova i te mau taata atoa, te feia tariˈa turi e te feia e ere i te tariˈa turi.”

 I nia i ta matou mau video reo apǎraa rima, e ite-pinepine-hia te parau e e ere teie mau video i te mea hoo. E tuhaa atoa te reira no te hoê ohipa haapiiraa Bibilia na te ao atoa nei e turuhia ra e te mau ô horoa noa. Mauruuru roa no ta outou mau ô. E rave rahi ô horoahia maoti te reni natirara donate.jw.org. Maoti te reira, e nehenehe matou e pia i te mau Bibilia e i te mau papai o te tauturu i te mau taata atoa ia haapii i te Bibilia, oia atoa te feia e faaohipa nei i te reo apǎraa rima.