Ia au i te mau tuatapaparaa, mea oaoa aˈe e mea maitai aˈe te ea o te feia o te ite i te haamauruuru. Mea faaruru aˈe ratou i te mau fifi e e auhoaraa maitai aˈe to ratou. Ua tapao te aivanaa ra o Robert Emmons ia ite te taata i te haamauruuru, “e paruru te reira ia ˈna i te hinaaro tano ore e te puai o te nounou e te inoino.” a

 E nafea te mau tamarii e faufaahia ˈi i te faaiteraa i te mauruuru? Ua hiˈopoahia te haerea o 700 taurearea e maha matahiti i te maoro. Ia au i teie tuatapaparaa, ua tapaohia e te feia o te faaite i te mauruuru, o te feia ïa o te ore e haavare i te mau hiˈopoaraa i te fare haapiiraa, o te ore e faaohipa i te raau taero e e inu rahi i te ava. Hau atu, e haerea maitai to ratou.

•   Eita te tamarii e faaite i te mauruuru mai te peu te manaˈo ra o ˈna mea titauhia ia horoa ˈtu ia ˈna ta ˈna e hinaaro ra. Mea fifi roa no tera huru tamarii ia faaite i te mauruuru mai te peu e ite o ˈna i te mau maitai ta ˈna e fanaˈo ra mai te hoê titauraa, eiaha râ mai te hoê ô.

   I teie tau, e ite-pinepine-hia tera huru. Ua tapao te hoê metua vahine o Katherine to ˈna iˈoa: “Te haapii ra teie nei ao i te taata e mea titauhia ia horoa ˈtu pauroa ta ratou e hinaaro ra. Mea rahi te mau hohoˈa e faaite ra i te mau taoˈa e mea titauhia ia fanaˈo tatou e ia riro tatou ei taata matamua roa o te fanaˈo i te reira.”

•   E nehenehe te tamarii e haapii i te faaite i te mauruuru noa ˈtu mea apî roa o ˈna. Te parau ra te hoê metua vahine o Kaye to ˈna iˈoa: “Mea haapii roa te mau tamarii. Mea faufaa ïa ia haapii i te mau peu maitai i te tamarii i to ˈna iho â apîraa. E au te reira i te faaohiparaa i te hoê raau no te tauturu i te hoê tumu raau ia tupu afaro.”

•   A haapii atu eaha te parau. E nehenehe atoa te mau tamarii e haapii i te parau “Mauruuru” ia horoa ˈtu te hoê taata i te hoê ô aore ra ia faaite oia i te hamani maitai. A paari ai, e mauruuru atu â ratou i te aau horoa noa o vetahi ê.

   Aratairaa Bibilia: “Ia mauruuru atoa outou.”—Kolosa 3:15.

   “Pinepine ta mâua mootua e toru matahiti to ˈna i te parau ‘Mauruuru’ e i te ani i te hoê mea ma te parau ‘E e.’ Ua haapii o ˈna i te hiˈoraa o to ˈna na metua. Maoti te mau peu e te huru mauruuru o to ˈna na metua, ua ite o ˈna e nafea ia faaite i te mauruuru ia vetahi ê.”—Jeffrey.

•   A haapii atu eaha te rave. E nehenehe outou e haapii i te tamarii ia papai i te hoê poroi haamauruururaa te taime e horoa ˈi te tahi atu i te hoê ô. Hau atu, a faataa i te ohipa ta te tamarii e nehenehe e rave i te fare. E mauruuru aˈe ïa o ˈna i te mau tutavaraa ravehia ia vai mâ noa te fare.

   Aratairaa Bibilia: “E rahi aˈe te oaoa ia horoa ˈtu ia horoahia mai.”—Ohipa 20:35.

   “I te fare, e tauturu mai ta mâua na taurearea ma te feruri i te maa, ma te tunu atu i te reira e ma te rave i te ohipa i te fare. E tauturu te reira ia raua ia oaoa i te mau tutavaraa ta mâua e rave ra ei metua. E mea faaite aˈe raua i te mauruuru.”—Beverly.

•   A haapii atu i te huru tano. A faaau i te mauruuru i te hoê tumu raau o te tupu ra i nia i te repo o te haehaa. Te farii nei te mau taata aau haehaa e e hinaarohia te tauturu no te manuïa i roto i te mau mea atoa. E turai te reira ia ratou ia faaite i te mauruuru ia vetahi ê no te turu ta ratou e horoa ˈtu.

   Aratairaa Bibilia: “Ma te haehaa râ, a haamanaˈo e mea hau aˈe vetahi ê ia outou, a imi atoa ˈi i to vetahi ê maitai, eiaha noa râ i to outou iho.”—Philipi 2:3, 4.

   “I te tahi mau taime, a tama ˈi i te po, mea au roa na matou ia faaite matou tataitahi i te hoê mea maitai tei tupu. E tauturu te reira ia feruri i nia i te mau manaˈo oaoa a faaite atu ai i te mauruuru, eiaha râ i nia i te mau manaˈo tano ore e te miimii.”—Tamara.

 Manaˈo tauturu: A horoa i te hiˈoraa maitai. Mea ohie aˈe no te tamarii i te haapii i te faaite i te mauruuru mai te peu e pinepine o ˈna i te faaroo ia oe i te haamauruuru ia vetahi ê e ia ratou.