E pǐpǐ taiva ore Maria Magadala na Iesu. No roto mai to ˈna iˈoa Magadala i te oire ra o Magadala i pihai iho i te miti o Galilea. Peneiaˈe i ora na Maria i ǒ.

 Tei rotopu atoa Maria Magadala i te mau vahine o tei ratere na muri ia Iesu e ta ˈna mau pǐpǐ e ua aupuru atoa ia ratou maoti ta ratou mau faufaa. (Luka 8:1-3) Ua ite o ˈna i te haapoheraahia Iesu e o ˈna hoê o tei ite na mua roa ia Iesu i muri aˈe i to ˈna tia-faahou-raa.—Mareko 15:40; Ioane 20:11-18.

•  E vahine taiata anei o Maria Magadala?

•  E “aposetolo no te mau aposetolo” anei Maria Magadala?

•  E vahine anei Maria Magadala na Iesu Mesia?

•  Ehia Maria tei faahitihia i roto i te Bibilia?

 Aita te Bibilia e parau ra e vahine taiata o Maria Magadala. Ta te Bibilia noa i parau no nia ia ˈna, ua tiavaru Iesu e hitu demoni i rapae no roto mai ia ˈna.—Luka 8:2.

 Nohea mai teie manaˈo e e vahine taiata o ˈna? Hanere matahiti i muri aˈe i to ˈna poheraa, ua parauhia e o ˈna te vahine, aita i faahitihia te iˈoa (peneiaˈe te vahine taiata), tei horoi i te avae o Iesu e to ˈna roimata e o tei tamǎrô i to ˈna rouru. (Luka 7:36-38) Tera râ, aita hoê aˈe tumu Bibilia no nia i tera tiaturiraa.

 Aita. E pii te mau haapaoraa Katolika ia ˈna o “Maria Magadala peata” oia atoa “aposetolo no te mau aposetolo” no te mea o ˈna hoê o tei haere e faaite i te mau aposetolo e ua faatiahia mai Iesu. (Ioane 20:18) E ere râ te auraa e aposetolo o ˈna. E aita atoa te Bibilia e faahiti ra e ua piihia o ˈna mai tera.—Luka 6:12-16.

 Ua oti te Bibilia i te papaihia i te pae hopea o te senekele matamua i muri aˈe i te tau o Iesu. Tera râ, hanere matahiti i muri aˈe, ua faaoti te mau tia haapaoraa i te horoa i te hoê tiaraa teitei no Maria Magadala. Te vai ra te tahi mau papai no te mau matahiti 100 e 300 o te faataa ra e ua pohehae te tahi mau pǐpǐ a Iesu ia Maria Magadala. E ere râ teie mau papai no roto mai i te Bibilia.

 Aita. Te faataa ra te Bibilia e ua faaea taa noa Iesu. a