Eita te mau Ite no Iehova e patoi i te patia arai. Na te mau Kerisetiano tataitahi e faaoti no ˈna iho. E rave rahi Ite no Iehova o te farii ra i te patia arai.

 Te imi nei matou i te mau ravea rapaauraa maitai roa ˈˈe e te haafaufaa atoa nei matou i te mau ravea apî ta te ihi rapaauraa e faaohipa no te faaiti i te mau maˈi rahi. Te haamauruuru nei matou i te mau taata aravihi i te pae o te ea no te mau ohipa atoa tei ravehia, i te mau tau fifi iho â râ.

 Te faatura nei te mau Ite no Iehova i te mau faaotiraa ta te feia toroa i te pae o te ea e rave ra. Mai te parareraa o te maˈi pee Covid ahuru ma iva tae roa ˈtu i teie mahana, te tamau nei te mau Ite no Iehova i te pia i te mau faaararaa na roto tau hanere reo i nia i teie reni natirara. Ua faaitoito atu ratou ia pee i te mau faatureraa a te Hau no te paruru i to tatou ea. Ei hiˈoraa, te vai ra te faatureraa no nia i te faaatearaa te tahi i te tahi, te faufaaraa ia faatura i te mau faatureraa i te vahi taata, te titauraa ia vai noa i te fare aore ra i te tahi atu vahi no te hoê maororaa faataahia, te faufaaraa ia horoi i te rima, ia oomo i te mau paruru vaha e te ihu e te tahi atu mau faatureraa a te faatereraa.—Roma 13:1, 2.

 E rave rahi matahiti i te maoro, ua haafaufaa te mau papai a te mau Ite no Iehova i to muri nei mau aratairaa:

•   Na te taata tataitahi e rave i ta ˈna iho faaotiraa i te pae o te ea.—Galatia 6:5.

   “Eita [teie vea] e faaitoito nei i te rave i tera raau aore ra i tera huru rapaauraa i te tahi atu, e eita oia e horoa ra i te mau aˈoraa i te pae rapaauraa. Te faaite noa nei oia i te mau ohipa e tupu ra e a vaiiho atu ai i te taata taio ia haamau i to ˈna manaˈo e ia rave i ta ˈna mau opuaraa.”—A ara mai na!, 8 no Fepuare 1987.

   Ia au i te A ara mai na!, 22 no Atete 1965 (Marite), na te taata tataitahi e faaoti e patiahia anei ratou e ta ratou mau tamarii.

•   Te farii nei matou i te mau ravea rapaauraa no te mea te haafaufaa nei matou i te ora.—Ohipa 17:28.

   Ia au i Te Pare Tiairaa no te 1 no Atopa 1975 (Farani), ia fifihia ratou i te pae o te ea, te imi nei te mau Ite no Iehova i te tauturu a te mau taote. Te haafaufaa nei ratou i te ora e te hinaaro atoa nei ratou e faaohipa i te mau ravea atoa o te tano e o te tuati i ta te Bibilia e parau, no te faaroa i to ratou ora.

   Ia au i Te Pare Tiairaa, 1 no Fepuare 2011 (Farani), te farii iho â nei te mau Ite no Iehova i te mau ravea rapaauraa. Te hinaaro nei ratou e fanaˈo i te hoê ea maitai e e faaroa atoa i to ratou ora. Mai te Kerisetiano Luka o te senekele matamua, te haa nei te tahi mau Ite no Iehova ei taote. Papu maitai, te haamauruuru nei te mau Ite no Iehova i te mau rave ohipa i te pae o te ea no ta ratou ohipa faufaa e no to ratou hinaaro rahi e tauturu atu. Te faaite atoa nei te mau Ite no Iehova i to ratou mauruuru rahi i teie mau rave ohipa no to ratou tautururaa ia vetahi ê ia maitai mai.