I roto i teie tumu parau

•  Eaha te hopoia a te hoê metua tane?

•  No te aha mea taa ê te hopoia a te metua tane?

•  Te metua tane e te tamahine

•  Te mau aratairaa no te mau metua tane

 Eaha te hopoia a te hoê metua tane?

•   Hou te fanauraa o ta oe aiû. E faaite to oe huru ei tane faaipoipo i teie mahana i to oe huru a riro ai oe ei metua tane i muri aˈe. Te faataa ra te hoê buka no nia i te mau metua tane:

   “Ia tauturu te hoê metua tane i ta ˈna vahine tei hapû ia haere e hoohoo i te mau tauihaa no te aiû, ia afai ia ˈna i te taote a ite ai i te aiû i roto i te opu o te mama aore ra a faaroo ai i te tupairaa o to ˈna mafatu, pinepine, e tauturu atoa o ˈna i muri aˈe i te fanauraa.”—Do Fathers Matter?

   “Ua hinaaro vau ia ite ta ˈu vahine e te tâuˈa mau ra vau ia ˈna a hapû ai oia. No reira vau i rave ai i tei maraa ia ˈu no te tauturu ia ˈna. Ua faanaho atoa mâua i te hoê piha no ta mâua aiû. E taime oaoa te reira no mâua a tiai noa ˈi i te taime fanauraa.”—James.

   Aratairaa Bibilia: “A imi . . . i to vetahi ê maitai, eiaha noa râ i to outou iho.”—Philipi 2:4.

•   I muri aˈe i te fanauraa o ta oe aiû. E nehenehe oe e vai piri noa i ta oe aiû a hauti ai e o ˈna e a hii noa ˈi ia ˈna. A apiti atoa ˈtu e ta oe vahine no te aupuru i ta orua aiû. E tauturu te mau mea ta oe e rave no ta oe aiû ia paari mai o ˈna. E faaite ta oe mau tutavaraa e mea faufaa roa ta oe aiû no oe.

   “A parahi i raro e a hauti na muri i ta oe tamarii. Mai ia ˈna a rave i te tahi mea e faaata ia ˈna. A haamanaˈo, ia na reira oe e haapii ta oe tamarii eaha mau na te here.”—Richard.

  

   Aratairaa Bibilia: “E tuhaa te mau tamarii no ǒ mai ia Iehova ra. E haamaitairaa te tamarii.”—Salamo 127:3, nota.

•   A paari mai ai ta oe tamarii. Ia au i te mau maimiraa, te mau tamarii mea piri aˈe ratou i to ratou metua tane, o ratou tei manuïa aˈe i roto i ta ratou haapiiraa, mea iti atoa te fifi ta ratou e farerei mai te faaheporaa e te inuraa i te ava aore ra te raveraa i te raau taero e i te ohipa ino. A faataa i te taime no te vai piri noa e ta oe tamarii.

   “Ua parau mai ta ˈu tamaiti e i te mahana e faarue ai o ˈna i te fare, e moˈemoˈe o ˈna no te mea aita faahou mâua e nehenehe e paraparau faahou ia tere mâua na nia i te pereoo aore ra i te taime tamaaraa. Te vai ra te tahi mau tauaparauraa faufaa ta mâua i aparau, ua tupu ïa i te taime aita mâua i manaˈo noa ˈˈe no te mea ua faataa mâua i te taime no mâua.”—Dennis.

  

   Aratairaa Bibilia: “A haapao maite i to outou haerea, e ia au hoi i to te feia feruriraa paari eiaha râ i to te maamaa, ma te faaohipa maitai i to outou taime.”—Ephesia 5:15, 16.

 No te aha mea taa ê te hopoia a te metua tane?

 No e rave rahi taata, na te metua tane e aupuru e e paruru i te utuafare taatoa e na te metua vahine e haapao i te mau hinaaro i te pae huru aau o te utuafare. (Deuteronomi 1:31; Isaia 49:15) I roto râ i te tahi mau utuafare, e amo te metua vahine aore ra te metua tane i na hopoia e piti. Ia au i te mau maimiraa, e tuhaa taa ê ta raua e piti atoa i roto i te utuafare. a

 Te faatia ra Judith Wallerstein, hoê taata îite i te pae utuafare, i ta ˈna iho i tapao no nia i te reira. Te parau ra o ˈna: “A roohia ˈi ta ˈu tamahine 12 matahiti to ˈna, i te hoê ati purumu, ua hinaaro oia e ia haere atoa to ˈna papa na muri ia ˈna i roto i te pereoo uta taata maˈi. O to ˈna papa ta ˈna e tiaturi roa ˈˈe no te haapao ia ˈna. I muri aˈe râ, i te fare maˈi, ua hinaaro oia ia parahi noa vau i pihai iho ia ˈna no te tamahanahana ia ˈna.” b

 “E nehenehe te hoê metua tane e hopoi i te tauturu e te paruru no to ˈna utuafare, e ohipa teie ta te hoê metua vahine e ore e nehenehe e rave o ˈna anaˈe. I te tahi aˈe pae, e nehenehe te metua vahine e tauturu i ta ˈna tamarii ia ite e te herehia ra e te tâuˈahia ra o ˈna. E ohipa amui na metua no te tauturu i te utuafare.”—Daniel.

 Aratairaa Bibilia: “A faaroo, ta ˈu tamaiti, i te aˈo a to metua tane, e eiaha e faarue i te haapiiraa a to metua vahine.”—Maseli 1:8.

 Te metua tane e te tamahine

 Ei metua tane, e haapii oe i ta oe tamahine e nafea te hoê tane e faatura ˈi ia ˈna. E nehenehe o ˈna e haapii maoti e piti ravea:

•   E hiˈo o ˈna eaha to oe huru i nia i to ˈna mama. Ia faaite oe i to oe here e faatura i ta oe vahine, e ite ta oe tamahine eaha te mau huru maitatai e tia ia ˈna ia imi a maiti ai i te hoê hoa faaipoipo na ˈna.—Petero 1, 3:7.

  

•   E hiˈo o ˈna i to oe huru i nia ia ˈna. Ia faatura oe i ta oe tamahine, e haapii te reira ia ˈna ia faatura ia ˈna iho. E haapii atoa o ˈna eaha te huru ta te hoê tane e tia ia faaite i nia ia ˈna.

   Tera râ, ia faahapa noa te hoê metua tane i ta ˈna tamahine, e nehenehe te tamahine e manaˈo e mea faufaa ore o ˈna a imi atu ai i te tauturu a vetahi atu mau tane o te nehenehe e rave i te tahi mea tano ore i nia ia ˈna.

   “Ia ite te hoê tamahine i te here e te turu a to ˈna metua tane, e paruru te reira ia ˈna ia maiti i te hoê tane maitai.”—Wayne.