Ua tupu te Heiva tuaro nui taurea i te tau toˈetoˈe 2024 i roto e maha oire i Korea apatoa i te 19 no Tenuare tae atu i te 1 no Fepuare 2024. E tausani maona, taata papai e feia mataitai no e 70 fenua tei tae mai i tera tuaro. Ua hau atu 2 600 Ite no Iehova tei apiti i te pororaa taa ê i te roaraa o te tuaro. I roto e 34 vahi, ua tuuhia te mau vairaa papai afaifai e te vai atoa ra te mau haamaramaramaraa niuhia i nia i te Bibilia na roto e maha reo.

Ua tapiri atu te hoê taurearea e paraparau ra i te reo Mandarin i na taeae e piti e ua parau atu e ua ite o ˈna i te mau vairaa papai afaifai e rave rahi vahi o te oire. I to ˈna râ iteraa i te parau pia no nia i te utuafare oaoa, tapea mai nei o ˈna e ua hinaaro e ite hau atu â. Ua faataa ˈtu ïa te mau taeae ia ˈna e nafea ia rave mai i te buka rairai E nehenehe to utuafare e oaoa na roto i te reo Mandarin i nia i te jw.org. O ta teie ïa taurearea i rave oioi i nia i ta ˈna niuniu afaifai e ua haamauruuru i te mau taeae no ta raua tauturu.

Ua haamata te hoê hoa faaipoipo i te paraparau i te hoê taata no Ukraine. I te mea aita raua i taa i to ˈna reo, ua paraparau ïa raua ia ˈna maoti te ravea huriraa i nia i ta raua niuniu afaifai. I te roaraa o te aparauraa, ua faaite teie taata i te hoê hohoˈa o to ˈna iho oire tei tupitahia. Ua faaite atu ïa na hoa faaipoipo i te aumihi no to ˈna tupuraa e ua faaite atu ia ˈna i te hoê irava Bibilia e e fatata te mau tamaˈi i te faaorehia. Ua putapû roa teie taata i te parau fafau ta ˈna i taio mai na roto i to ˈna reo. Ua rave ïa na hoa faaipoipo i te mau faanahoraa no te farerei faahou ia ˈna.

Ua haamata te hoê tuahine o In-Sook te iˈoa, i te hoê aparauraa na roto i te reo Beretane i te hoê tamahine maona e to ˈna mama no Europa mai. I roto i ta ratou aparauraa, ua faaite to tatou tuahine e rave rahi tumu parau i roto i te tuhaa “Te metua e ta ˈna tamarii taurearea” i nia i te jw.org. Ua oaoa te mama i te iteraa i teie mau tumu parau e ua parau atu o ˈna, e haere faahou o ˈna i nia i ta tatou reni natirara.

Te oaoa nei tatou i te mea ua nehenehe to tatou mau taeae e tuahine no Korea apatoa e poro e rave rahi taata i teie tuaro e no te ‘arue i te iˈoa o Iehova.’—Salamo 148:13.