E vai amui ore te mau Ite no Iehova i roto i te mau ohipa poritita no to ratou iteraa i ta te Bibilia e haapii ra. Aita matou e faaô atu i roto i te mau aroraa poritita e e maiti no te tahi noa ˈˈe pǔpǔ aore ra taata e horo ra no te hoê tiaraa poritita. Aita atoa matou e hinaaro i te tahi tiaraa poritita e e haa no te taui i te mau tia faatere. E tumu papu ta te Bibilia e horoa ra ia na reira matou.

•   E pee matou i te hiˈoraa o Iesu, tei ore i farii i te hoê tiaraa poritita. (Ioane 6:15) Ua haapii oia i ta ˈna mau pǐpǐ ia ore e riro “i to teie nei ao” e ia ore e turu i te tahi noa ˈˈe aroraa poritita.—Ioane 17:14, 16; 18:36; Mareko 12:13-17.

•   E vai taiva ore matou i te Basileia o te Atua, ia au i ta Iesu i parau: “E parau-haere-hia te evanelia o te basileia nei e ati noa ˈˈe teie nei ao.” (Mataio 24:14) Ei tia o te Basileia o te Atua, ua faauehia matou ia poro i to ˈna taeraa mai. E vai amui ore ïa matou i roto i te mau ohipa poritita i te mau fenua atoa, oia atoa i te vahi i reira matou e ora ai.—Korinetia 2, 5:20; Ephesia 6:20.

•   No to matou vai-amui-ore-raa, e nehenehe matou e poro i te parau apî oaoa o te Basileia i te mau taata atoa, noa ˈtu ta ratou pǔpǔ poritita. Te hinaaro nei matou e faaite ma te huru paraparau e haerea e na te Basileia o te Atua e faatitiaifaro i te mau fifi o teie nei ao.—Salamo 56:11.

•   I te mea ra e aita matou e turu ra i te mau aroraa poritita, e vai amui noa matou mai te hoê fetii taeae nunaa rau. (Kolosa 3:14; Petero 1, 2:17) I te tahi aˈe râ pae, te vai ra te amahamaharaa i rotopu i te mau haapaoraa o te faaô atu i roto i te mau ohipa poritita.—Korinetia 1, 1:10.

 Faatura i te mau faatereraa taata. Noa ˈtu e aita matou e faaô atu i roto i te mau ohipa poritita, te ora nei matou i raro aˈe i te mau faatereraa taata e e faatura matou ia ratou. Teie ta te Bibilia e faaue ra: “Ia auraro maite te taata atoa i te feia mana toroa.” (Roma 13:1) E auraro matou i te ture, e aufau i te mau tute e e haa amui e te mau faatereraa taata no te maitai o te huiraatira. Aita matou e apiti atu i roto i te mau ohipa no te faatahuri i te hoê faatereraa. Te pee nei râ matou i te aˈoraa Bibilia ia pure no “te hui arii, e te feia mana atoa,” i te taime iho â râ e rave ai ratou i te mau faaotiraa taaihia i ta matou haamoriraa.—Timoteo 1, 2:1, 2, nota i raro i te api.

 E faatura atoa matou i te mau faaotiraa poritita a vetahi ê. Ei hiˈoraa, eita matou e haafifi i te mau maitiraa aore ra te taata o te faaoti e maiti.

 No teie nei noa anei ta matou vai-amui-ore-raa? Aita. Tera atoa ta te mau aposetolo e te tahi atu mau Kerisetiano matamua i rave. Te na ô ra te buka Beyond Good Intentions: “No te mau Kerisetiano matamua, e mea tia ia faatura i te feia mana, eiaha râ ia faaô atu i roto i te mau ohipa poritita.” Hoê â huru i roto i te buka On the Road to Civilization o te parau e aita te mau Kerisetiano matamua “i rave i te tiaraa poritita.”

 Mea atâta anei ta matou vai-amui-ore-raa no te hau o te fenua? Aita. Mea hau matou, no reira eita matou e haafifi noa ˈˈe i te mau faatereraa taata. A hiˈo na i ta te parau faataa a te fare vanaa no te ihi i Ukraine i faaite i 2001 no nia i ta matou vai-amui-ore-raa: “I teie mahana, mea au ore no vetahi teie faaotiraa a te mau Ite no Iehova; no reira te mau faatereraa matamua a te mau Nazi e Communiste i faahapa ai ia ratou.” Tera râ, noa ˈtu te haavîraa i Rusia, “ua auraro noa [te mau Ite no Iehova] i te ture. Ua ohipa ratou ma te haerea tia e te itoito i te mau fare faaamuraa animara e te mau taiete. Aita ratou i haafifi aˈe i te faatereraa Communiste.” Te faahope ra teie parau faataa e hoê â huru i teie mahana, e ere te mau tiaturiraa e raveraa a te mau Ite no Iehova “i te mea atâta no te hau e te hapa ore o te tahi noa ˈˈe fenua.”