I te avaˈe no Atete e Tetepa 2024, ua apiti te mau Ite no Iehova i te mau pororaa taa ê i faatupuhia i roto e rave rahi tuhaa fenua no Kanada. Mea rahi te mau faatiaraa faahiahia ta to tatou mau taeae e tuahine i fanaˈo.

Ua hau atu e 800 Ite no Iehova tei apiti atu i te hoê pororaa taa ê i Kanada i te pae apatoerau. Ua tere te mau taeae e tuahine i Iqaluit i Nunavut, i Yellowknife i te mau tuhaa fenua no te pae apatoerau tooa o te râ e i Whitehorse i Yukon. I to ratou tapearaa ˈtu i reira, ua faanahohia ratou ei pǔpǔ e ua rave ratou i te manureva no te tere atu i na 39 oire e oire iti e mea atea e aita e purumu. Ua pûpû te mau pairati Ite no Iehova no Kanada e Marite i to ratou manureva no te faahoro atu ia ratou. I roto i teie pororaa taa ê, e 275 taata tei faaite i to ratou hinaaro e haapii i te Bibilia. Ua faanaho te mau taeae e tuahine i te mau ravea ia nehenehe teie mau taata ia tamau i te haapii i te Bibilia maoti te niuniu paraparau aore ra te natirara.

I Yellowknife, ua haamata te hoê tuahine i te aparau i te hoê vahine rave ohipa i te hotera i reira te mau taeae e tuahine e noho ai. Ua faaite teie vahine i to ˈna peapea no te mau tupuraa ino mau na te ao. Ua faaohipa ïa to tatou tuahine i te buka rairai Ia ora oe e a muri noa ˈtu! e ua faataa o ˈna i te tiaturiraa o te Bibilia oia hoi te hoê a muri aˈe maitai aˈe. Ua hinaaro teie vahine apî e ite hau atu â no nia i teie mau parau fafau, no reira ua faanaho te tuahine ia tamau te mau aparauraa na roto i te natirara.

I roto i na toru oire no Kanada, fatata e 600 taeae e tuahine tei apiti atu i na pororaa taa ê e maha: Arabia i Montréal, Tinito mandarin e Peresia i Vancouver e Punjabi i Brampton pihai iho ia Toronto. Ua hau atu 100 taata tei farii i te hoê haapiiraa Bibilia.

A poro ai i tera e tera fare i Montréal, ua patoto e piti tuahine i te fare o te hoê vahine apî Arabia o tei pure noa ˈtura i te Atua ia tauturu ia ˈna ia taa no te aha mea fifi roa te oraraa. I muri iho i te taioraa ˈtu i te Apokalupo 21:4 e te faataaraa ˈtu i te parau fafau a te Atua oia hoi e faaore o ˈna i te mauiui, haamata ˈtura teie vahine apî i te taˈi. Ua oaoa oia i te farii i te buka rairai Ia ora oe e a muri noa ˈtu! e i te haamata i te hoê haapiiraa.

A tere ai na nia i te hoê pereoo utaraa taata, ua farerei e piti tuahine i te hoê vahine no Irania mai. Ua oaoa roa o ˈna i te aroharaa ˈtu na tuahine ia ˈna na roto i te reo Peresia. Ua faaite teie vahine e ua taio o ˈna i te Bibilia a 15 matahiti aˈenei e mea fifi râ no ˈna ia taa i te reira. Ua faataa na tuahine nafea te haapiiraa Bibilia e tauturu ai ia ˈna ia ite atu â no nia i te Parau a te Atua. Ua farii teie vahine ma te oaoa ia farerei ia raua i te mahana i muri iho e ua haamata o ˈna i te haapii.

Ua oaoa roa matou i te faaroo mea rahi te haapiiraa tei haamatahia. E mea papu te haafaufaa ra Iehova i te mau tutavaraa ta to tatou taeae e tuahine i rave no te apiti atu i teie mau pororaa taa ê.—Salamo 110:3.