Te faaue ra te Bibilia “eiaha . . . e amu i te toto.” Aita tatou e farii i te toto taatoa aore ra i na tuhaa rahi e maha o te toto ei maa anei aore ra no te pâmu i roto ia tatou. A hiˈopoa i to muri nei irava:

•   Genese 9:4. I muri aˈe i te diluvi, ua farii te Atua ia amu Noa e to ˈna utuafare i te iˈo animara eiaha râ i te toto. Ua parau te Atua ia Noa: “O te iˈo anaˈe e ora, oia hoi e toto, to roto, eiaha roa outou e amu.” E faaueraa teie i horoahia no te taata atoa mai te tau mai â o Noa.

•   Levitiko 17:14. “Eiaha outou e amu i te toto o te mau mea ora e rave rau atoa, no te mea o to ratou toto te ora o te mau mea ora e rave rau atoa. E haapohehia te taata atoa e amu i te reira.” Na te Atua e horoa i te ora, e no ˈna tei roto te ora i te toto. Noa ˈtu ua horoahia teie ture i te nunaa Iseraela, e haapii atoa ra tatou no te Atua e hara rahi ia amuhia i te toto.

•   Ohipa 15:20. “Ia haapae . . . i te toto.” Mai ta ˈna i faaue ia Noa, ua horoa atoa te Atua i teie faaueraa i te mau Kerisetiano. Aita ïa te mau Kerisetiano matamua i amu i te toto aore ra i faaohipa i te reira no te rapaau ia ratou.

No te aha te Atua e faaue ai ia tatou ia haapae i te toto?

 I teie mahana, te vai ra te mau haapapuraa i te pae o te rapaauraa e faaite ra e ere i te mea maitai te pâmuraa toto no te ea. Te mea faufaa ˈtu â, te faaue ra te Atua ia haapae tatou i te toto no te mea e mea moˈa te reira no ˈna.—Levitiko 17:11; Kolosa 1:20.