E pǔpǔ iti Kerisetiano paari te Tino aratai o te horoa ra i te aratairaa na te mau Ite no Iehova na te ao nei. E piti tuhaa ohipa ta ratou e haapao:

•   E tiaau ratou i te faaineineraa o te mau haapiiraa niuhia i nia i te Bibilia e horoahia na roto i te mau mea e piahia, i te mau putuputuraa e i te mau haapiiraa a te mau Ite no Iehova.—Luka 12:42.

•   E tiaau ratou i te ohipa a te mau Ite no Iehova na te ao nei ma te horoa i te aratairaa no te pororaa i te taata atoa, e ma te tiaau i te faaohiparaa o te mau faufaa horoahia ei ô.

 Te pee nei te Tino aratai i te hiˈoraa o te mau aposetolo e te mau matahiapo i Ierusalema o te senekele matamua, o tei rave i te tahi mau faaotiraa faufaa roa no te amuiraa Kerisetiano taatoa. (Ohipa 15:2) Mai tera mau tane haapao maitai, e ere na te mau mero o te Tino aratai e faatere ra i ta matou faanahonahoraa. E imi râ ratou i te aratairaa i roto i te Bibilia, ua ite hoi ratou e ua faatoroa te Atua ra o Iehova ia Iesu Mesia ei Upoo no te amuiraa.—Korinetia 1, 11:3; Ephesia 5:23.

 Te mau mero o te Tino aratai o Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane e o Jeffrey Winder. E ohipa ratou i ta matou pu rahi i Warwick, New York, Marite.

 Ua haamau te Tino aratai e ono tomite no te tiaau e rave rahi tuhaa o ta matou ohipa. E ohipa te mero taitahi i roto hoê aore ra hau atu o teie mau tomite.

•   Tomite tiaau: Haapao i te mau ohipa i te pae o te ture e faanaho i te mau ravea ia tupu te tahi mau ati, ia hamani-ino-hia to matou mau taeae e tuahine no ta ratou mau tiaturiraa faaroo, e ia farerei te mau Ite no Iehova i te tahi mau fifi tupu taue.

•   Tomite rave ohipa: Tiaau i te mau faanahoraa no te mau mero o te Betela.

•   Tomite piaraa: Haapao i te piaraa e te haponoraa o te mau papai Bibilia e te paturaa o te mau piha putuputuraa, piha ohipa no te huriraa e te mau Betela.

•   Tomite taviniraa: Tiaau i te ohipa pororaa i te parau apî oaoa o te Faatereraa arii.—Mataio 24:14.

•   Tomite haapiiraa: Aratai i te faaineineraa o te haapiiraa pae varua e horoahia i te mau putuputuraa, i te mau haapiiraa e na roto i te mau papai tei haruharuhia e te mau video.

•   Tomite papairaa: Aratai i te faaineineraa o te haapiiraa pae varua e horoahia na roto i te mau papai neneihia e i nia i ta matou reni natirara. E tiaau atoa ratou i te ohipa huriraa.

 Hau atu i ta ratou ohipa na roto i teie mau tomite, e putuputu te Tino aratai i te mau hebedoma atoa no te tauaparau no nia i te mau mea e hinaaro-mau-hia e te faanahonahoraa. E aparau te mau mero no nia i te mau Papai, e ani atoa ratou i te aratairaa a te varua moˈa o te Atua, ia rave ratou pauroa i te hoê â faaotiraa.—Ohipa 15:25.

 E Kerisetiano e nehenehe e tiaturihia te tauturu ra i te mau tomite a te Tino aratai. (Korinetia 1, 4:2) Mea aravihi ratou e ua matau maitai i te ohipa tiaauhia e te tomite ta ratou e tauturu ra. E putuputu atoa ratou e te Tino aratai i te mau hebedoma atoa. Eita ratou e rave i te mau faaotiraa, e horoa râ i te tahi mau aˈoraa faufaa e te tahi mau haamaramaramaraa. E rave ratou mai tei faaotihia e te tomite e e hiˈopoa ratou i te mau faahopearaa o tera mau faaotiraa. Hau atu â, e nehenehe ratou e tonohia e te Tino aratai no te haere e farerei i to matou mau taeae e tuahine i te tahi mau fenua ê, aore ra e horoa i te tahi mau oreroraa parau i te mau rururaa matahiti anei aore ra i te horoaraa i te mau parau tuite Gileada.