E Ite no Iehova Virginia, e maˈi to ˈna o te haafifi i te faanahoraa uaua uira o te tino parauhia locked-in syndrome. Aita to ˈna tino e hautiuti faahou. E nehenehe o ˈna e ite e e faaroo, e faaaraara e e tapiri i to ˈna mata, e e hautiuti rii i to ˈna upoo. Aita o ˈna e nehenehe e paraparau aore ra e tamaa. I tera ra tau, mea pautuutu maitai o ˈna. I te hoê râ poipoi i 1997, ua mauiui roa oia i muri i to ˈna upoo. Afai atura ta ˈna tane ia ˈna i te fare maˈi, e i taua po ra tei roto oia i te coma. Ua ara mai o ˈna i muri aˈe piti hebedoma i te vahi utuutu no te faaora mai, e aita to ˈna tino i hautiuti faahou e ua tuuhia te hoê matini no te huti i te aho. E rave rahi mahana, ua moˈe to ˈna hiroa e o vai atoa o ˈna.

 Te faataa ra Virginia i tei tupu i muri iho: “Ua hoˈi mǎrû mai to ˈu hiroa. Ua pure tamau vau. Aita vau i hinaaro e pohe e e vaiiho i ta ˈu tamaiti e iva matahiti noa. No te faaitoito ia ˈu, ua tamata vau i te tamau aau e rave rahi irava Bibilia.

 I muri iho, ua matara mai au i te vahi utuutu no te faaora mai. E ono avaˈe i roto e rave rahi fare maˈi e i te hoê pu tautururaa i te feia huma e ua hoˈi au i te fare. Aita roa ˈtu to ˈu tino i hautiuti faahou, e titauhia te tauturu no te mau mea atoa. Ua toaruaru roa vau! Ua manaˈo vau e mea faufaa ore au no te tahi atu e no Iehova. Ua haapeapea atoa vau no ta ˈu tamaiti.

 Ua taio vau i te tupuraa o te tahi mau Ite no Iehova tei faaruru i te hoê â fifi, e ua maere roa vau i ta ratou i rave no Iehova. I muri iho, ua tamata vau i te faatupu i te hoê feruriraa au noa ma te rave i ta ˈu e nehenehe. Hou vau a maˈihia ˈi, mea iti roa to ˈu taime no te mau ohipa Kerisetiano. I teie nei râ, mea rahi roa ïa to ˈu taime. No reira, ia ore au e haapeapea rahi, e haafaufaa vau i to ˈu auhoaraa e o Iehova.

 Ua haapii au i te faaohipa i te roro uira. Maoti te hoê porotarama roro uira, e nehenehe au e patapata ia hauti au i to ˈu upoo. Mea rohirohi, maoti râ teie ravea, e nehenehe au e haapii i te Bibilia, e poro i te tahi atu na roto i te rata e te rata uira. No te paraparau i te tahi atu, te vai ra ta ˈu iri ua papaihia te piapa i nia iho. E faaite mai te taata i pihai iho ia ˈu hoê hoê i te mau reta. Ia hape anaˈe te reta, e faaaraara vau i to ˈu mata, e ia tano anaˈe te reta, e tapiri ïa vau i to ˈu mata. E na reira noa vau a oti roa mai ai hoê taˈo e hoê pereota. Ua aravihi e ua ite te tahi o te mau tuahine tei matau ia ˈu i ta ˈu e hinaaro e parau. E i te tahi mau taime, mea arearea roa ia hape anaˈe te taˈo.

 Mea au roa na ˈu e rave i te mau ohipa Kerisetiano. E nati noa vau i te mau putuputuraa e i teie nei aita i taui. E haere ia ˈu e patapata i ta ˈu mau pahonoraa, e na te tahi atu e taio i te putuputuraa. I te mau avaˈe atoa e nati au e ta ˈu pǔpǔ pororaa no te mataitai i te JW Haapurororaa teata. a

 A 23 matahiti i teie nei e maˈi locked-in syndrome to ˈu. Te tahi mau taime, e oto vau. E haapauma râ vau i teie mau tupuraa ma te pure, ma te amuimui e te mau taeae e ma te tamau i te rave i te ohipa Kerisetiano. Oia mau, maoti te tauturu a te amuiraa, ua nehenehe au e rave i te taviniraa pionie tauturu hau atu ono matahiti. Ua tamata vau i te riro ei hiˈoraa maitai no ta ˈu tamaiti, Alessandro, o tei faaipoipo e o te tavini ra ei matahiapo. E pionie tamau atoa oia e ta ˈna vahine.

 Pinepine au i te feruriruri i ta ˈu e nehenehe e rave i roto i te paradaiso. Te ohipa matamua ta ˈu e hinaaro e rave, o te paraparauraa no nia ia Iehova e to ˈu iho reo. Te hinaaro ra vau e hahaere na te hiti anavai no te mataitai noa i te natura. E a 20 matahiti i teie nei, e faaamuhia na vau na roto i te hoê tuio, te tiai ru nei au i te pofai i te hoê apara e amu atu ai i te reira. No te mea no Italia mai au, te tiai ru atoa nei au i te tunu e i te amu i te maa no Italia mai, oia atoa te pizza!

 Ua tauturu te ‘tiaturiraa i te faaoraraa’ ia paruru i to ˈu feruriraa. (Tesalonia 1, 5:8) Te horoa mai ra te iteraa ia ˈu i roto i te ao apî i te oaoa noa ˈtu to ˈu maˈi, o ta ˈu e tiaturi ra e ora mai. Papu maitai, te tiai ru nei au i te fanaˈo i ‘te ora mau’ ta Iehova i fafau no tatou maoti ta ˈna Faatereraa arii.”—Timoteo 1, 6:19; Mataio 6:9, 10.