Te tiaturi nei te mau Ite no Iehova e e tauturu te mau aratairaa e aˈoraa Bibilia ia tatou ia rave i te mau faaotiraa ta te Atua e au ra e ia maitai mai tatou. (Isaia 48:17, 18) Aita matou i haamau i taua mau aratairaa ra e aˈoraa, e ora râ matou ia au i te reira. Teie te tahi mau aratairaa no nia i te haamatauraa. a

•   E faanahoraa tamau te faaipoiporaa. (Mataio 19:6) No te mau Ite no Iehova, e ere te haamatauraa i te ohipa hauti no te mea e aratai te reira i te faaipoiporaa.

•   O te feia anaˈe o tei ineine no te faaipoiporaa te nehenehe e haamatau i te tahi taata. Te taime ïa ia “mairi te uaaraa o te apîraa” aore ra ia mairi te taime e mea puai roa te hinaaro e taoto i te hoê apiti.—Korinetia 1, 7:36.

•   O te feia anaˈe aita roa ˈtu e opaniraa ia faaipoipo te nehenehe e haamatau. Ua faataa ê paha vetahi i mua i te ture a te taata. Ia au râ i te ture a te Atua, aita ratou e nehenehe e faaipoipo faahou no te mea te tumu hoê o te faataaraa, o te peu taotoraa tia ore ïa.—Mataio 19:9.

•   Ua aˈohia te mau Kerisetiano o te hinaaro ra e faaipoipo ia maiti i te hoê taeae aore ra tuahine Ite no Iehova ei apiti. (Korinetia 1, 7:39) Ia au i teie aratairaa, e faaipoipo ïa te hoê Ite no Iehova i te hoê taata o te faaite ra e o te faaohipa ra hoê â tiaturiraa ei Ite no Iehova bapetizohia, eiaha râ i te tahi taata o te farii noa ra i taua mau tiaturiraa ra. (Korinetia 2, 6:14) Ua tamau te Atua i te faaue i ta ˈna mau tavini ia maiti i te hoê hoa faaipoipo hoê â faaroo e to ˈna. (Genese 24:3; Malaki 2:11) Mea au ia faaohipa i teie faaueraa i teie mahana, ia au i te mau aivanaa o to tatou tau. b

•   E mea titauhia i te tamarii ia faaroo i to ratou na metua. (Maseli 1:8; Kolosa 3:20) Ia ora te mau tamarii i to te metua fare, mea tano ia pee ratou i te mau faaotiraa a te metua no nia i te haamatauraa. Ei hiˈoraa, na te mau metua e faaoti mea paari anei ta ratou mau tamarii no te haamatau i te tahi atu taata aore ra eaha te mau ohipa ta ratou e nehenehe e rave.

•   Ia au i te mau faaueraa Bibilia, na te Ite no Iehova taitahi e maiti e haamatau anei o ˈna aore ra eita. Oia atoa o vai ta ˈna e haamatau atu. E tu te reira i teie faaueraa: “E riro hoi ta te taata nei hopoia ei nia ïa ia ˈna iho e ati noa ˈˈe.” (Galatia 6:5) Te vai ra râ o te ani i te manaˈo o te tahi atu Ite no Iehova î i te paari o te hinaaro iho â ra i to ratou maitai.—Maseli 1:5.

•   E rave rahi mau peu ite-pinepine-hia i te taime haamatauraa, e mau hara ino mau râ. Ei hiˈoraa, te faaue nei te Bibilia ia tatou ia haapae i te peu taotoraa tia ore. E ere noa râ i te taotoraa e te hoê taata e ere ta oe hoa faaipoipo. O te mau peu tia ore atoa ta te taata e rave e te tahi apiti mai te mirimiriraa i te mero atiraa aore ra te ai mero atiraa e te peu taotoraa na te tiho. (Korinetia 1, 6:9-11) No te Atua, e “peu faufau” ia faaara i te hinaaro o te tahi atu hou te faaipoiporaa, noa ˈtu aita raua e taoto roa ˈtu. (Galatia 5:19-21) Aita ˈtoa te Bibilia e farii i te mau “parau tiaâ,” mai te mau aparauraa no nia i te mau peu taotoraa tia ore.—Kolosa 3:8.

•   E haavare rahi to to tatou aau, oia hoi to tatou huru mau. (Ieremia 17:9) E nehenehe te aau e turai i te hoê taata ia rave i te tahi ohipa noa ˈtu e ua ite oia e mea ino te reira. E mea maitai ïa ia ape te feia e haamatau nei ia ratou i te mau tupuraa atâta mai te haereraa o ratou anaˈe i te hoê vahi. E mea maitai aˈe ia haere ratou e te tahi pǔpǔ taata aore ra ia maiti maitai i te hoê taata apee. (Maseli 28:26) Ua ite te mau Kerisetiano taa noa o te hinaaro ra e faaipoipo e mea atâta ia haere i nia i te mau reni natirara no te haamatau i te tahi atu. E nehenehe hoi ratou e faatupu i te auhoaraa e te hoê taata ta ratou e ore roa ˈtu e matau.—Salamo 26:4.