I te 4 no Eperera 2023, e mirioni Ite no Iehova e feia tei titau-manihini-hia tei faatupu i te Amuraa maa a te Fatu. E rave rahi tei haere mai i teie Oroa noa ˈtu te mau fifi.

Ei hiˈoraa, i Ukraine, tau tausani taata tei haere i te Oroa haamanaˈoraa noa ˈtu te huru o te reva e te tamaˈi i te tahi mau vahi. I te hoê oire atâta roa i te pae hitia o te râ o Ukraine, ua horoa te mau matahiapo i te feia o te amuiraa i te hoê haruharuraa o te oreroraa parau no te Oroa haamanaˈoraa hoê hebedoma na mua aˈe. Tau mahana muri iho, ua tupu te hoê vero rahi e aita faahou ta ratou e natirara e e uira. Noa ˈtu râ, ua fanaˈo te taatoaraa i roto i te amuiraa i te haruharuraa o te oreroraa parau o te Oroa haamanaˈoraa.

I Kazakhstan, ua faaruru Violetta ahuru ma pae matahiti to ˈna, i te patoiraa a to ˈna utuafare. Te ora ra o ˈna e to ˈna papa ruau tei patoi noa na i te parau mau e 20 matahiti. Pinepine oia i te opani i te mau mero utuafare ia haere i te mau putuputuraa e ua tuino roa atoa i ta ratou mau papai. Tera râ, no to ˈna here i ta ˈna mootua, ua haamata raua i te tauaparau no nia i te Bibilia. I teie matahiti, ua maere roa Violetta, no te mea ua farii to ˈna papa ruau i te hoê haapiiraa Bibilia e ua haere i te Oroa haamanaˈoraa!

No vetahi, ua riro te atearaa ei fifi no te haere mai i te Oroa haamanaˈoraa. I Timor hitia o te râ, te faaterehia nei e 55 haapiiraa Bibilia na roto i te niuniu paraparau i te feia no te mau oire no Same e Suai. E titauhia i te amuiraa a te mau Ite no Iehova tei piri aˈe i tera na oire e rave rahi hora na nia iho i te pereoo e piti huira. Ua ravehia râ te tahi faanahoraa i tera na oire no te faatupu i te Oroa haamanaˈoraa i roto i te mau fare. Ua tere atu te hoê matahiapo e maha hora no te tapae i Same no te horoa i te oreroraa parau o te Oroa haamanaˈoraa e e 56 taata tei tae mai. Te tahi atu matahiapo, ua tere ïa e hitu aˈe hora i Suai e ua hau atu i te 50 taata tei tae mai.

I Hualpén, i Tireni, mea fifi no te mau taeae ia ite mai i te hoê vahi no te Oroa haamanaˈoraa. Ua ani ratou i te tauturu a te hoê tia no tera oire. Tau hora na mua aˈe te Oroa haamanaˈoraa, ua oaoa roa te mau matahiapo a faaite ai te tia e e nehenehe ratou e faaohipa i te fare tamaaraa o te fare haapiiraa. Ua haavitiviti te mau taeae i te faariro tera vahi ei vahi putuputuraa nehenehe mau. Ua farii te tia e te tavana oire i te titau-manihini-raa a te mau taeae no te haere mai i teie oroa. Ua parau te tavana: “Te haapopou nei au i te feia o tei apiti mai no to ratou naho maitai e tura, e te mau tamarii no to ratou haerea maitai. Ia papu ia outou i ta matou turu i mua nei.”

Ua oaoa atoa matou i te faaroo e ua haamanahia te haamoriraa a to tatou mau taeae i Monaco i Novema 2022. I muri mai i te Oroa haamanaˈoraa, i roto i te hoê vahi tarahuhia nehenehe mau, ua parau te hoê manihini: “Mea nehenehe roa teie piha, tera râ, te mea nehenehe roa ˈtu â, o te mau taata i tae mai.”

Mea faaitoito mau ia ite noa ˈtu te mau fifi, e rave rahi tei faaroo i te faaueraa a te Mesia ia putuputu “ei manaˈoraa” i to ˈna pohe!—Luka 22:19.